Oku Bafilipi 4:1-23

  • Obuguma, okugwarha obusime, amawazo makwanene (1-9)

    • Nta chintu chishibage chabalaza (6, 7)

  • Okusimiswa n’enshololo za Bafilipi (10-20)

  • Endamuso z’obuzinda (21-23)

4  Che chirhumire, mwabo bene-berhu nzigire nandi nakumbula,* busime bwani na chishema chani, muyorhe muserere mw’eyila njira ya Waliha, bazigirwa bani. 2  Mpemere Evodi na Sentike bayunvikane* mu Waliha. 3  Nechi, nkuhemere nawe woyo nka werhu mukozi w’okuli, ogenderere kurhabala abala bakazi bachihanganire* kukola nani eju y’emyazi minja, haguma na Kelema n’abandi berhu bakozi boshi, aba amazino mabo mali omu chitabu ch’akalamo. 4  Esiku zoshi mugwarhe obusime mu Waliha. Nashuba kuderha, Mugwarhe obusime! 5  Muleke abantu boshi babone oku muli bantu banayunva abandi. Waliha ali hofi. 6  Nta chintu chishibage chabalaza. Aliko omu bintu byoshi, kugerera amasala n’okulakirira Mungu, haguma n’okuderha koko, mumenyese Mungu amahuno* menyu; 7  nantyo omurhula gwa Mungu gurhalukire byoshi omuntu akagala kuyunva, gwalanga emirhima yenyu n’obuhashe bwenyu b’okuwaza* kugerera Kristu Yesu. 8  Ech’obuzinda bene-berhu, buli bintu byoshi by’obukweri, buli byoshi bihemere okulagako bwenene, buli byoshi by’okunali, buli byoshi bichere, buli byoshi bikwanene bisimwe, buli byoshi binaderhwa bwinja, buli ngeso zinja zoshi, na buli byoshi bikwanene kusingizwa; ebyola bye bintu mugendererage kuwazako. 9  Ebintu mwayigire mwanabiyemera kugerera nyono, ebi mwayunvirhe naderha, n’ebi mwabwene najira; mugenderere kubikola, na Mungu w’omurhula aba haguma nenyu. 10  Mperhe busime bunene mu Waliha okubona mwazindire eyi mwashubire kundagako. Chiro akaba oku mwanagendaga mwandagako, mwalibulire orozo l’okuyerekana oku mundagireko. 11  Ntaderhere ntyo mp’okwenge ndi omu bulagirire, bulala nayigire kutosheka chiro naba ndi omu hali zili gurhe. 12  Nyinji okuntu nakalama nka ngwerhe bintu bigeke n’okuntu nakalama nka ngwerhe bintu binene. Omu bintu byoshi n’omu hali zoshi, nayigire esiri y’okuntu nakalama amango nyugurhire, n’amango m’enzara; esiri y’okuntu nakalama amango mperhe bintu binene n’okuntu nakajira amango ntabiherhe. 13  Bulala omu bintu byoshi njira emisi kugerera olala onampa emisi. 14  Aliko mwalijirire bwinja okuntabala amango naliri omu malibuko. 15  Omu bukweri, nenyu Banyafilipi mumenyere oku amango ntenga e Makedoniya, eyi mwamamala kuyiga emyazi minja ob’oburhanzi, nta chibaga chalintabere n’ebi ndagirire olekere echibaga chenyu; 16  bulala amango naliri e Tesalonika, mwalintumire ebi nkenere arhanali liguma lyonyine si kabiri koshi. 17  Arhali k’okuderha oku ndi nalonza mumpe echintu; s’indi nalonza mupate emigisho yabalerhera nyungu zinene. 18  Chiro akaba ntyo, mperhe ebintu byoshi nkenere chiro na kulusha. Ntacho mbulire chiro, bulala napatire ebi mwahaga Epafrodito anderhere; eli mpumulo nyinja, nterekero eyemererwe, enasimisize Mungu bwenene. 19  Mungu wani naye abayunjuziza loshi-loshi ebintu byoshi mukenere, omu kukulikiza obukuuze bwage bunene kugerera Kristu Yesu. 20  Mungu werhu kandi Darha ahaabwe obukuuze esiku n’amango. Ame. 21  Mundamusize buli muchesibwa oli omu buguma na Kristu Yesu. Bene-berhu bali haguma nani nabo babalamusize. 22  Abachesibwa boshi babalamusize, aliko ahanene abanakola omu mwa Kayizari. 23  Olukogo rhurhakwanene lwa Waliha Yesu Kristu lube haguma n’omurhima muli mwayerekana.

Mahugulo m'efo

^ Ao “nadula.”
^ Chinwa oku chinwa “bagwarhe mawazo maguma.”
^ Ao “balwisize bwenene.”
^ Olole Amafasiriyo m’Ebinwa by’omu Bibliya.
^ Ao “obwenge bwenyu; amawazo menyu.”

Copyrights for this publication