1-3. (a) To baptẹm mítọn godo, diọdo tẹlẹ wẹ sọgan gbẹ́ nọ vẹawuna mí nado basi? (b) To whenue vọjlado lẹ bibasi vẹawuna mí hú lehe mí lẹn do, kanbiọ tẹlẹ wẹ mí sọgan nọ kanse? (Pọ́n yẹdide he tin to bẹjẹeji hosọ ehe tọn lẹ.)

TO WHENUE Kevin ^[1] plọn nugbo lọ, nudevo de masọ jlo e hugan nado tindo haṣinṣan pẹkipẹki de hẹ Jehovah. Ṣigba na owhe susu, e ko hòakọ, nù-azọ̀, nùahànmú, bosọ ṣì amasin adínọ zan. Nado sọgan mọ nukundagbe Jiwheyẹwhe tọn, Kevin dona jo walọ enẹlẹ he ma sọgbe hẹ Owe-wiwe lẹ do. Ewọ wàmọ gbọn jidide do Jehovah po huhlọn he Ohó Etọn tindo nado diọmẹ po go dali.—Heb. 4:12.

² To whenue Kevin yí baptẹm godo, be ewọ doalọtena diọdo lẹ bibasi to gbẹzan etọn mẹ wẹ ya? Lala, na ewọ gbẹ́ dona dovivẹnu nado wleawuna jẹhẹnu Klistiani tọn lẹ bosọ hẹn yé pọnte dogọ wutu. (Efe. 4:31, 32) Di apajlẹ, e paṣa ẹ nado mọdọ emi gbẹ́ nọ yawu gblehomẹ. Kevin yigbe dọmọ: “Na nugbo tọn, pinplọn ma nado nọ yawu gblehomẹ vẹawuna mi hugan walọ ylankan hoho  ṣie lẹ jijodo!” Dẹ̀hiho vẹkuvẹku po nupinplọn sisosiso do Biblu ji po gọalọna Kevin nado basi diọdo he jẹ lẹ.

³ Taidi Kevin, susu mítọn wẹ basi diọdo ayidego tọn lẹ nado sọgan hẹn gbẹzan mítọn sọgbe hẹ nubiọtomẹsi dodonu tọn Biblu tọn lẹ whẹpo do yí baptẹm. To baptẹm godo, mí doayi e go dọ mí dona zindonukọn nado to diọdo lẹ basi—yèdọ diọdo he mẹdevo lẹ ma nọ yawu doayi e go lẹ—nado hodo apajlẹ Jiwheyẹwhe po Klisti po tọn dogọ. (Efe. 5:1, 2; 1 Pita 2:21) Di apajlẹ, mí sọgan ko doayi e go dọ mí nọ mọhodọdo núgo, nọ dibuna gbẹtọ, nọ dọmẹnu kavi tindo madogán mọnkọtọn devo lẹ. Be vọjlado bibasi to adà ehelẹ mẹ vẹawuna mí hú lehe mí lẹn do wẹ ya? Ehe sọgan zọ́n bọ a na nọ kanse dewe dọ, ‘To whenuena e yindọ n’ko basi diọdo ayidego tọn lẹ, naegbọn e do vẹawuna mi sọmọ nado basi diọdo he ma sinyẹn sọ enẹlẹ? Nawẹ n’sọgan na dotẹnmẹ Biblu dogọ nado diọ gbẹzan ṣie gbọn?’

4. Naegbọn mí ma nọ penugo nado hẹn homẹ Jehovah tọn hùn to whepoponu?

⁴ Míwlẹ he ko wá yọ́n Jehovah bo yiwanna ẹn lẹ jlo po ahun lẹpo po nado wà nuhe nọ hẹn homẹ etọn hùn. Mahopọnna obá he mẹ ojlo enẹ sọgan sinyẹn jẹ, mapenọ-yinyin mítọn nọ zọ́n bọ mí ma nọ penugo nado hẹn homẹ Jiwheyẹwhe tọn hùn to whepoponu. Mí nọ tindo numọtolanmẹ apọsteli Paulu tọn nkọ, mẹhe wlan dọmọ: “Nugopipe nado jlo tin to yẹn mẹ, ṣigba nugopipe nado wà nuhe yin dagbe ma tin.”—Lom. 7:18; Jak. 3:2.

5. Diọdo tẹlẹ wẹ mí basi whẹpo do yí baptẹm, ṣigba madogán tẹlẹ wẹ mí sọgan gbẹ́ nọ diahi hẹ?

⁵ Mí ko jo walọ ylankan he na zọ́n bọ mí ma na pegan taidi hagbẹ agun Klistiani tọn lẹ do. (1 Kọl. 6:9, 10) Etomọṣo, mí gbẹ́ yin mapenọ. (Kol. 3:9, 10) Enẹwutu, e ma sọgbe hẹ lẹnpọn dagbe nado donukun dọ to baptẹm godo—kavi etlẹ yin to owhe susu he mí ko basi to nugbo mẹ lẹ godo—mí ma nasọ ṣinuwa, dahli, kavi dọ mẹwhinwhàn po ayilinlẹn ylankan lẹ po ma nasọ dotukla mí ba gba. Ayilinlẹn delẹ sọgan gbọṣi aimẹ na owhe susu.

6, 7. (a) Etẹwẹ nọ hẹn ẹn yọnbasi na mí nado yin họntọn Jehovah tọn lẹ mahopọnna mapenọ-yinyin mítọn? (b) Naegbọn mí ma dona whleawu nado biọ jonamẹ Jehovah tọn?

⁶ Mape he mí dugu etọn ma dona glọnalina mí nado duvivi họntọnjiji hẹ Jehovah tọn kavi nado to sinsẹ̀n ẹn zọnmii. Lẹnnupọndo nugbo ehe ji: To whenue Jehovah dọ̀n mí biọ haṣinṣan de mẹ hẹ ewọ, e yọnẹn dọ mí na ṣinuwa to whedelẹnu. (Joh. 6:44) E họnwun dọ Jiwheyẹwhe yọ́n ayilinlẹn mape tọn he nkọ na dotukla mí taun lẹ, na ewọ yọ́n gbẹtọ-yinyin mítọn po nuhe to ahun mítọn mẹ po wutu. Dile etlẹ yindọ Jehovah yọnẹn dọ mí na ṣì afọ ze to whedelẹnu, ehe ma glọnalina ẹn nado jlo dọ mí ni yin họntọn etọn lẹ.

⁷ Owanyi wẹ whàn Jiwheyẹwhe nado na mí nunina họakuẹ de, yèdọ avọ́sinsan ofligọ Visunnu yiwanna etọn tọn. (Joh. 3:16) Eyin mí lẹnvọjọ bo dín jonamẹ Jehovah tọn to dodonu awuwledainanu họakuẹ ehe tọn ji to whenue mí ṣinuwa, mí sọgan deji dọ họntọnjiji mítọn hẹ ewọ ma na gble. (Lom. 7:24, 25; 1 Joh. 2:1, 2) Be mí dona whleawu nado mọaleyi sọn ofligọ lọ mẹ, na mí tindo numọtolanmẹ lọ dọ mí yin mawénọ kavi ylandonọ wutu wẹ ya? Paali! Mọwiwà na taidi gbigbẹ́ nado yí osin do klọ́ alọ mítọn lẹ to whenue yé kudiho. To popolẹpo mẹ, ofligọ lọ yin awuwlena na ylanwatọ he lẹnvọjọ lẹ. Gbọn ofligọ lọ gblamẹ, mí sọgan duvivi họntọnjiji hẹ Jehovah tọn mahopọnna mapenọ-yinyin mítọn.—Hia 1 Timoti 1:15.

8. Naegbọn mí ma dona nọ miọnnukundo madogán mítọn lẹ?

⁸ Na nugbo tọn, mí ma nọ miọnnukundo madogán mítọn lẹ domọ poun gba. Họntọnjiji mítọn hẹ Jehovah nọ biọ dọ mí ni  dovivẹnu nado hodo apajlẹ Jiwheyẹwhe po Klisti po tọn pẹkipẹki dogọ bo yin gbẹtọ wunmẹ he yé jlo dọ mí ni yin. (Salm. 15:1-5) E sọ nọ biọ dọ mí ni dovivẹnu nado duto ayilinlẹn mape tọn mítọn lẹ ji, bo tlẹ sukúndona yé eyin e yọnbasi. Vlavo mí yí baptẹm e ma dẹn kavi ko to nugbo lọ mẹ na owhe susu, mí dona “zindonukọn . . . nado nọ basi vọjlado.”—2 Kọl. 13:11.

9. Nawẹ mí wagbọn do yọnẹn dọ mí sọgan zindonukọn nado nọ ze gbẹtọ-yinyin yọyọ lọ do?

⁹ Vivẹnudido madoalọte yin nujọnu “nado nọ basi vọjlado” podọ nado nọ do “gbẹtọ-yinyin yọyọ” lọ hia. Paulu flinnu yisenọ hatọ lẹ dọmọ: “Mì ko yin pinplọn nado klọ́n gbẹtọ-yinyin hoho lọ dai, ehe to kọndopọ mẹ hẹ aliho gbẹzan dai tọn mìtọn podọ ehe to yinyin hinhẹn gblezọn sọgbe hẹ ojlo oklọ tọn etọn lẹ. Podọ mì dona nọ to huhlọn mẹwhinwhàn apọ̀nmẹ tọn mìtọn hẹn jẹ yọyọ, bo dona ze gbẹtọ-yinyin yọyọ lọ do, ehe yin didá sọgbe hẹ ojlo Jiwheyẹwhe tọn to dodowiwa nugbo po nugbonọ-yinyin po mẹ.” (Efe. 4:22-24) Hodidọ lọ ‘nọ hẹn jẹ yọyọ’ dohia dọ gbẹtọ-yinyin yọyọ lọ zizedo yin nuwiwa madoalọte tọn. Ehe yin tulinamẹnu, na e na mí jide dọ mahopọnna lehe e ko dẹn sọ bọ mí to Jehovah sẹ̀n, mí gbẹ́ sọgan to nukọnyiyi basi to awuwiwlena jẹhẹnu Klistiani tọn he nọ do gbẹtọ-yinyin yọyọ lọ hia lẹ mẹ podọ to jẹhẹnu enẹlẹ hinhẹn pọnte dogọ mẹ. Mọwẹ, Biblu sọgan zindonukọn nado to gbẹzan mítọn diọ.

10. Etẹwẹ mí dona wà na Biblu nido to mí diọ zọnmii, podọ kanbiọ tẹlẹ wẹ mí sọgan nọ kanse?

¹⁰ Eyin mí jlo dọ Ohó Jiwheyẹwhe tọn ni nọ to didiọ mí zọnmii, mí dona nọ dovivẹnu. Ṣigba, naegbọn e do biọ vivẹnudido vẹkuvẹku to mí si? Eyin Jehovah to didona vivẹnudido mítọn lẹ, naegbọn diọdo lẹ bibasi do nọ vẹawu sọmọ? Be Jehovah ma sọgan de ayilinlẹn ylankan mítọn lẹ sẹ̀ poun bọ mí na penugo bo wleawuna jẹhẹnu jijọ-di-Jiwheyẹwhe tọn lẹ matin vivẹnudido susu wẹ ya?

11-13. Naegbọn Jehovah nọ donukun dọ mílọsu ni dovivẹnu nado duto madogán mítọn lẹ ji?

¹¹ Eyin mí lẹnnupọndo wẹkẹ yinukundomọ lọ ji, mí nọ mọdọ Jehovah tindo huhlọn taun. Di apajlẹ, to nukunwhiwhe (seconde) dopodopo mẹ, owhè nọ diọ tọnu livi atọ́n nugonu etọn lẹ tọn zun huhlọn. Dile etlẹ yindọ vude poun to huhlọn enẹ mẹ wẹ nọ gbọn globu mítọn ji, huhlọn enẹ nọ na yozò po hinhọ́n he pemẹnu po nado hẹn ogbẹ̀ dote to aigba ji. (Salm. 74:16; Isa. 40:26) Homẹ Jehovah tọn nọ hùn nado na devizọnwatọ aigba ji tọn etọn lẹ huhlọn he jẹ to whenue e biọ domọ. (Isa. 40:29) Mọwẹ, Jiwheyẹwhe tlẹ sọgan na mí huhlọn nado duto madogán lẹpo ji bọ e ma na biọ dọ mí ni nọ diahi hẹ nuṣiwa mítọn lẹ kavi plọnnu sọn yé mẹ. Ṣigba, naegbọn e ma nọ wàmọ?

¹² Jehovah na mí nunina he nkọ ma pé awe de, enẹ wẹ mẹdekannujẹ nudide bibasi tọn. Eyin mí de nado wà ojlo Jiwheyẹwhe tọn bosọ dovivẹnu vẹkuvẹku nado wàmọ, mí nọ dohia Jehovah obá he mẹ mí yiwanna ẹn bo jlo na hẹn homẹ etọn hùn jẹ. Humọ, enẹ nọ dohia dọ mí to godonọna nupojipetọ-yinyin etọn. Na Satani diọnukunsọ jlọjẹ Jehovah tọn taidi nupojipetọ wutu, ayihaawe ma tin dọ vivẹnu vẹkuvẹku he mí nọ do sọn ojlo mẹ wá nado nọgodona nupojipetọ-yinyin etọn nọ họakuẹ taun na Otọ́ olọn mẹ tọn mítọn he yin mẹtọnhopọntọ podọ pinpẹn-nutọn-yọnẹntọ. (Jobu 2:3-5; Howh. 27:11) Etomọṣo, eyin Jehovah ma dike bọ mílọsu dovivẹnu bo hoavùn sọta ayilinlẹn mape tọn mítọn lẹ jẹ obá de mẹ nado sọgan hẹn homẹ etọn hùn, alọsọakọ́n mítọn nado yin nugbonọ podọ nado nọgodona nupojipetọ-yinyin etọn ma na tindo zẹẹmẹ depope.

¹³ Enẹwutu, Jehovah nọ biọ dọ mí ni “dovivẹnu vẹkuvẹku” nado wleawuna jẹhẹnu jijọ-di-Jiwheyẹwhe tọn lẹ.  (Hia 2 Pita 1:5-7; Kol. 3:12) E nọ donukun dọ mí ni wazọ́n sinsinyẹn nado duto linlẹn po numọtolanmẹ mítọn lẹ po ji. (Lom. 8:5; 12:9) To whenue mí dovivẹnu vẹkuvẹku domọ bo mọdọ Biblu to gbẹzan mítọn diọ, homẹ mítọn nọ hùn.

14, 15. Etẹwẹ mí sọgan wà nado wleawuna jẹhẹnu he Jehovah yiwanna lẹ? (Pọ́n apotin lọ “ Biblu po Odẹ̀ po Diọ Gbẹzan Yetọn.”)

¹⁴ Etẹwẹ mí sọgan wà nado wleawuna jẹhẹnu jijọ-di-Jiwheyẹwhe tọn lẹ bo hẹn homẹ Jehovah tọn hùn? Mí dona wà nususu hú tito diọdo tọn mẹdetiti tọn de hihodo. Mí dona gbẹ́ to vivẹnudo bo to anademẹ Jiwheyẹwhe tọn lẹ hodo, na Lomunu lẹ 12:2 dọmọ: “Mì hodo titonu ehe ba blo, ṣigba mì yin adàdiọna gbọn ayiha mìtọn didiọ dali, na mì nido sọgan mọdona ojlo Jiwheyẹwhe tọn he yọ́n, bo yin alọkẹyi bosọ yin pipé lọ.” Jehovah nọ yí Ohó etọn po gbigbọ wiwe etọn po zan nado gọalọna mí na mí nido nọ doayi ojlo etọn go, bo nọ wà ẹ, bosọ nọ diọ gbẹzan mítọn dile e jẹ do nado jẹ nubiọtomẹsi etọn lẹ kọ̀n. Vivẹnudido mítọn lẹ dona nọ bẹ nuwiwa delẹ hẹn taidi Biblu hihia, ayihamẹlinlẹnpọn do Owe-wiwe lẹ ji, podọ dẹ̀hiho nado biọ gbigbọ wiwe. (Luku 11:13; Gal. 5:22, 23) To whenue mí jo míde do na anademẹ gbigbọ wiwe Jehovah tọn bo hẹn linlẹn mítọn lẹ sọgbe hẹ etọn lẹ dile e yin didehia to Ohó etọn mẹ do, linlẹn, hogbe po nuyiwa mítọn lẹ po nọ taidi Jiwheyẹwhe tọn dogọ. Etomọṣo, mí dona nọ nọ̀ aṣeji gando madogán mítọn lẹ go, na yé nikaa ze mí jai.—Howh. 4:23.

¹⁵ Gbọnvona Biblu hihia egbesọegbesọ, mí dona nọ yí owe Klistiani tọn mítọn lẹ zan nado plọn Ohó Jiwheyẹwhe tọn po yanwle lọ po nado do jẹhẹnu dagbedagbe Jehovah tọn lẹ hia. Mẹdelẹ ko mọdọ nudagbe wẹ e yin nado de wefọ, Atọ̀họ̀-Nuhihọ́ lọ Tọn po Réveillez-vous! delẹ po jẹnukọn, yèdọ dehe sọgan gọalọna yé taun nado wleawuna jẹhẹnu Klistiani tọn lẹ kavi nado duto madogán tangan delẹ ji podọ nado nọ gbadopọnna yé sọn ojlẹ de mẹ jẹ devo mẹ.

16. Naegbọn mí ma dona gbọjọ eyin nukọnyiyi gbigbọmẹ tọn mítọn to dindẹn to nukun mítọn mẹ?

¹⁶ Eyin a nọ mọdọ nukọnyiyi gbigbọmẹ tọn towe to dindẹn, flindọ whinwhẹ́n mọnkọtọn nọ yí whenu. Awuwiwlena jẹhẹnu gbigbọmẹ tọn lẹ yin nuwiwa madoalọte tọn. Mí dona nọ fahomẹ dile mí to dotẹnmẹ na Biblu nado to gbẹzan mítọn diọ. To bẹjẹeji, e sọgan biọ dọ mí ni nọ domẹplọnlọ míde go nado wà nuhe sọgbe hẹ Owe-wiwe lẹ. Ṣigba, dile ojlẹ to yìyì bọ linlẹn po nuyiwa mítọn lẹ po to gbesọ hẹ linlẹn po nuyiwa Jehovah Jiwheyẹwhe tọn lẹ po, e yọnbasi dọ to jọwamọ-liho mí na penugo nado nọ lẹnnupọn bosọ nọ yinuwa to kọndopọ mẹ hẹ nuhe Jiwheyẹwhe yiwanna.—Salm. 37:31; Howh. 23:12; Gal. 5:16, 17.

17. Eyin mí yin nugbonọ na Jehovah, sọgodo jiawu tẹwẹ mí sọgan donukun?

¹⁷ To nukọn mẹ, sinsẹ̀n-basitọ nugbonọ Jehovah tọn lẹ na tindo lẹblanulọkẹyi lọ nado sẹ̀n ewọ kakadoi to pipé mẹ. To ojlẹ enẹ mẹ, e ma nasọ vẹawuna mí nado nọ do jẹhẹnu jijọ-di-Jiwheyẹwhe tọn lẹ hia ba, kakatimọ mí na nọ mọ awuvivi susu to ehe wiwà mẹ to whepoponu. Todin whẹ́, ofligọ lọ hùn dotẹnmẹ dote na mí nado sẹ̀n Jiwheyẹwhe owanyinọ mítọn. Dile etlẹ yindọ mí yin mapenọ, mí sọgan to ewọ sẹ̀n eyin mí nọ jo míde do na huhlọn he Ohó etọn tindo nado to mí diọ zọnmii.

18, 19. Etẹwẹ na hẹn mí kudeji dọ Biblu tindo huhlọn nado to gbẹzan mítọn diọ?

¹⁸ Kevin he go mí donù to bẹjẹeji wazọ́n sinsinyẹn nado duto homẹgble aplà etọn ji. E nọ lẹnayihamẹpọn do nunọwhinnusẹ́n Biblu tọn lẹ ji bosọ nọ yí yé do yizan mẹ, podọ e kẹalọyi alọgọ po ayinamẹ Klistiani hatọ lẹ tọn po. To owhe delẹ godo, Kevin basi diọdo ayidego tọn. To nukọn mẹ, e wá pegan bo yin pipà taidi devizọnwatọ lizọnyizọnwiwa tọn, podọ sọn owhe 20 die, e to sinsẹ̀n taidi mẹho agun tọn. Etomọṣo, e mọdọ emi dona nọ nọ̀ aṣeji ma nado lẹkọyi nuṣiwa emitọn lẹ kọ̀n.

¹⁹ Numimọ Kevin tọn dohia dọ Biblu nọ gọalọna omẹ Jiwheyẹwhe tọn lẹ nado to diọdo lẹ basi zọnmii. Enẹwutu, mì gbọ mí ni magbe nado to dotẹnmẹ na Ohó Jiwheyẹwhe tọn nado to didiọ mí bo to haṣinṣan mítọn hẹ Jehovah hẹn pọnte dogọ. (Salm. 25:14) Dile mí mọ bọ Jehovah to didona vivẹnudido mítọn lẹ, mí na kudeji dọ Biblu sọgan to gbẹzan mítọn diọ zọnmii.—Salm. 34:8.