Samuela Ginigunana 29:1-11
-
Filistia taudia ese Davida idia abidadama henia lasi (1-11)
29 Filistia taudia+ ese edia tuari taudia ibounai be Apeka dekenai idia haboudia, to Israela taudia be Ieserele ena ranu lohilohi kahirakahira idia kamepa.+
2 Bona Filistia ena lohia taudia mai edia tuari taudia be orea handred momo bona tausen momo dekenai idia hanaia, bona Davida bona ena tatau be Akisi ida vaira kahanai idia raka.+
3 To Filistia lohia taudia idia gwau: “Dahaka dainai inai Heberu taudia idia mai?” Akisi ese Filistia lohia taudia ia haere henia: “Inai be Davida, Israela ena king Saulo ena hesiai tauna, ia be lau ida lagani ta eiava ma haida ia noho.+ Lau dekenai ia mai dinana amo ema bona hari, ia dekenai kerere ta lau davaria lasi.”
4 To Filistia lohia taudia be Akisi dekenai idia badu, bona ia dekenai idia gwau: “Inai tau oi siaia giroa lou.+ Namona be oi henia tanona dekenai ia giroa lou. Namo lasi ia be ita ida tuari totona ia diho lao, tuari lalonai ita ia tuari henia garina.+ Oibe, tuari lalonai ia ese iseda tatau do ia hamasedia, ena lohia ena lalonamo ia abia totona, ani?
5 Inai be Davida, ani? Ia dainai Israela taudia be idia mavaru bona inai ane idia abia, idia gwau:
‘Saulo ese taunimanima tausen momo ia hamasea,Bona Davida ese taunimanima ten tausen momo ia hamasea,’ ani?”+
6 Bena Akisi+ ese Davida ia boiria bona ia dekenai ia gwau: “Ia mauri noho Diravana, Iehova, ena ladana ai oi lau hamaoroa momokani, oi be kara maoromaoro tauna, bona lau moale oi be egu tuari orea ida tuari totona do oi lao,+ badina lau dekenai oi mai dinana amo ema bona hari, oi dekenai kerere ta lau davaria lasi.+ To lohia taudia ese oi idia abidadama henia lasi.+
7 Vadaeni mai maino ida oi giroa lou, bona gau ta oi karaia lasi Filistia lohia taudia oi habadua totona.”
8 To, Davida be Akisi dekenai ia gwau: “To egu lohia e, lau be dahaka lau karaia? Oi dekenai lau mai negana amo ema bona hari, lau dekenai dahaka kerere oi davaria? Dahaka dainai lau be oi ida do lau lao lasi, bona egu lohia bona king ena inai taudia ita tuari henidia?”
9 Akisi ese Davida ia haere henia: “Lau diba momokani oi be tau namona, Dirava ena aneru ta bamona.+ To Filistia lohia taudia idia gwau, ‘Namo lasi ia be ita ida tuari totona ia daekau lao.’
10 Vadaeni daba momokani ai, oi bona emu king ena hesiai taudia, oi ida idia mai taudia unai, be do umui noga, oibe, daba momokani ai dina ena diari ia hedinarai neganai, umui toreisi bona do umui lao.”
11 Vadaeni Davida bona ena tatau be daba momokani idia toreisi, Filistia tanona dekenai idia giroa lou totona, bona Filistia taudia be Ieserele dekenai idia daekau lao.+
