Mẹnu Wẹ Do “Sunwhlẹvu” lọ Hlan?
Kanbiọ Wehiatọ Mítọn lẹ Tọn
Mẹnu Wẹ Do “Sunwhlẹvu” lọ Hlan?
▪ Be hiẹ ko pọ́n yẹdide kavi video jiji Jesu tọn he do ahọlu kavi nuyọnẹntọ atọ̀n hia dile yé dla viyẹyẹ he ṣẹṣẹ yin jiji lọ, yèdọ Jesu pọ́n to whenue e yin titẹ́ do otò de mẹ ya? Sọgbe hẹ otàn lọ, Jiwheyẹwhe yí sunwhlẹvu de zan nado deanana yé wá kanlinpa de mẹ to Bẹtlẹhẹm. To otò delẹ mẹ, ovi lẹ tlẹ nọ plọn yinkọ ahọlu atọ̀n enẹlẹ tọn, Melchior, Gaspar, po Balthasar po do tamẹ. Ṣigba, be otàn he gbayipe enẹ sọgbe hẹ nuhe Biblu dọ na taun tọn ya? Lala. Otàn lọ ma sọgbe to aliho susu mẹ.
Tintan, mẹnu wẹ sunnu enẹlẹ yin? To Glẹki dowhenu tọn mẹ, Biblu ma ylọ yé dọ ahọlu kavi sunnu nuyọnẹntọ lẹ gba. Nujlẹtọ kavi sunwhlẹvu-pọntọ lẹ wẹ yé yin. Kosi he dọṣẹdidọ yetọn nọ sinai do lehe sunwhlẹvu lẹ nọ sọawuhia to agahomẹ do ji lẹ wẹ yé yin. Kandai Biblu tọn ma dọ yinkọ po sọha jonọ enẹlẹ po tọn.
Awetọ, whetẹnu wẹ dawe enẹlẹ dla Jesu pọ́n? E ma yin to whenue Jesu gbẹ́ yin viyẹyẹ de he yin titẹ́ do otò de mẹ gba. Nawẹ mí wagbọn do yọ́n ehe? Matiu wlan dọmọ: “To whenuena yé biọ owhé lọ gbè, yé mọ ovi pẹvi lọ po Malia onọ̀ etọn po.” (Matiu 2:11) Doayi e go dọ Jesu masọ yin viyẹyẹ de ba, ṣigba “ovi pẹvi” de. To whenẹnu, Malia po Josẹfu po masọ nọ nọ̀ kanlinpa mẹ ba; kakatimọ, yé nọ nọ̀ owhé de gbè.
Atọ̀ntọ, mẹnu wẹ do “sunwhlẹvu” enẹ hlan nado deanana sunwhlẹvu-pọntọ lọ lẹ? Sinsẹ̀ngán egbezangbe tọn lẹ nọ saba plọnmẹ dọ Jiwheyẹwhe wẹ do “sunwhlẹvu” lọ hlan. Be nugbo wẹ ya? Flindọ “sunwhlẹvu” lọ ma plan yé yì Bẹtlẹhẹm tlọlọ. Kakatimọ, e plan yé yì Ahọlu Hẹlọdi dè jẹnukọn to Jelusalẹm. Yé dọna awuwhàntọ podọ hlọnhutọ ylankan enẹ dọ Jesu yin jiji, bo tlẹ sọ na ẹn whẹwhinwhẹ́n nado gbẹwanna ovi he na wá lẹzun “ahọlu Ju lẹ tọn lọ.” (Matiu 2:2) Hẹlọdi gbọn oklọ dali biọ to yé si nado wá dọ fie ovi lọ te na emi, na emi lọsu jlo na yì litaina ẹn. Enẹgodo, “sunwhlẹvu” lọ plan yé yì Josẹfu po Malia po dè. Gbọnmọ dali, nuhe sunwhlẹvu-pọntọ lọ lẹ wà sọgan ko hẹn okú wá na ovi pẹvi lọ eyin Jiwheyẹwhe ma yí nude wà. Mí dopẹ́ dọ ewọ dádo whẹho lọ mẹ. Na sunwhlẹvu-pọntọ lọ lẹ ma wá dogbè na Hẹlọdi wutu, adi do e sọmọ bọ e degbe dọ yọpọ sunnu he tindo bẹsọn owhe awe wá odò lẹpo, to Bẹtlẹhẹm po lẹdo etọn lẹ po mẹ ni yin hùhù.—Matiu 2:16.
To nukọn mẹ, Jehovah dlẹnalọdo Jesu taidi “Visunnu ṣie, mẹyiwanna lọ, mẹhe yẹn ko kẹalọyi.” (Matiu 3:17) Pọ́n bo: Be Otọ́ owanyinọ podọ dodonọ mọnkọtọn na de sunwhlẹvu-pọntọ kosi lẹ—yèdọ mẹhe nọ tindo mahẹ to afinyọnnuwiwa he Osẹ́n etọn gbẹ́ mẹ lẹ—taidi wẹnsagun etọn lẹ wẹ ya? (Deutelonomi 18:10) Be e na yí sunwhlẹvu de do deanana yé yì hlọnhutọ ylankan hugan he tin to otò lọ mẹ dè nado yì dowẹn he na fọ́n awuwhàn po wangbẹna Hẹlọdi tọn po dote wẹ ya? Be Jiwheyẹwhe nasọ yí sunwhlẹvu po sunwhlẹvu-pọntọ lọ lẹ po zan nado do fie ovi homẹvọnọ etọn tin te hia wẹ ya?
Di apajlẹ, eyin awhàngán de do awhànfuntọ dagbe hugan etọn hlan nado yì bẹ̀ otò kẹntọ etọn tọn pọ́n, be e nasọ dọ fie awhànfuntọ enẹ na yin mimọ te na kẹntọ lọ wẹ ya? E họnwun dọ e ma na wàmọ! Mọdopolọ, Jehovah do Visunnu etọn hlan aihọn ylankan ehe mẹ. Be Ewọ na do fie Visunnu Etọn he ma tin to hihọ́ glọ te hia ahọlu kanylantọ Hẹlọdi wẹ ya? Gbede pọ́n!
To whelọnu lo, mẹnu wẹ do “sunwhlẹvu” kavi onú taidi sunwhlẹvu lọ hlan? Eyọn, mẹnu wẹ jlo dọ ovi pẹvi lọ ni yin hùhù bo gbọnmọ dali glọnalina ẹn ma nado whẹ́n podọ nado hẹn azọ́ndenamẹ etọn di to aigba ji? Mẹnu wẹ nọ dín na hẹn gbẹtọ lẹ buali bo nọ nọgodona lalo, danuwiwa, po mẹhuhu po? Jesu lọsu wẹ do ‘lalonọ podọ otọ́ lalo tọn’ he yin ‘hlọnhutọ de sọn dowhenu’ lọ hia—yèdọ Satani Lẹgba.—Johanu 8:44.
