Naayinɛ Tari La Yu’ura Balɛ?

ŊMƐ

Baabule la lebesego

Naayinɛ tari la yumɛŋerɛ deyima ma’a. Ba gulesɛ yu’urɛ la יהוה Hebru yetɔɣum poan ge me ni lerege dɛ “Jehovah” Solemiine yetɔɣum poan. a Naayinɛ yuun tɔɣɛ bo nɔdɛ’ɛsa Isaiah yeti: ‘Mam dela Yehowa. Mam yu’urɛ n bala.’ (Isaiah 42:8) Diimi Baabule la poan, Naayinɛ yu’urɛ paɛ wuu 7,000. Naayinɛ yu’urɛ la boi Baabule zɛ’ɛsi zo’e zo’e gana Naayinɛ na’asegɔ yu’urɛ sɛka mɛ la nɛresɛka yu’urɛ. b

Yehowa tari yu’ura ase’a pa’asɛ mɛ?

Baabule la yeti Naayinɛ tari la yumɛŋerɛ ayina ma’a ge la pa’alɛ ti a tari la na’asegɔ yu’ura zo’e zo’e. Naayinɛ yu’ura n boi tiŋanɔɔrɛ wa pa’alɛ la Yehowa n ani se’em bii a hala n ani se’em.

Na’asegɔ Yu’urɛ	Baabule Gulesegɔ	Vuurɛ
Allah	(La ka boi)	Arabic yelebire la n de “Allah” la daɣɛ yumɛŋerɛ ge la dela na’asegɔ yu’urɛ ti la vuurɛ dɛna “Naayinɛ.” Baabule la ti ba lerege ka Arabic la yetɔɣum ase’a poan la, ni lerege “Naayinɛ” ti “Allah.”
Gaŋɛ Za’adaana	Pin’ileŋɔ 17:1	Tari la paŋa n ka tari makerɛ. Hebru yelebɛa la n de ʼEl Shad·daiʹ vuurɛ dela “Gaŋɛ Za’a Naayinɛ.” Na’asegɔ yu’urɛ wa boi Baabule la poan la sugumnɔɔrɛ buyopɔi.
Alpha la Omega la	Liligere 1:8; 21:6; 22:13	‘Pɔsega la ba’asegɔ’ bii ‘pi’ileŋo la ki’ileŋɔ’ ti la pa’alɛ ti Gaŋɛ Za’a Naayinɛ ka boi n deŋɛ Yehowa, se’em me ka boi n taɣelɛ a poore. (Isaiah 43:10) Alpha la omega dela Greek yia la ba’asegɔ kɔɔsi.
Diima Diima Sa Daana	Daniel 7:9, 13, 22	Yehowa ka tari pɔsega; a kɔ’ɔn bɔna me na ge ti nɛresɛka bii sɛla deene nyaa bɔna.—Yooma 90:2.
Naaŋɔdaana	Isaiah 40:28	Eŋa n naam sɛla woo.
Sɔ	Matu 6:9	Vom bɔ’adaana.
Naayinɛ	Pin’ileŋɔ 1:1	Sɛla ti ho pu’usa ge ti ka sũ paŋa. Hebru yelebire la n de ʼElo·himʹ la pa’alɛ la Yehowa na’asegɔ, gilema bii a soŋa.
Yinedoma Naayinɛ	Tɛɛnhegɔ 10:17	Gaŋɛ za’a Naayinɛ la gani “baga” yooro la ti nɛreba basɛba kaabera la.—Isaiah 2:8.
Pa’alekãtɛdaana N Gaŋɛ Za’a	Isaiah 30:20, 21	A bo’ori to la pa’alegɔ la ka’aŋɔ n soŋeri tɔ.—Isaiah 48:17, 18.
Naaŋɔ Soŋadaana	Yooma 149:2	Eŋa n naam sɛla woo.—Liligere 4:11.
Pupeelum Naayinɛ	1 Timoti 1:11	La pa’alɛ ti a tari la nyeema la pupeelum.—Yooma 104:31.
Mina n keleseri zusega	Yooma 65:2	Amea n keleseri zusega woo ti sɛba n tari sakerɛ zuseri en la.
Mam De Mam	Yɛhega 3:14, King James Version	A ni eŋɛ la sɛla n pakɛ ta’an basɛ ti a puti’irɛ tum tuuma. Basɛba lerege yelebɛa wa yeti “Mam Wan Dɛna Mam N Boti N Dɛna Sɛla” bii “Mam Wan Dɛna Mam Loe Ti N Dɛna Sɛla.” (The Emphasised Bible, by J. B. Rotherham; New World Translation) Na’asegɔ yu’urɛ wa n soŋɛ tɔ ti to ta’an pa’alɛ Yehowa yumɛŋerɛ la vuurɛ n boi a kaalegɔ zɛsɛka n taɣelɛ la.—Yɛhega 3:15.
Nyuure	Yɛhega 34:14, King James Version	A ka boti nɛreba pu’usa sɛla pa’asɛ eŋa poan. Ba le lerege yelebire wa yeti “a ka boti ba pu’usa sɛla pa’asɛ a zuo” la “a boti la ba pu’usa eŋa ma’a.”—God’s Word Bible; New World Translation.
Daarewoo Naba	Liligere 15:3	A bisega la ka tari pɔsega bii ba’asegɔ.
Daana	Yooma 135:5	Daana bii kpɛ’ɛma; Hebru ʼA·dhohnʹ la ʼAdho·nimʹ.
Nɛrekuuŋɔdaana, Soogɛpadaana	Isaiah 1:9, King James Version; Arom 9:29, King James Version	Saazuo malesi la n de soogɛpa la nɛŋadaana. Ba ta’an kelum lerege na’asegɔ yu’urɛ la n de “Soogɛpa Daana la” yeti “Yehowa n de soogɛpa daana” la “[saazuo] soogɛpa Daana.”—Arom 9:29, New World Translation; NET Bible, footnote.
Paŋa Za’adaana	Yooma 47:2	Eŋa kpe’eŋo n gaŋɛ za’a.
Fa’a Za’adaana	Magaha 9:10	Eŋa n de zilam daana gana nɛresɛka deene, dɛna kasi ge ana fa’a.
Yaɣumbasadaana	Isaiah 64:8	A tari kpe’eŋo sɔna nɛreba la tisi wuu yaɣebera n tari yɔɣɔrɔ tuna eŋa n boti se’em.—Arom 9:20, 21.
Lua Bunɔ Daana, Mina N Le Da Sɛla	Isaiah 41:14; King James Version	A doose la Yezu Krista lua bunɔ la poan le da asaala bii faaɛ ba yese be’em la kum poan.—Yon 3:16.
Taŋa	Yooma 18:2, 46	Suka zɛ’an la fa’arɛ zɛ’an.
Fãara	Isaiah 45:21	A faari nɛreba la dɛŋa la sa’aŋɔ poan.
Dunkeena	Yooma 23:1	A biseri sɛba woo n pu’useri en mɛ.
Sɔ’ɔlumdaana	Pin’ileŋɔ 15:2	Eŋa kpe’eŋo n gaŋɛ za’a; Hebru ʼAdho·naiʹ.
Saazuodaana	Daniel 7:18, 27	Eŋa n de sɔ’ɔlumdaana n gaŋɛ za’a.

Zɛ’ɛsi yu’ura n boi Hebru Gulesegɔ la poan

Baabule la poan, ba dekɛ Naayinɛ yumɛŋerɛ la laɣum pa’asɛ siɣɛ zɛ’ɛsi ase’a yu’ura mɛ ge zɛ’ɛsi wa yu’ura daɣɛ Naayinɛ yu’ura.

Zɛ’an la yu’urɛ	Baabule Gulesegɔ	Vuurɛ
Yehowa-yireh	Pin’ileŋɔ 22:13, 14	‘Yehowa Wan Bo.’
Yehowa-nisi	Yɛhega 17:15	“Yehowa N De Mam Gu’ura,” bii “mam Dãalesum Bunɔ.” (Today’s New International Version) Yehowa dela Naayinɛ ti a nɛreba wan ta’an keŋɛ a zɛ’an ti a te’ele ba ge soŋɛ ba.—Yɛhega 17:13-16.
Yehowa-salom	Kema 6:23, 24	“Yehowa Dela Suma’asumdaana.”
Yehowa-samah	Ezekiel 48:35, footnote, American Standard Version	“Yehowa Boi Bini.”

Sɛla n sɔi ti la nara ti to mina Naayinɛ yu’urɛ ge tara dɛ tuna tuuma

Naayinɛ bisɛ ti a yumɛŋerɛ n de Yehowa la yele pakɛ mɛ se’ere n sɔi la a basɛ ti ba gulesɛ yu’urɛ wa eŋɛ Baabule la poan paɛ tusa mɛ.—Malaki 1:11.
Yezu n de Naayinɛ Dayɔa la yuun basɛ ti nɛreba baŋɛ Naayinɛ yu’urɛ yele n pakɛ se’em mɛ. Makerɛ n wana, a yuun zusɛ Yehowa yeti: “Ho yu’urɛ nara pɛnka.”—Matu 6:9; Yon 17:6.
Sɛba n ni baŋɛ Naayinɛ yu’urɛ ge tara dɛ tuna tuuma la ni pɔsɛ mɛ nyɔɣɛ Yehowa zɔtɔ. (Yooma 9:10; Malaki 3:16) Ba zɔtɔ nyɔka wa soŋera ba mɛ ti ba nyɛta nyuurɔ zɛ’ɛta Naayinɛ n biŋe a nɔɔrɛ yeti: “N nɔŋɛ mam la zuo, n wan gura en, n wan zɛnkɛ en, en mi mam yu’urɛ la zuo.”—Yooma 91:14.
Baabule la yeti: “Nɛreba basɛba han ta behere la sɛba te ba yi’ire yena. Yelemɛŋɛrɛ, yena wa la sɛba te ba behera te bama n de ba doma bo mɛ kekeko . . . saazuo ha, bii teŋa wa zuo . . .” (1 Korint 8:5, 6) Ge Baabule la kelum pa’alɛ ti yelemɛŋɛrɛ Naayinɛ ayina ma’a yu’urɛ n de Yehowa.—Yooma 83:18.

a Hebru gɔnmi’ileba basɛba ni lerege Naayinɛ yu’urɛ la “Yahweh.”

b Naayinɛ yu’urɛ la gia gia dela “Yah.” Yu’urɛ dena wa paɛ wuu 50 Baabule la poan laɣum pa’asɛ ba dekɛ yu’urɛ wa tum tuuma yelebɛa la n de “Halleluyah,” bii “Alleluia,” ti la vuurɛ dɛna “Pɛɣɛ Yah.”—Liligere 19:1; American Standard Version; King James Version.