Oku Bafilipi 1:1-30
1 Nyono Paulo na Timoteyo, baja ba Kristu Yesu; oku bachesibwa boshi bali omu buguma na Kristu Yesu bali omu Filipi, haguma n’abemangizi n’abagwasi b’akasi:
2 Darha Mungu na Waliha Yesu Kristu babahe olukogo rhurhakwanene n’omurhula.
3 Buli mango eyi mbayibuka nambwira Mungu koko
4 omu masala mani moshi m’okulakirira Mungu eju yenyu. Na buli kumulakirira inanjira ntyo n’obusime,
5 eju y’enshololo mwahaanire oku bilolere emyazi minja kurhangira olusiku l’oburhanzi kugera bunola.
6 Bulala echintu nchizerere che chinola: Mungu warhonderesaga akasi kenja mu mwabo, akamaliriza kugera oku lusiku lwa Kristu Yesu.
7 Kuli kwinja ku nyono okuwaza ntyo oku bibalolere mweshi, bulala muli oku murhima gwani, mwabo mwe mwashangirire nani olukogo rhurhakwanene, amango nshwekerwe n’amango ndi naderhera emyazi minja n’okuyijira eyemerwe n’oburhegesi.
8 Bulala Mungu akayemeza oku ndi nachifija bwenene okubabona mweshi, bulala mbagwerhe kw’akasisi kali kuguma n’aka Kristu Yesu abagwerheko.
9 Inandi nagenderera kusalira oku obuzigire bwenyu bugenderere kuluga bwenene, mugwarhe n’obumenyi burhali mu magosa n’obwirhegerezi buyenere;
10 munagende mwarhegera ebintu bili by’akamaro bwenene, omu kuntu muyorhe buzira shembo, murhanarhumaga abandi bagoma kugera oku lusiku lwa Kristu;
11 n’oku mukole ebijiro binene binja,* binalerhwa kugerera Yesu Kristu, byarhuma Mungu ahaabwa obukuuze n’okusingizwa.
12 Bobuno bene-berhu, kweri ndonzeze mumenye oku ebyampikire byarhabere kugendereza emyazi minja,
13 omu kuntu abalanzi boshi ba mwami we Roma n’abandi bantu boshi, bamenyere oku nashwekerwe eju ya Kristu.
14 Okushwekwa kwani kwakomeze banene mu bene-berhu mu Waliha, banali bayerekana bushiru bunene b’okuderha echinwa cha Mungu buzira buba.
15 Kweri, baguma bali bahubiri oku bilolere Kristu eyi baherhe obongwa n’okuhigizana, aliko abandi bali bajira ntyo n’omurhima gwinja.
16 Abola baherhe omurhima gwinja, bali batangaza Kristu oku buzigire eyi bamenyere oku nachagwirwe y’inderhera emyazi minja;
17 aliko bala bandi bowe bali bajira ntyo eyi baherhe obuhaka, barhanagwerhe omuhigo gwinja, bulala bali balonza banderhere ebibazo amango nshwekerwe.
18 Gurhe byajire byaba? Bibe omu bulyalya changwa omu bukweri, Kristu ali atangazwa, n’echola che chili chanderhera obusime. Kweri, nagenderera kandi kugwarha obusime,
19 bulala menyere kw’echola nji chanderhera obuchunguke kugerera amasala menyu m’okulakirira Mungu, n’oburhabale bw’eroho lya Yesu Kristu.
20 Ebyola bipatene n’ebi ndi nalinga oku nyorha nene n’obulangalire ngwerhe oku ntakozwa eshoni omu njira yoshi-yoshi, s’ahubwe oku buhuru boshi b’okuderha ngwerhe, Kristu akuuzwa zene, nk’oku anarhula akuuzwa kugerera omubiri gwani, habe kugerera olufu changwa akalamo.
21 Bulala omu hali yani, ndamire eju ya Kristu, n’okufa eli nyungu.
22 Lero akaba bimpemere okulama omu mubiri, gali matunda g’akasi kani; aliko ebi nakachishogere, ntali nabijira bimenyikane.
23 Ntenji bichi nchishogage mw’ebyola bintu byombi, bulala yinachifija okulikulwa n’okuba haguma na Kristu, n’okuderha okuli, echola ch’echintu chinja bwenene.
24 Aliko chili chintu ch’akamaro bwenene kulusha, nyorhe omu mubiri oku nyungu yenyu.
25 Bobola, omu kuba nchizerere ntyo, imenyere oku nagenderera kuyorha haguma nenyu mweshi omu kuntu mujire amajambere munagwarhe obusime omu bwemere,
26 omu kuntu muyunjulirane obusime mu Kristu Yesu eju yani amango nji nashuba kuba haguma nenyu.
27 Echi mwajira chonyine, mugwarhe olugenzi lwinja lukwanene emyazi minja elolere Kristu, omu kuntu akaba nayinja kubalola changwa akaba ntayinjire, nyunve bali baderha oku bibalolere oku muserere, muli omu buguma, mugwerhe muhigo muguma, eyi muli mwalwisa haguma eju y’obwemere bw’emyazi minja,
28 na buzira kuyubahiswa omu njira yoshi-yoshi n’abashombanyi benyu. Echola che chiyerekene oku nji baharabiswa, aliko ku mwabo nji mwachunguka; n’echola chirhengere emwa Mungu.
29 Bulala mwahaabirwe olukengo eju ya Kristu, arhali yi mugwarha obwemere muye konyine, si yi munalibuka eju yage.
30 Bulala muli mwalwisa ebibazo bili kuguma n’ebi nani naliri nalwisa, mwanayunvirhe oku kugera bunola nchigenderere kubilwisa.
Mahugulo m'efo
^ Ao “amatunda m’okunali.”
