Sara * ningo peteĩ kuñakarai orekóva 35 áñorupi ha oiko vaʼekue Dácape (Bangladés), haʼe irrespetuósa ha iñamávle vaʼekue. Enterovénte oikuaa haʼe siémpre hory ha itravahadoraha, ha oipytyvõ hapichakuérape oikuaa hag̃ua Ñandejára rembipota. Péro upéinte ojagarra chupe peteĩ mbaʼasy vai, ha una semána mboyve omanóma. Iména ha ifamília opyta vaieterei anga upe rire.

Santiago ha hembireko, orekóva mas de 30 áño káda uno, oiko vaʼekue Nueva Yórkpe. Haʼekuéra hory ha iñamávle vaʼekue avei Sáraicha. Péro oiko hesekuéra peteĩ mbaʼe ivaietereíva. Peteĩ díape oho hikuái ovisita iñamígope oikóva mar ykére, oéste gotyo Estados Unídospe, ha upe viáhepe oñaksidenta hikuái ha omano. Upéva oheja vaieterei ihénte ha iñamigokuérape.

Entéronte jahechakuaa opárupi ojehasa asyha, ha ágotyo ha pégotyo oĩha iñañáva. Gerrahápe omano umi soldádo ha avei heta hénte inosénte. Umi delinkuénte ojuka hetaitereípema. Umi desástre naturál ohundipa ojuhúva guive haperãme. Umi ojapóva inhustísia ha oapoʼíva hapichápe oĩ opárupi rei. Ha umi aksidénte ha mbaʼasy vai katu ohupyty oimeraẽvape, tahaʼe imitãva térã ijedáva, ipláta térã imboriahúva. Nde voi oiméne resufrímava koʼã káusare.

Upéicha rupi, enterovénte ñañeporandu koʼã mbaʼe:

• ¿Mbaʼére piko umi hénte ivuénova jepe osufri?

• ¿Ñandejára káusarepa oiko umi mbaʼe vai?

• ¿Oiko vaʼerã voíntepa umi mbaʼe vai, térãpa umi yvypóra kúlpare?

• ¿Noiméipa jasufri koʼág̃a japaga hag̃ua umi mbaʼe vai jajapo vaʼekuére ótra vídape?

• Oiméramo añete oexisti Ñandejára Ipuʼakapáva, ¿mbaʼérepa ndoprotehéi umi hénte ivuénovape?

• ¿Opánepa jehasa asy ha umi mbaʼe vai ojejapóva ko múndope?

Jaikuaa hag̃ua koʼã mbaʼe, ñambohovái raẽ vaʼerã mokõi porandu iñimportánteva: ¿Mbaʼérepa oiko hetaite mbaʼe vai? ¿Ha mbaʼépa ojapóta Ñandejára osolusiona hag̃ua upéva?