IESU be hanaihanai guriguri karana ia hadibaia. Ena nega ai, Iuda tomadiho edia gunalaia taudia be “dala badana ena kona dekenai” idia guriguri. Dahaka dainai? “Taunimanima ese idia itaia totona.” Oibe, idia ura taunimanima ese edia tomadiho badinaia goada karana do idia itaia. Idia momo be hereva tamona idia gwauraia loulou, badina idia laloa “hereva momo idia gwauraia” neganai, Dirava ese edia guriguri do ia kamonai.” (Mataio 6:5-8) Iesu ia hahedinaraia unai bamona kara be anina lasi, bona kudou-maoro taudia ia hadibaia unai bamona do idia guriguri lasi. To idia dekenai guriguri dala maorona ia hadibaia.

Iesu ia hadibaia namona be iseda guriguri lalonai ita hahedinaraia, ita ura Dirava ese ena ladana do ia hahelagaia, Iena Basileia do ia mai, bona Iena ura gauna be tanobada dekenai do ia karaia. Danu, Iesu ia hahedinaraia iseda tauanina durua gaudia totona Dirava ena heduru ita noia diba. (Mataio 6:9-13; Luka 11:2-4) Iesu ese haheitalai amo ia hahedinaraia, Dirava ese iseda guriguri ia kamonai totona, namona guriguri karana do ita hesikulaia lasi, ita abidadama noho bona ita manau. (Luka 11:5-13; 18:1-14) Iesu ese ma haida dekenai ia hadibaia gaudia be iena mauri dalana amo ia hahedinaraia.—Mataio 14:23; Mareko 1:35.

Iesu ena hahediba herevadia ese ena aposetolo taudia ia durua edia guriguri karana idia hanamoa totona. To, Iesu ia naria ela bona ena tanobada maurina ena hanuaboi ginigabena, bena idia dekenai mai anina bada gauna ta ia hadibaia.

Unai hanuaboi ginigabena ai, Iesu be ena nega bada ia gaukaralaia ena abidadama aposetolo taudia ia hagoadaia totona. Unai be nega maorona gau matamata ia herevalaia totona. Iesu ia gwau: “Dala be lau, hereva momokani be lau bona mauri be lau. Lau sibona amo tau ta be Tamana dekenai ia mai diba.” Gabeai inai gwauhamata ia gwauraia: “Egu ladanai dahaka umui noia be do lau karaia, unai amo Tamana be Natuna ese ia karaia gaudia amo hairai do ia abia. Bema egu ladanai gau ta umui noia, do lau karaia.” Ena hereva dokona ai, ia gwau: “Matamana amo egu ladanai gau ta totona umui noinoi lasi. To hari umui noinoi bena do umui abia, unai amo emui moale be do ia bada.”—Ioane 14:6, 13, 14; 16:24.

Unai hereva be mai anina bada. Diksenari ta ese unai hereva dekenai ia gwau, “unai be guriguri karana ia haidaua momokani.” Iesu ia gwau lasi ia dekenai do ita guriguri, to ia ese Iehova Dirava dekenai do ita lao dalana ma ta ia kehoa.

Ita diba, Dirava be hanaihanai iena hesiai taudia goadadia edia guriguri ia kamonai. (1 Samuela 1:9-19; Salamo 65:2) To, Dirava ese Israela besena ida gwauhamata ia karaia negana amo, Dirava ese edia guriguri ia kamonai totona, namona be idia abia dae Israela bese be Dirava ena abia hidi besena. Bona gabeai, Solomona ena nega amo, namona be idia abia dae Dirava ese dubu helaga ia abia dae boubou karaia totona. (Deuteronomi 9:29; 2 Sivarai 6:32, 33) To, unai tomadiho dalana be nega sisina gauna. Aposetolo Paulo ia torea bamona, Dirava ese Israela besena dekenai ia henia Taravatu bona dubu helaga dekenai idia karaia boubou gaudia, “be do idia mai gau namodia edia laulau sibona, to ia be unai gaudia edia toana korikori lasi.” (Heberu 10:1, 2) Anina korikorina ese unai laulau gaudia edia gabu do ia abia. (Kolose 2:17) Lagani 33 C.E. amo, tau ta be Dirava ia tura henia totona Mose ena Taravatu ia badinaia be anina lasi. To, gau badana be Taravatu ese ia hahedinaraia tauna, Iesu Keriso unai, do ia badinaia.—Ioane 15:14-16; Galatia 3:24, 25.

Iesu ese Iehova dekenai ita lao dalana hereadaena ia kehoa, Iesu be iseda turana namona, bona dala ia karaia Dirava ese iseda guriguri ia kamonai bona haerelaia totona. Dahaka dainai Iesu be ita totona unai ia karaia?

Ita ibounai be mai kara dika danu ita vara dainai, iseda kara dika kokia totona, kara ta ita karaia eiava boubou gauna ita henia be hegeregere lasi, iseda helaga Diravana, Iehova kahirakahira ita lao totona. (Roma 3:20, 24; Heberu 1:3, 4) To, Iesu ese iena mauri goevadaena ia bouboulaia bona ia idia abidadama henia taudia edia kara dika edia davana ia karaia. (Roma 5:12, 18, 19) Idia ura Iesu ese edia kara dika ia kokia taudia be Iehova vairanai do idia goeva diba, bona “mai gari lasi ida” ia idia hereva henia diba—to gau badana be Iesu ena boubou gauna do idia abidadama henia bona iena ladana ai do idia guriguri.—Efeso 3:11, 12.

Iesu ena ladana ai ita guriguri neganai, ita hahedinaraia Dirava ena ura ia hagugurua totona, Iesu ese ia karaia gaukara toi ita abia dae: (1) Ia be “Dirava ena Mamoe Natuna,” bona iena boubou gauna ese iseda kara dika kokia dalana ia kehoa. (2) Ia be Iehova ese ia hatorea isi lou bona hari ia be “hahelaga tauna badana” bamona ita dekenai mauri davana ena hahenamo ia henia noho. (3) Iesu sibona be “dala,” ia amo Dirava dekenai guriguri ita gwauraia diba.—Ioane 1:29; 14:6; Heberu 4:14, 15.

Iesu ena ladana ai ita guriguri neganai, Iesu ita matauraia. Unai hemataurai karana be maoro, badina Iehova ia ura “ibounai be Iesu ena ladanai do idia tui diho. Bona namona be taunimanima ibounai ese do idia gwauraia hedinarai, Iesu Keriso be Lohiabada, unai amo Dirava iseda Tamana do idia hanamoa.” (Filipi 2:10, 11) To mai anina bada gauna be, Iesu ena ladana amo ita guriguri karana ese Iehova ena ladana ia hanamoa, badina ia ese iena Natuna ia henia ita ia hamauria totona.—Ioane 3:16.

Iesu ena maduna badana ita lalopararalaia totona, Baibel be Iesu ia herevalaia neganai, dagi ladadia idauidau ia gaukaralaia. Unai ese ita idia durua Iesu ese ita totona ia karaia vadaeni gaudia, hari ia karaia noho gaukara bona nega vaira ai do ia karaia gaukara edia hahenamo momo ita lalopararalaia totona. (Rau 14 ai maua itaia, “ Iesu Ia Karaia Gaukara Badadia”) Oibe, Dirava ese Iesu “dekenai ladana ibounai ia hereaia ladana ta ia henia.” a Dirava ese ia dekenai siahu ia henia, guba bona tanobada gaudia ibounai ia biagua totona.”—Filipi 2:9; Mataio 28:18.

Oibe, bema ita ura Dirava ese iseda guriguri ia kamonai henia, namona be Iesu ena ladanai ita guriguri. (Ioane 14:13, 14) To inai hereva, “Iesu ena ladanai” be do ita gwauraia kava lasi. Unai anina be dahaka?

Mani inai haheitalai oi laloa. Bisinesi tauna amo revareva ta oi abia neganai, vaia dokona ai ia torea “mai momokani ida,” bena ena ladana ia sainia. Oi laloa unai be bisinesi tauna ena hemami korikorina, eiava ia be bisinesi revareva idia torea dalana ia badinaia sibona? Oibe, Iesu ena ladanai iseda guriguri ita gwauraia karana be mai anina bada, ia be bisinesi tauna ena revareva ia hadokoa herevana bamona lasi. Ena be “nega ibounai ita guriguri,” to namona be mai kudouna ibounai ida ita gwauraia, bona namo lasi ita laloa ia be ita gwauraia kava herevana ta sibona.—1 Tesalonika 5:17; Salamo 119:145.

Edena dala ai inai hereva, “Iesu ena ladanai” do ita gwauraia kava lasi? Namona be Iesu ena lalokau bona hebogahisi karadia ita laloa dobu. Oi totona ia karaia vadaeni gaudia bona ia ura do ia karaia gaudia oi laloa. Emu guriguri lalonai, Iehova oi tanikiu henia bona hanamoa, badina iena Natuna be dala hereadaena ai ia gaukaralaia. Unai oi karaia neganai, emu abidadama Iesu ena gwauhamata dekenai do goada: “Bema egu ladanai Tamana dekenai gau ta umui noia, umui dekenai do ia henia.”—Ioane 16:23.”