BAIBEL negadiai, kohu naria tauna ese ma ta ena ruma eiava kohu ia naria. Inai hereva “kohu naria tauna” be Heberu bona Grik gado ai idia hahanaia neganai, nega haida ena anina be ovasia eiava ruma ena kohu naria tauna.

Iakobo ena natuna, Iosepa be Aigupito ai hesiai tauna ta bamona ia noho neganai, ia idia abia hidi ena biaguna ena ruma kohudia ia naria totona. Momokani, ena biaguna Aigupito ai, ese “kohu ibounai Iosepa ena imana dekenai ia atodia.” (Gen. 39:2-6) Gabeai, Iosepa be Aigupito edia lohia tauna ai ia lao neganai, ia be ma ta ia abia hidi ena kohu ia naria totona.​—Gen. 44:4.

Iesu ena negai, nega momo tano biagudia be edia farm idia rakatania bona siti dekenai idia noho. Unai dainai tano biagudia be kohu naria tauna ta do idia abia hidi, dina ta ta ai farm dekenai idia karaia gaukara ia naria totona.

Daika be ia hegeregere kohu naria tauna ena gaukara ia karaia totona? Aposetolo edia negai ia noho Roma toretore tauna, ladana Columella ia gwau, hesiai tauna ta idia abia hidi kava lasi kohu naria tauna ena gaukara ia karaia totona, to “idia abia hidi tauna be gaukara ia diba bona ia karaia namonamo tauna.” Ia be “mai ena kara namodia bona ia kara auka lasi.” Danu ia gwau: “Namo lasi kohu naria tauna ia laloa ia be gau ibounai ia diba, to namona be mai ura ida diba ia abia noho.”

Baibel ai kohu naria tauna bona ia karaia gaukara ena haheitalai idia gaukaralaia Keristani kongrigeisen lalonai idia karaia gaudia idia hahegeregerea totona. Hegeregere, aposetolo Petero ese Keristani taudia ia hagoadaia, ia gwau: “Dirava ena amo umui abia hebogahisi hereadaena do umui gaukaralaia ta ta umui hesiai henia totona.”​—1 Pet. 4:10.

Luka 16:1-8 ai Iesu ese kohu naria tauna ena haheitalai ia gaukaralaia. Danu, King ai do ia lao negana ena peroveta herevana ia gwauraia neganai, Iesu ese ena murinai idia raka taudia ia hadibaia, ia be “hesiai tauna mai ena kamonai bona mai ena kara maoromaoro” eiava “kohu naria tauna mai ena kamonai” do ia abia hidi. Edia gaukara badana be inai nega dokona lalonai, Keriso ena murinai idia raka taudia do idia durua. (Mat. 24:45-47; Luka 12:42) Ita moale bada badina hesiai tauna mai ena kamonai ese iseda abidadama idia hagoadaia pablikeisen momo idia hegaegaelaia bona tanobada ibounai lalonai idia halasia.