Alokan Kavi Nuyizan Mọnkọ lẹ Gán Bẹpla Alọwle Towe
Eyin asu po asi po zan nuyizan enẹlẹ po nuyọnẹn po, e gán zọ́n bọ yé omẹ awe lẹ na vẹ́ ganji. Di apajlẹ, yé gán nọ dọho whẹwhẹ to okle lọ gblamẹ.
Amọ́, whedelẹnu asu po asi po nọ ṣì nuyizan enẹlẹ zan bọ . . .
-
yé masọ nọ mọ whenu-jọ-whenu de na yede ba.
-
yé nọ to whégbè bosọ nọ to azọ́nmẹ tọn dọ eyin e ma tlẹ yin dandan.
-
yé nọ jẹ nuvẹdo yede ji kavi yé masọ nọ nọ̀ gbèji na yede ba.
NUHE A DONA YỌNẸN
WHENU-JỌ-WHENU
Nuhe Michael dọ gando asi etọn go die: “Whedelẹnu, yẹn po asi ṣie po nọ topọ fẹẹ, amọ́ nudevo pete ji wẹ ayiha etọn nọ te. E nọ to ofẹ̀n whè do alokan mẹ bo nọ dọ dọ, ‘N’ma ko pọ́n nue yè dohlan mi lẹ dai.’” Dawe de he do asi bo nọ yin Jonathan tlẹ dọ dọ “asu po asi po gán topọ fẹẹ, amọ́ ofi voovo wẹ ayiha yetọn te.”
LẸNNUPỌNDO EHE JI: Be whẹwhẹ wẹ alokan towe nọ dọnú bo nọ do ohó mìtọn te to whenue mì to hodọ ya?—EFESUNU LẸ 5:33.
AZỌ́N
Azọ́n mẹdelẹ tọn nọ zọ́n bọ whedepopenu wẹ mẹlẹ gán ylọ yé kavi kannu hlan yé. Amọ́, azọ́n mẹdelẹ tọn ma to mọ, ganṣo yé nọ to whégbè bo gbẹ́ nọ to azọ́nmẹ tọn dọ. Dawe de he do asi bo nọ yin Lee dọ dọ “Eyin n’tlẹ bayi tito nado yí whenu zan hẹ asi ṣie, e nọ vẹawuna mi ma nado pọ́n mẹhe to yiylọ kavi to nukan hlan mi na azọ́n wutu.” Joy he yin whési de dọmọ: “Owhé ṣie gbè wẹ sọ yin azọ́n ṣie mẹ, enẹ wẹ zọ́n bọ e do nọ vẹawuna mi nado do azọ́n te. Ogán wẹ n’dona do nado jo azọ́n do otẹn etọn mẹ.”
LẸNNUPỌNDO EHE JI: Be a nọ kẹ̀tó to whenue asu towe kavi asi towe to hodọna we ya?—LUKU 8:18.
GBÈJININỌ
Asu po asi po delẹ dọ dọ emi nọ dọjlẹ, na nuhe dopo to yé mẹ zedo Intẹnẹt ji nọ zọ́n bọ omẹ diẹ nọ vẹnudo e. Mẹdelẹ tlẹ dọ dọ emi nọ ze nudelẹ do Intẹnẹt ji bọ awetọ emitọn ma hà bo mọ.
Enẹ gàn-an wẹ zọ́n bọ mẹsusu do nọ dọ dọ Intẹnẹt to whẹndo lẹ tlọ bo tlẹ sọ nọ zọ́n bọ mẹdelẹ nọ deayọ. Abajọ whẹyidọtọ lẹ lọsu dohia dọ Intẹnẹt wẹ to whẹndo lẹ gbà hugan to egbé.
LẸNNUPỌNDO EHE JI: Be nudelẹ tin he a nọ dọ hẹ sunnu kavi yọnnu devo bọ asu kavi asi towe ma hà bo sè ya?—HOWHINWHẸN LẸ 4:23.
NUHE A GÁN WÀ
MA YÍ ALỌWLE TOWE DO DAIHUN BLO
Be mẹhe nọ dovọ́na ede bo ma nọ dùnú gán nọ gángán ya? Mọdopolọ, mẹhe nọ dovọ́na alọwle etọn bo ma nọ yí whenu zan hẹ asu kavi asi etọn to alọwle etọn tlọ.—Efesunu lẹ 5:28, 29.
AYINAMẸ BIBLU TỌN: “Mọdona nuhe yin nujọnu hugan lẹ.”—FILIPINU LẸ 1:10.
Na alokan nikaa hẹn nuhahun wá alọwle towe mẹ, de ayinamẹ he a jlo na hodo lẹ kavi kàn dehe hiẹ lọsu lẹn bo dọhodeji hẹ asu kavi asi towe.
-
Nado dù núdùdù de dopọ to azán dopodopo ji
-
Nado nọ de ojlẹ delẹ he mẹ mẹde ma na sẹpọ alokan kavi nuyizan mọnkọ lẹ
-
Nado nọ de ojlẹ taun-taun delẹ bo wanu dopọ
-
Nado nọ ṣí alokan kavi nuyizan mọnkọ lẹ whẹpo do yihọ bo ma nọ dike yé ni nọ ozàn mítọn pá
-
Nado nọ dọhodopọ na nukunwhiwhe 15 egbesọegbesọ bọ alokan kavi onú mọnkọ de ma na to apá
-
Nado do gànmẹ de he mẹ yè na nọ ṣí Intẹnẹt to azán dopodopo gbè
A Gán Sọ Pọ́n Hosọ Ehelẹ
ALỌWLE & WHẸNDO
Nuyizan Nuyọnẹn Wintinwintin Tọn lẹ Zizedo Otẹn He Jẹ Mẹ
Nuyizan nuyọnẹn wintinwintin tọn lẹ sọgan wà dagbe na alọwle towe kavi hẹnnugble to alọwle towe mẹ. Nawẹ nuyizan mọnkọ lẹ to nuyiwa do alọwle towe ji gbọn?
ALỌWLE & WHẸNDO
Yọ́n Whenu Azọ́n Tọn Dovo Na Nudevo Lẹ
Ayinamẹ atọ́n delẹ he gán gọalọna we ma nado dike azọ́n ni yitẹn to alọwle towe si.
