markus ke mutabik khushkhabri 12:1-44
12 fir woh ye misalein dekar unse baat karne laga: “kisi aadmi ne angooron ka baag lagaya+ aur uske chaaron taraf ek baada baandha. usne angoor raundne ka haud khoda aur ek meenar khadi ki.+ fir use baagbanon ko theke par dekar pardes chala gaya.+
2 katai ka mausam aane par usne ek daas ko baagbanon ke paas bheja taaki woh angooron ki fasal mein se uska hissa le aaye.
3 magar baagbanon ne us daas ko pakad liya, use peeta aur khaali haath bhej diya.
4 fir baag ke maalik ne unke paas ek aur daas ko bheja. baagbanon ne uska sir fod diya aur use beizzat kiya.+
5 fir maalik ne ek aur daas ko bheja aur unhonne use maar daala. maalik ne aur bhi bahoton ko bheja, magar kuch ko unhonne peeta to kuch ko maar daala.
6 ab maalik ke paas ek hi reh gaya, uska pyara beta.+ usne aakhir mein yah sochkar use baagbanon ke paas bheja, ‘woh mere bete ki zaroor izzat kareinge.’
7 magar baagban aapas mein kehne lage, ‘yah to vaaris hai.+ chalo ise maar daalein, tab iski virasat hamari ho jaayegi.’
8 unhonne use pakad liya aur maar daala aur baag ke baahar feink diya.+
9 ab baag ka maalik kya karega? woh aakaar un baagbanon ko maar daalega aur angooron ka baag doosron ko theke par de dega.+
10 kya tumne shastra mein yah baat kabhi nahin padhi, ‘jis patthar ko raajmistriyon ne thukra diya, vahi kone ka mukhya patthar ban gaya hai’?+
11 kya tumne yah bhi nahin padha, ‘yah yahova* ki taraf se hua hai aur hamari nazar mein laajavab hai’?”+
12 yah sunkar uske dushmanon ne use pakadna* chaha kyonki woh samajh gaye ki usne yah misal unhin ko dhyan mein rakhkar di hai. lekin woh bheed se darte the, isliye woh use chhodkar chale gaye.+
13 iske baad unhonne kuch fareesiyon aur herodes ke gut ke logon ko yeeshu ke paas bheja taaki woh uski baaton mein use pakad sakein.+
14 woh uske paas aaye aur kehne lage, “guru, hum jaante hain ki tu sachcha hai aur insanon ko khush karne ki koshish nahin karta, kyonki tu kisi ki soorat dekhkar baat nahin karta balki sachchai ke mutabik parmeshvar ki raah sikhata hai. hamein bata ki samrat* ko kar dena sahi* hai ya nahin?
15 hamein kar dena chahiye ya nahin?” yeeshu unka kapat bhaanp gaya aur usne kaha, “tum meri pareeksha kyon lete ho? ek deenar* laakaar mujhe dikhao.”
16 woh ek deenar laaye. usne kaha, “is par kiski soorat aur kiske naam ki chhaap hai?” unhonne kaha, “samrat ki.”
17 tab yeeshu ne kaha, “jo samrat* ka hai woh samrat ko chukao,+ magar jo parmeshvar ka hai woh parmeshvar ko.”+ woh uska javab sunkar dang reh gaye.
18 ab sadooki uske paas aaye, jo kehte hain ki mare huon ke fir se zinda hone ki shiksha sach nahin hai.+ unhonne usse poochha,+
19 “guru, moosa ne hamare liye likha hai ki agar koi aadmi beaulad mar jaaye aur apni patni chhod jaaye, to uske bhaai ko chahiye ki woh apne mare huye bhaai ki patni se shaadi kar le aur apne bhaai ke liye aulad paida kare.+
20 saat bhaai the. pehale ne shaadi ki magar beaulad mar gaya.
21 tab doosre bhaai ne uski patni se shaadi kar li, magar woh bhi beaulad mar gaya. teesre ke saath bhi aisa hi hua.
22 saaton bhaai beaulad mar gaye. aakhir mein woh aurat bhi mar gayi.
23 ab bata, jab mare huye zinda kiye jaayenge, tab woh un saaton mein se kiski patni hogi? kyonki saaton use apni patni bana chuke the.”
24 yeeshu ne unse kaha, “tum badi galatfhami mein ho, kyonki tum na to shastra ko jaante ho, na hi parmeshvar ki shakti ko.+
25 kyonki jab mare huye zinda kiye jaayenge to unmein se na to koi aadmi shaadi karega na koi aurat, magar woh swargdooton ki tarah honge.+
26 mare huon ke zinda hone ke baare mein, kya tumne moosa ki kitab mein nahin padha ki parmeshvar ne jhaadi ke paas kya kaha tha, ‘main abraham ka parmeshvar, ishaak ka parmeshvar aur yakub ka parmeshvar hoon’?+
27 woh mare huon ka nahin balki jeeviton ka parmeshvar hai. tum badi galatfhami mein ho.”+
28 vahaan aaye shaastriyon mein se ek unki behas sun raha tha. usne yah dekhkar ki yeeshu ne unhein kya hi behtareen dhang se javab diya hai, usse poochha, “sab aagyaon mein sabse pehali* aagya kaun-si hai?”+
29 yeeshu ne javab diya, “sabse pehali* yah hai: ‘hey israel sun, hamara parmeshvar yahova* ek hi yahova* hai.
30 aur tu apne parmeshvar yahova* se apne poore dil, apni poori jaan,* apne poore dimag aur apni poori taakat se pyar karna.’+
31 aur doosri yah hai: ‘tu apne padosi se vaise hi pyar karna jaise tu khud se karta hai.’+ aur koi aagya inse badhkar nahin.”
32 tab us shaastri ne usse kaha, “guru, toone bilkul sahi kaha. teri baat sachchai ke mutabik hai, ‘parmeshvar ek hi hai, uske siva aur koi parmeshvar nahin.’+
33 aur insan ko apne poore dil se, poori samajh ke saath aur poori taakat se usse pyar karna chahiye aur apne padosi se vaise hi pyar karna chahiye jaise woh khud se karta hai. yah saari hom-baliyon aur balidanon se kahin badhkar hai.”+
34 yeeshu ne yah jaankar ki us shaastri ne badi akalamandi se javab diya hai, usse kaha, “tu parmeshvar ke raaj se zyada door nahin.” iske baad kisi ne yeeshu se aur saval poochhne ki himmat nahin ki.+
35 lekin mandir mein sikhate vakt yeeshu ne unse kaha, “shaastri kyon kehte hain ki maseeh, daavid ka sirf ek vanshaj hai?+
36 daavid ne pavitra shakti se udhaare jaane par+ khud kaha tha, ‘yahova* ne mere prabhu se kaha, “tu tab tak mere daayen haath baith, jab tak ki main tere dushmanon ko tere pairon tale na kar doon.”’+
37 jab daavid khud maseeh ko prabhu kehta hai, to fir maseeh, daavid ka vanshaj kaise ho sakta hai?”+
logon ki bheed khushi se uski sun rahi thi.
38 fir usne logon ko yah sikhaya, “shaastriyon se khabardar raho, jinhein lambe-lambe choge pehankar ghoomna aur baazaron mein logon se namaskar sunnaa achha lagta hai.+
39 unhein sabha-gharon mein sabse aage ki* jagahon par baithna aur shaam ki daavton mein sabse khaas jagah lena pasand hai.+
40 woh vidhvaon ke ghar* hadap jaate hain aur dikhave ke liye lambee-lambee prarthnayen karte hain. inhein doosron ke mukable aur bhi kadi saza milegi.”
41 fir yeeshu daan-paatron ke saamne baith gaya+ aur dekhne laga ki logon ki bheed kaise daan-paatron mein paise daal rahi hai. vahaan bahot-se ameer log dheron sikke daal rahe the.+
42 fir ek gareeb vidhva aayi aur usne do paise* daale, jinki keemat na ke barbar thi.+
43 tab yeeshu ne apne chelon ko paas bulaya aur kaha, “main tumse sach kehta hoon, yahaan jitne log daan-paatron mein paise daal rahe hain, unmein se is gareeb vidhva ne sabse zyada daala hai,+
44 kyonki woh sab apni bahotayat mein se daal rahe hain, magar isne apni tangi mein se daala hai, apne guzare ke liye jo kuch uske paas tha usne sab de diya.”+
kai footnote
^ ya “giraftar karna.”
^ yoonani mein “kaisar.”
^ ya “kaanoon ke mutabik.”
^ ati. kha14 dekhein.
^ yoonani mein “kaisar.”
^ ya “sabse badi.”
^ ya “sabse badi.”
^ ya “sabse badhiya.”
^ ya “ki jaaydad.”
^ shaa., “do leptaun” yaani ek kaudran. do leptaun ek din ki mazdoori ka 1/64vaan hissa tha. ati. kha14 dekhein.
