Oku Bafilipi 2:1-30
2 Bobuno, amango moshi mwakagala kuheba abandi omurhima mu Kristu, okurhuliriza omu buzigire, okuba omu buguma bw’eroho, okuyerekana akasisi n’olukogo,
2 mujire ntyo yi munderhera obusime buyenere omu kugwarha bwenge buguma, omu kugwarha buzigire buguma, omu kuba omu buguma loshi-loshi, eyi mugwerhe ewazo liguma omu bwenge.
3 Murhajiraga echintu choshi-choshi n’obuhaka changwa omu kuchikaziza; s’oku bwirhohye, mubone abandi oku babalushire,
4 eyi murhanali mwalonza enyungu zenyu mwenyine, si n’enyungu z’abandi.
5 Mugenderere kuwaza kuguma n’okula Kristu Yesu aliri awaza,
6 chiro akaba oku aliri omu shusho lya Mungu, arhagwarhaga chiro ewazo ly’okulonza kuchihinganya* na Mungu.
7 Nanga, s’ahubwe aleka ebintu byoshi aligwerhe, arhola eshusho ly’omuja n’okuba muntu kuguma n’abandi.
8 Olekere nantyo, amango ayinja nka muntu, achirhohya n’okuba muntu onakenga kugera oku lufu, nechi, olufu oku murhi gw’amateso.*
9 Eju y’echola, Mungu amuzamwire oku cheo ch’enyanya bwenene, n’oku bwinja bwage amuha ezino lili nyanya kulusha buli zino lyoshi,
10 omu kuntu omu zino lya Yesu buli vi* lifukame; elya balala bali omu mbingu, abali oku gulu n’abali eshishi w’obudaka;
11 na buli lulimi luyemere bwinja-bwinja oku Yesu Kristu ali Waliha oku bukuuze bwa Mungu Darha.
12 Che chirhumire bazigirwa, nk’oku munarhula mukenga, arhali amango ndi haguma nenyu monyine, mujage mwakenga kulusha chiro n’amango ntaliho; mugenderere kukolera obuchunguke* bwenyu omu kuyubaha n’okudirhimana.
13 Bulala oku bulonza bwage bwinja, Mungu yeli abasisimula, anabaha enyorha n’emisi y’okukola.
14 Mugenderere kujira ebintu byoshi buzira kulunduma na buzira buhaka.
15 Omu kujira ntyo, mwaba mwerukweru na buzira gosa, bana ba Mungu barhali ku chisobe omu chizazi chibi chinakola n’amaligo, echizazi muli mwakolezamo nka matara omu gulu,
16 eyi mugenderere kufarha bwenene echinwa ch’akalamo. Nantyo, nji nagwarha empanvu y’okuchishinga oku lusiku lwa Kristu, eyi menyere oku ntachokeraga busha changwa ntakolaga n’obushiru oku busha.
17 Aliko, chiro akaba oku ndi nashukiirwa nka ntulo y’amavu mali mashukiirwa oku nterekero, inandi nakola akasi kachesibwa obwemere bwenyu bwabayerekezeko, mperhe obusime nandi nachishinga haguma nenyu mweshi.
18 Ntyo kon’okola, nenyu mukwanene kusima n’okuchishinga haguma nani.
19 Bulala nchizerere oku akaba buli bulonza bwa Waliha Yesu, nabarhumira Timoteyo juba-juba omu kuntu mpebwe omurhima hanola nyunva emyazi yenyu.
20 Bulala nta windi muntu ngwerhe ogwerhe omurhima guli nk’ogwage, wakalaga bwenene oku bimwakaba mulagirire.
21 Bulala abandi boshi bali balonza enyungu zabo, s’arhali enyungu za Kristu Yesu.
22 Aliko muyinji oku yewe yenyine ayerekene oku akwanene. Akolere nani nka mwana n’eshe, omu kujira emyazi minja egenderere.
23 Che chirhumire oyola yi mbwene nka narhuma, hanola nyusa kubona okuntu ebintu byangendera.
24 Kweri, nchizerere oku akaba buli bulonza bwa Waliha, nani nayinja hanola hofi.
25 Aliko, bunola mbwene oku bihemere ntange mbarhumire Epafrodito, mwene-werhu na werhu mukozi onali musoda wa Kristu kuguma nani, eyi mwarhumaga ankolere ebi nakaba ndagirire,
26 bulala ali abakumbula* bwenene mweshi, anagwerhe omugayo bulala mwayunvirhe oku alilwere.
27 Kweri alilwere abwira afa; aliko Mungu amuyunvira obonjo, arhanali yenyine y’ayunviraga obonjo si nani nyenyine, y’omugayo gwani gurhashuba kuyongerwa k’ogwindi.
28 Che chirhumire namurhuma juba-juba, omu kuntu hanola mumubona mushube mugwarhe obusime, n’omulago gwani gupunguke.
29 Bobola mumukaribise n’obusime bunene nk’oku munarhula mukaribisa abandi banafunzi ba Waliha, munagenderere kuyereka abantu bali kuguma naye obuzigire,
30 bulala abwiraga afa eju y’akasi ka Kristu, omu kuheba akalamo kage omu buhanya, y’ankolera ebi murhakagala kunkolera bulala murhali haguma nani.
