Howhinwhẹn lẹ 27:1-27
27 A doawagun gando osọ he ja go blo,Na hiẹ ma yọ́n nuhe azán dopodopo na hẹnwa.*+
2 Gbọ mẹdevo* ni pà we, kakati nido yin onù towe titi;Mẹdevo lẹ* ni pà we, kakati nido yin nùflo towe titi lẹ.+
3 Zannu nọ pẹ̀n podọ tọkẹ́n nọ pẹnzin,Ṣigba, adi he nulunọ nọ do homẹ namẹ nọ pẹnzin hú onú awe ehelẹ.+
4 Adi nọ dekọtọn do kanyinylan mẹ podọ homẹgble nọ taidi singigọ de,Ṣigba, mẹnu wẹ sọgan nọte to awuwhàn nukọn?+
5 Wọhẹmẹ to gbangba pọnte hú owanyi he yin zizewhla.+
6 Awugblenamẹ họntọn de tọn lẹ nọ yin po nugbonọ-yinyin po,+Ṣigba, nùdonùgonamẹ kẹntọ de tọn lẹ nọ sù taun.*
7 Mẹhe* ko dùnú gọ́ho nọ gbẹ́* owín he wá sọn owínjá mẹ dai,Ṣigba, na mẹhe* huvẹ to hùhù, nuhe tlẹ vẹ́ nọ vivi to onù etọn mẹ.
8 Kẹdẹdi ohẹ̀ he danbú* sọn adọ́ etọn mẹ,Mọ wẹ mẹhe danbú sọn owhé etọn gbè nọ te do.
9 Amì po nuyọnwan po nọ hẹnmẹ jaya;Mọdopolọ wẹ họntọnjiji dagbe he sinai do ayinamẹ ahundopo tọn* ji nọ wà do.+
10 A gbẹ́ họntọn towe kavi họntọn otọ́ towe tọn dai blo,Podọ a biọ owhé nọvisunnu towe titi tọn gbè to azán he gbè nugbajẹmẹji wá ji we blo;Kọmẹnu he tin to yakẹ pọnte hú nọvisunnu he tin to fidindẹn.+
11 Visunnu ṣie, yin nuyọnẹntọ bo hẹn homẹ ṣie hùn,+Na yẹn nido gblọnhona ewọ he to vivlẹ mi kò.+
12 Zinzintọ nọ mọ oylan hlan bo nọ whlá ede,+Ṣigba, wunvinọ nọ dlí biọ e mẹ bo nọ jiya kọdetọn* etọn lẹ tọn.
13 Eyin mẹde ko yí ede do basi alọyitọ na jonọ de, yí awù etọn;Eyin yọnnu jonọ* de wẹ e yí ede do basi alọyitọ na, hò afàsúnú lọ yí sọn e si.+
14 Eyin mẹde yí ogbè lélé do dona hatọ etọn to afọnnu fuu,E na yin pinpọnhlan di dẹ̀hodo.
15 Asi whẹgbènọ* taidi họta he nọ to osin kùn mapote to whenue jikun to jijà.+
16 Mẹdepope he penugo nado dava ẹ sọgan dava jẹhọnBosọ sọgan yí adusilọ etọn do wle amì hẹn.
17 Kẹdẹdile ogàn nọ gàn ogàn do,Mọ wẹ mẹde nọ gàn họntọn etọn* do niyẹn.+
18 Mẹhe nọ penukundo ovòtin go na dù sinsẹ́n etọn,+Podọ mẹhe nọ penukundo ogán etọn go na yin gbégbòna.+
19 Dile nukunmẹ mẹtọn nọ yin didehia to osin nukunmẹ do,Mọ wẹ ahun mẹde tọn nọ de mẹdevo tọn hia do.
20 Yọdò po otẹn vasudo tọn po* ma nọ tindo pekọ gbede,+Mọjanwẹ nukun gbẹtọ tọn ma nọ tindo pekọ gbede do niyẹn.
21 Kẹdẹdile ozẹ́n gànkinkọ̀n tọn tin na fataka bọ zòhọ tin na sika do,+Mọdopolọ wẹ pipà he mẹde mọyi nọ whlé gbẹtọ-yinyin etọn pọ́n do.*
22 Eyin hiẹ tlẹ yí odóvi do tùn nulunọTaidi jinukun tùntùn to odó de mẹ,Nulú etọn ma na wayi.
23 Hiẹ dona yọ́n ninọmẹ lẹngbọpa towe tọn ganji.
Nọ penukundo* lẹngbọ towe lẹ go ganji,+
24 Na adọkun ma nọ gbọṣi aimẹ kakadoi,+Mọjanwẹ jẹgbakun de ma nọ gbọṣi aimẹ sọn whẹndo de mẹ jẹ devo mẹ kakadoi do niyẹn.
25 Ogbé-mú nọ busẹ bọ ogbé devo nọ wú,Amà osó lẹ ji tọn sọ nọ yin bibẹpli.
26 Ofún agbò winyanwinyan lẹ tọn wẹ yè do nọ wleawuna avọ̀ towe,Podọ akuẹ he yin mimọ sọn gbọgbọẹ asu lẹ mẹ sọgan yin yíyí do họ̀ ogle.
27 Anọ́sin gbọgbọẹ tọn nasọ sù sọmọ nado na we núdùdù,Podọ nado na núdùdù whédo towe bo hẹn pekọ wá na deviyọnnu towe lẹ.
Nudọnamẹ Odò Tọn
^ To paa mẹ, “na ji.”
^ To paa mẹ, “jonọ.”
^ To paa mẹ, “Jonọ.”
^ Kavi vlavo, “ma nọ yì homẹ; nọ yin mananọmawà tọn.”
^ Kavi “Alindọn he.”
^ Kavi “tùnafọ.”
^ Kavi “alindọn he.”
^ Kavi “họnyi.”
^ Kavi “ayinamẹ alindọn tọn.”
^ Kavi “yasanamẹ.”
^ Kavi “Eyin jonọ.”
^ Kavi “nutlọtọ.”
^ To paa mẹ, “nukunmẹ họntọn etọn tọn.”
^ Kavi “Ṣeol po Abadọni po.”
^ Kavi “Mọ wẹ mẹde nọ te sọgbe hẹ pipà etọn.”
^ Kavi “ze ayiha towe do; na ayidonugo.”
