markus ke mutabik khushkhabri 6:1-56
6 fir yeeshu vahaan se nikala aur apne ilake mein aaya jahaan woh pala-badha tha+ aur uske chele bhi uske saath aaye.
2 jab sabt ka din aaya, to woh sabha-ghar mein sikhane laga. uski baat sunnaevale zyadatar log hairan the. unhonne kaha, “is aadmi ne ye baatein kahaan se seekhin?+ bhala yah buddhi ise kahaan se mili aur yah aise shaktishali kaam kaise kar paa raha hai?+
3 yah to vahi badhai hai na,+ jo mariyam ka beta+ aur yakub, yoosuf, yahooda aur shamaun ka bhaai hai!+ aur iski behenein yahaan hamare beech hi rehti hain na!” isliye unhonne us par yakeen nahin kiya.
4 magar yeeshu ne unse kaha, “ek bhavishyavaktaa ka har kahin aadar kiya jaata hai, sirf uske apne ilake, ghar aur rishtedaron ke beech nahin kiya jaata.”+
5 isliye usne chand beemaron par haath rakhkar unhein theek karne ke siva vahaan aur koi shaktishali kaam nahin kiya.
6 darasal unke vishvas ki kami dekhkar use taajjub hua. iske baad woh aas-paas ke gaanvon mein jaakaar sikhane laga.+
7 fir yeeshu ne un baarahon ko bulaya aur woh unhein do-do ki jodi mein bhejne laga.+ usne unhein dusht swargdooton par adhikar bhi diya.+
8 usne ye hidaytein bhi di ki woh safar ke liye ek laathi ko chhod aur kuch na lein, na roti, na khaane ki potli, na apne kamarband mein paise,*+
9 na hi do jodi kapde lein* balki jootiyaan kas lein.
10 yeeshu ne unse yah bhi kaha, “jab bhi tum kisi ghar mein jaao, to vahaan tab tak thahro jab tak tum us ilake mein raho.+
11 agar kisi ilake mein log tumhein sweekar nahin karein ya tumhari nahin sunein, to vahaan se baahar nikaalte vakt apne pairon ki dhool jhaad dena taaki unhein gavahi mile.”+
12 tab woh nikaal pade aur prachar karne lage ki log pashchatap karein.+
13 unhonne kai dusht swargdooton ko nikaala+ aur kai beemaron par tel malkar unhein theek kiya.
14 yah baat raja herodes ke kaanon mein padi kyonki yeeshu ka naam mashhoor ho gaya tha. log kehte the, “yuhanna baptisma denevala, jo mar gaya tha, zinda kar diya gaya hai aur iseeliye woh aise shaktishali kaam kar raha hai!”+
15 magar doosre kehte the, “yah eliyah hai.” kuch aur log kehte the, “yah to purane zamane ke bhavishyavaktaon jaisa koi bhavishyavaktaa hai.”+
16 magar jab herodes ne yah baat suni, to usne kaha, “jis yuhanna ka sir mainne katvaya tha, woh fir se zinda ho gaya hai.”
17 herodes ne apne bhaai filippus ki patni herodiyas se shaadi kar li thi. herodiyas ki vajah se herodes ne yuhanna ko giraftar kar liya tha aur use zanjeeron mein baandhkar jel mein dalva diya tha.+
18 kyonki yuhanna herodes se kaha karta tha, “toone apne bhaai ki patni ko apna banakar kaanoon toda hai.”+
19 isliye herodiyas, yuhanna se nafrat karne lagi thi. woh use maar daalna chahti thi, magar aisa nahin kar paa rahi thi.
20 kyonki herodes jaanta tha ki yuhanna nek aur pavitra insan hai.+ isliye woh usse darta tha aur use bachane ki koshish karta tha. woh yuhanna ki baatein sunnae ke baad badi uljhan mein pad jaata tha ki kya kare. fir bhi woh khushi se uski sunta tha.
21 magar ek din woh mauka aaya jiski herodiyas ko talash thi. us din herodes ka janmdin tha aur usne shaam ki badi daavat rakhi+ jismein usne bade-bade adhikariyon aur senapatiyon aur galeel ke jaane-maane logon ko bulaya.+
22 tab herodiyas ki beti vahaan aayi aur usne naachkar herodes aur daavat mein maujood* baaki logon ka dil khush kiya. raja ne ladki se kaha, “tu jo chahe maang, main tujhe de doonga.”
23 raja ne kasam khaayi, “tu jo chahe maang le, main apna aadha raaj tak tujhe de doonga.”
24 tab ladki ne baahar jaakaar apni maa se poochha, “main kya maangoon?” uski maa ne kaha, “yuhanna baptisma denevale ka sir.”
25 usi vakt woh ladki tezee se andar raja ke paas gayi aur usne kaha, “main chahti hoon ki tu abhi, isi vakt mujhe ek thaal mein yuhanna baptisma denevale ka sir laa de.”+
26 yah sunkar raja bahot dukhi hua, fir bhi usne jo kasmein khaayi thi aur jo mehman vahaan the,* unki vajah se usne ladki ki guzarish nahin thukrayi.
27 raja ne fauran ek angrakshak ko bheja aur use yuhanna ka sir laane ka hukm diya. us aadmi ne jaakaar jel mein yuhanna ka sir kaat diya
28 aur use ek thaal mein rakhkar ladki ko de diya aur ladki ne use le jaakaar apni maa ko diya.
29 jab yuhanna ke chelon ko iski khabar mili, to woh aakaar uski laash le gaye aur use ek kabraa* mein rakh diya.
30 yeeshu ke preshit uske paas ikattha huye aur unhonne logon ke beech jo-jo kaam kiye the aur unhein jo-jo sikhaya tha, woh sab use bataya.+
31 tab yeeshu ne unse kaha, “aao, tum sab alag kisi ekaant jagah mein chalkar thoda aaram kar lo,”+ kyonki vahaan bahot log aa-jaa rahe the aur unhein khaane tak ki fursat nahin mili thi.
32 isliye woh ek naav par chadhkar kisi ekaant jagah ke liye nikaal pade.+
33 magar logon ne unhein jaate dekh liya aur bahoton ko is baat ka pata chal gaya. tab sab shehron se log daudkar unse pehale hi us jagah jaa pahunche.
34 jab yeeshu naav se utra to usne logon ki ek bheed dekhi aur unhein dekhkar woh tadap utha,+ kyonki woh aisi bhedon ki tarah the jinka koi charvaha na ho.+ aur woh unhein bahot-si baatein sikhane laga.+
35 ab kaafi vakt beet chuka tha aur uske chelon ne uske paas aakaar kaha, “yah jagah sunsan hai aur bahot der ho chuki hai.+
36 isliye inhein vida kar taaki woh aas-paas ke dehaton aur gaanvon mein jaakaar khaane ke liye kuch khareed lein.”+
37 magar yeeshu ne unse kaha, “tumhin unhein kuch khaane ko do.” yah sunkar chelon ne kaha, “kya hum 200 deenar* ki rotiyaan khareedein aur inhein khaane ko dein?”+
38 yeeshu ne unse kaha, “jaao dekho, tumhare paas kitni rotiyaan hain.” pata lagakar unhonne kaha, “paanch. aur do machhliyaan bhi hain.”+
39 fir yeeshu ne sab logon se kaha ki woh alag-alag toliyaan banakar hari ghaas par aaram se baith jaayen.+
40 woh sau-sau aur pachas-pachas ki toliyon mein baith gaye.
41 yeeshu ne woh paanch rotiyaan aur do machhliyaan lin aur aakash ki taraf dekhkar prarthna mein dhanyavad diya.+ fir woh rotiyaan todkar chelon ko dene laga taaki woh unhein logon mein baantein. usne woh do machhliyaan bhi sabke liye baant di.
42 tab sab logon ne ji-bharkar khaaya
43 aur unhonne bachi hui rotiyon ke tukde uthaye jinse 12 tokriyaan bhar gayin. inke alava machhliyaan bhi thi.+
44 aur rotiyaan khaanevalon mein aadmiyon ki ginti 5,000 thi.
45 fir yeeshu ne bina der kiye apne chelon se kaha ki woh naav par chadh jaayen aur us paar baitsaida chale jaayen, jabki woh khud bheed ko vida karne laga.+
46 magar unko alvida kehne ke baad, woh prarthna karne ke liye ek pahad par chadh gaya.+
47 ab shaam dhal chuki thi aur naav jheel ke beech thi, magar woh akela pahad par tha.+
48 usne dekha ki tez aandhi chal rahi hai aur uske chelon ko naav khene mein badi mushkil ho rahi hai kyonki hava ka rukh unke khilaf tha. tab raat ke kareeb chauthe pehr* woh jheel par chalte huye unki taraf aaya. magar aisa lag raha tha jaise woh unse aage jaana chahta hai.*
49 jaise hi chelon ne dekha ki woh paani par chal raha hai, unhonne socha, “yah zaroor hamara vaham hai!” aur woh zor se chilla uthe.
50 kyonki woh un sabko nazar aa raha tha aur woh ghabra gaye. magar usne fauran unse baat ki aur kaha, “himmat rakho, main hi hoon. daro mat.”+
51 fir yeeshu bhi unke paas naav par chadh gaya aur aandhi tham gayi. woh man-hi-man bahot hairan the
52 kyonki rotiyon ka chamatkar dekhne ke baad bhi woh uske maayne nahin samajh sake the. unke man abhi-bhi samajhne mein mand the.
53 jab woh is paar kinare pahunche, to gannesarat aaye aur vahin paas mein naav ka langar daala.+
54 magar jaise hi woh naav se utre, logon ne yeeshu ko pehchan liya.
55 aur woh us poore ilake mein yahaan-vahaan daude gaye aur beemaron ko khaat par daalkar laate gaye aur unhein jahaan-jahaan yeeshu ke hone ki khabar mili woh unhein vahaan le gaye.
56 yeeshu jis kisi gaanv, shehar ya dehat mein jaata, log vahaan ke baazaron mein apne beemaron ko rakh dete aur usse binti karte ki woh unhein apne kapde ki jhaalar ko hi chhoo lene de.+ aur jitnon ne uski jhaalar chhui, woh sabhi theek ho gaye.
