Oku Bafilipi 3:1-21
3 Omu kumaliriza, bene-berhu, mugenderere kuchishinga mu Waliha. Okugalukira ebi nali nabayandikire kurhambabeze, n’okujira ntyo buli bulanzi bwenyu.
2 Muchilange n’embwa; muchilange n’abanakoromesana; muchilange n’abanababaza omubiri.*
3 Rhwabo rhwe rhwakatirwe* eby’okuli, bulala rhwe rhunakola akasi kachesibwa kugerera eroho lya Mungu n’okuchitapa* mu Kristu Yesu, rhurhahira n’obulangalire bwerhu omu mubiri,
4 chiro akaba oku nyono mperhe empanvu z’okulangalira omubiri kulusha abandi boshi.
Akaba hali owindi muntu oli wawaza oku naye aherhe empanvu z’okulangalira omubiri, nyono mperhe zinene na kulusha:
5 bankataga* olusiku lwa munane, ndi Muizraeli w’omu buko bwa Benjame, ndi Muebraniya waburhwagwa n’Abaebraniya, oku bilolere amarhegeko, ndi Mufarisayo;
6 oku bilolere okugwarha omwete, naliri nalibuza echibaga; oku bilolere okunali kuyimangiire oku marhegeko, ndi muntu walichiyerekene oku arhaherhe gosa.
7 Aliko, ebintu byalimperhere enyungu, nabibwene oku bili bya busha* eju ya Kristu.
8 Echindi, kweri nambona ebintu byoshi oku bili bya busha eju y’akachiro kanene bwenene k’okumenya Kristu Yesu Nahamwerhu. Eju yage nayemerere mpeze ebintu byoshi, kandi inambibona nka chavu y’impata Kristu,
9 nambonekane oku ndi omu buguma naye, arhali kugerera okwani-kwani kunali kunalerhwa n’okukenga amarhegeko, si kugerera okunali kunalerhwa n’obwemere mu Kristu, okunali kurhengere emwa Mungu kuyimangiire oku bwemere.
10 Omuhigo gwani kuli kumumenya n’okumenya obuhashe b’obufuke bwage, okushangira amalibuko mage, n’okuyemera nfe olufu luli nk’olwage,
11 y’imbona akaba byakashobokana nani mbe omu barhanzi nji bafuka.
12 Arhali k’okuderha oku napatire olola luhembo, changwa oku nabere mushinganyanya, s’indi nagenderera kuchihangana y’imbona akaba nani nakahikira echarhumaga Kristu Yesu anchagula.
13 Bene-berhu, ntachibwene nka mira nalupataga, s’echintu nchizerere che chinola: Nayibagire ebi nalekere enyuma, ndi nachiseza oku bili embere.
14 Ndi nachihangana bwenene yi nji mpata oluhembo. Olola luhembo mpigirire kali kalamo k’omu mbingu Mungu nj’aha balala anahamagala kugerera Kristu Yesu.
15 Che chirhumire, abakulire mu rhwabo bagwarhe amawazo mali nk’amala, n’akaba mugwerhe amawazo marhali kuguma n’amala, Mungu ababishulira amawazo menja.
16 Chiro akaba rhwajirire amajambere mangana gurhe, muleke rhugenderere kulambagira bwinja mw’eyola njira yen’eyo.
17 Omu buguma, munyiganye bene-berhu, munagenderere kulola balala bali balambagira omu njira epatene n’omufano rhwabalekere.
18 Bulala hali banene naliri nazigana kuderhako; aliko zene ndi nabaderhako eyi ndi nalaka; bulala bali bachigendesa nka bashombanyi b’omurhi gw’amateso* gwa Kristu.
19 Obuzinda bwabo kuli kuharabiswa, mungu wabo eli nda yabo, obukuuze bwabo kweri zili shoni zabo, n’obwenge bwabo bunawaza oku bintu by’egulu byonyine.
20 Embingu y’emwerhu, rhunali rhwalindira na nyorha nene omuchunguzi warhenga embingu, yekala Waliha Yesu Kristu,
21 nji wahindula omubiri gwerhu gwa busha-busha, gwanaba kuguma n’omubiri gwage g’obukuuze kugerera emisi yage minene enarhuma agala kuheba ebintu byoshi eshishi zage.
