Mbaʼéichapa jaleevaʼerã la Biblia ideprovécho hag̃ua ñandéve

“La Biblia haʼehína pe lívro oñevendevéva ko yvy ape ári. Ha ndahaʼéi ymavénte upéichava. Koʼág̃ante voi káda áño hetaiterei Biblia oñevende.” (RREVÍSTA TIME)

“Alee ningo la Biblia sapyʼapyʼa, péro pyaʼeterei chembyaju.” (KEITH, MÚSICO INGLÉS)

MBAʼE piko upéicharõ! Hetaiterei hénte oreko la Biblia, péro saʼi oĩ oleéva ha oñehaʼãva ojapo heʼíva ipype. Upéicharõ jepe, oĩ umi ohechakuaáva Ñandejára Ñeʼẽ ideprovechoitereiha. Pór ehémplo, peteĩ kuñakarai hérava Nancy omombeʼu: “Ojapóma 35 áño aheka aikóvo pohã vyʼaʼỹme g̃uarã, ha péina ahechakuaa Ñandejára Ñeʼẽmante ikatuha chembyetiaʼe. Ajepokuaa alee pyharevekue káda día, ha ajepyʼamongetávo hese añandu tuicha ombohasaveha chehegui pe vyʼaʼỹ”.

Oiméramo ndereleéiti la Biblia, repensámapa mbaʼére ojeʼe ko lívro oipytyvõha hetaite tapichápe? Ha oiméramo rejepokuaa voi relee, mbaʼépa rejapovaʼerã ideprovechove hag̃ua ndéve? Koʼã konsého jahechátava katuete nepytyvõta reikũmby porãve hag̃ua Ñandejára Ñeʼẽ.

1 Releevaʼerã reikuaa hag̃ua Ñandejárape

◼ Heta tapicha olee la Biblia ogustágui chupekuéra ojehai lája umi mbaʼe oĩva ipype térã ohekágui konsého, ha ambue katu olee okumpli hag̃uánte. Péro, mbaʼérepa jaleevaʼerã la Biblia? Jaleevaʼerã jaikuaaségui Ñandejárape ha jahecha hag̃ua mbaʼépepa tekotevẽ ñakambia.

Ñandejára Ñeʼẽme voi ojehechauka ñandéve mbaʼérepa jajapovaʼerã ipype heʼíva.  Santiago 1:23-25-pe (BNP) heʼi: ‘Upe ohendúnteva pe ñeʼẽ ha ndojapóiva, haʼete ku omañáva ijehe espéhope ha neʼĩramírõ g̃uarã hesaráima mbaʼéichapa raʼe haʼe. Péro pe omaña porãva pe léi hekoitepeguáva rehe ha ojapóva upe léi heʼiháicha katu ndahaʼéi ohendúnteva ha upéi hesaráiva. Upéva ovyʼavaʼerã ojapo rupi upéicha’.

Ko kuimbaʼe ningo omaña haʼangáre espéhope péro ndojapói mbaʼeve, mbaʼérepa? Oiméne haʼe pyaʼe pyaʼénte omaña ijehe, térã oimoʼã natekotevẽiha okambia mbaʼeve. Upéicha avei jaleéramo la Biblia ñakumpli hag̃uánte térã ndajajaposéirõ heʼíva ipype, mbaʼevépe ndaideprovechomoʼãi ñandéve. Péro jaleéramo Ñandejára Ñeʼẽ ñakambia hag̃ua umi mbaʼe ñapensáva ha jajapóva, katuete ñasẽ porã ha javyʼáta.

2 Reiporavovaʼerã peteĩ Biblia rentende porãtava

◼ Koʼág̃a rupi jajuhu opaichagua Biblia ha oimeraẽva ikatu jaiporu, péro jahechavaʼerã umíva apytégui mávapa ideprovechovéta ñandéve. Oĩ oiporúva umi ñeʼẽ ymaguaréva térã hasyetereíva ñantende hag̃ua (Hechos 4:13). Oĩ katu oñekambiavaʼekue ha oñemoĩ pype heta japu omboʼéva yvypóra. Pór ehémplo heta Bíbliagui ojepeʼa Ñandejára réra, Jehová, ha oñemoĩ hendaguépe “Ñandejára” térã “Ñande Ruete”. Jahechakuaa upéicharõ tekotevẽha jaheka peteĩ Biblia ñantende porãtava ha omboʼéva pe añetegua.

Upévare hetaiterei oĩ oiporúva pe Traducción del Nuevo Mundo. * Peteĩ karai ijedámava okonsegi peichagua ibibliarã ohórõ guare testígo de Jehová rreunionhápe. Haʼe heʼi: “Ymaite guive aleéva la Biblia, péro ndajuhúiva gueteri koichagua oñentende porãva ha opokóva ñanderehe.”

3 Reñemboʼevaʼerã Ñandejárape

◼ Jaleéta jave Ñandejára Ñeʼẽ jajerurevaʼerã Ijapoharépe tañanepytyvõ, upéicharõ ñantende porãvéta. Péicha ojapo pe kuimbaʼe ohaivaʼekue Salmo 119. Versíkulo 18-pe haʼe heʼi Jehovápe: ‘Cheresapeʼa ikatu hag̃uáicha ahecha iporãitereiha ne Ñeʼẽ’. Ñañemboʼe jave jaagradesevaʼerã Ñandejárape omeʼẽ haguére ñandéve la Biblia jaikuaa hag̃ua chupe (Salmo 119:62).

Péro mbaʼéicha jaikuaáta Ñandejára ñanerenduha? Jahechamína mbaʼépa oiko mokõi mitãkuñáre oikóva Uruguáype. Oleérõ guare Daniel 2:44 oikuaaseterei hikuái mbaʼépa heʼise. Upémarõ ojerure Ñandejárape ombou hag̃ua peteĩ omyesakãvaʼerã chupekuéra upe téysto. Mbaʼépa oiko? Omboty mboyve hikuái ibíblia, og̃uahẽma katu mokõi testígo de Jehová. Haʼekuéra olee upe téysto ha omyesakã chupekuéra mbaʼépa heʼise: Ñandejára Rréino ohunditaha yvypóra goviérno. * Umi mokõi mitakuña ohechakuaa Ñandejára ombohovái hague iñemboʼe.

4 Releevaʼerã koʼẽ koʼẽre

◼ Oĩ oleéva la Biblia ojejopy vai térã ohasa asy javénte. Peteĩ karai ovendéva lívro omombeʼu “oñevende hague hetaiterei Biblia” oiko rire pe atentádo terrorísta 11 de septiembre de 2001, Estados Unídospe. Péro Ñandejára heʼi ñandéve Josué 1:8-pe (ÑÑB) jalee hag̃ua Iñeʼẽ káda día: ‘Arakaʼeve neremboykeivaʼerã ko kuatiañeʼẽme heʼíva. Ára ha pyhare elee ha ejepyʼamongeta hese, eñangareko ha ejapopa ipype ojehaihaichaite. Upéicharamo tuicha reñakãrapuʼãta ha osẽ porãmbáta ndéve opa mbaʼe’.

Mbaʼérepa jalee meme vaʼerã Ñandejára Ñeʼẽ? Ñapensamíntena ko mbaʼére: Peteĩ karai hasýva ikorasõme ijatáke, upe rire heʼi oñangarekotaha  ijehe ha hoʼútantema tembiʼu ou porãtava chupe. Péro mbaʼépa oikóta hese ikaru vai jeýramo ha oñeñandu vai javénte oñatende guaʼu ijehe? Ndaideprovechomoʼãi ningo chupe, hesãi hag̃ua ára ha ára oñangarekovaʼerã hoʼúvare. Péicha avei, ‘osẽ porãmba hag̃ua ñandéve opa mbaʼe’, káda día jaleevaʼerã la Biblia.

5 Releevaʼerã igústo hag̃uáicha ndéve

◼ Añetehápe iporã jalee umi lívro oĩva la Bíbliape oñepyrũ guive opa peve ojoapykueripa. Péro ikatu avei ñamohenda igustove hag̃uáicha ñandéve. Ehechami koʼã ehémplo:

Ñandejára siervokuéra rembiasakue. Ikatu relee peteĩteĩ umi Ñandejára siérvo rembiasakue. Pór ehémplo:

• José: Génesis 37-50.

• Rut: Rut 1-3.

• Jesús: Mateo 1-28; Marcos 1-16; Lucas 1-24; Juan 1-21. *

Eiporavo peteĩ téma. Eheka umi téysto oñeʼẽva peteĩ témare. Pór ehémplo, rehechakuaa umi párte oñeʼẽva ñemboʼére, ha ikatu voi relee mbaʼéichapa oñemboʼevaʼekue yma Ñandejára siervokuéra. *

Releevaʼerã hatã porã. Ñandejára Ñeʼẽ ñanemokyreʼỹ jalee hag̃ua upéicha (Revelación [Apocalipsis] 1:3). Jalee vove ñande rogaygua ndive, káda uno ikatu olee peteĩ párrafo térã oñemoñeʼẽ haʼerõguáicha pe tapicha oĩva la Bíbliape. Ikatu avei ñahendu umi gravasión Ñandejára Ñeʼẽ rehegua. Peteĩ kuñakarai heʼi: “Ijetuʼueterei ningo chéve alee hag̃ua la Biblia. Upémarõ añemoĩ ahendu umi gravasión ha koʼág̃a g̃uarã chegustaiteve Ñandejára Ñeʼẽ oimeraẽ ótro lívrogui”.

6 Rejepyʼamongetavaʼerã umi mbaʼe releévare

◼ Koʼág̃a rupi apúrope jaiko. Upévare nañanetiémpoi jepi jajepyʼamongeta hag̃ua. Péro ideprovécho hag̃ua ñandéve jaleéva la Bíbliape jajapovaʼerã katuete upéva. Tekotevẽháicha ñamboguapy ñane rembiʼu jakarupa rire, upéicha avei jajepyʼamongetavaʼerã umi mbaʼe jaleévare. Mbaʼéicha jajapokuaa upéva? Ñanemanduʼavaʼerã umi mbaʼe jaleevaʼekuére ha ikatu voi ñañeporandu: “Mbaʼépa chemboʼe Jehovágui ko téysto? Mbaʼéichapa ideprovéchota chéve? Mbaʼéichapa ikatu aiporu ko téysto aipytyvõ hag̃ua che rapichakuérape?”.

Jajapóramo upéicha katuete Ñandejára Ñeʼẽ opokóta ñanderehe ha ñanembovyʼáta. Salmo 119:97 heʼi voi: ‘Ahayhueterei ne Ñeʼẽ. Ára pukukue hese ajepyʼamongeta’. Mbaʼérepa ohayhueterei Ñandejára Ñeʼẽ pe kuimbaʼe ohaivaʼekue ko Salmo? Ojepyʼamongeta rupi pe oleévare.

7 Rehekavaʼerã peteĩ nemboʼétava

◼ Ñandejára ningo nohaʼarõi ñantende ñandejehegui reínte la Biblia heʼíva. Iñeʼẽme ojeʼe oĩha heta mbaʼe ‘hasýva jaikuaa hag̃ua mbaʼépa heʼise’ (2 Pedro 3:16). Mávapa ikatu omyesakã ñandéve? Héchospe oñeñeʼẽ peteĩ kuimbaʼe Etiopiaygua rehe ndaikatúiva ontende peteĩ téysto oleevaʼekue. Upévare Ñandejára omondo hendápe peteĩ hembiguái, ha omyesakã rire chupe pe kuimbaʼe osẽ ‘oho vyʼapópe’ (Hechos 8:26-39, BNP).

Rentendeséramo la Biblia rejerurekuaa peteĩ testígo de Jehovápe tanembostudia, ỹrõ rehai umi ojapóvape ko rrevísta rejerure hag̃ua peteĩ estúdio. Upearã ikatu reiporavo páhina 4-pe peteĩ direksión opyta porãvéva ndéve. Roipotaite ningo koʼã konsého nepytyvõ ideprovechove hag̃ua ndéve umi mbaʼe releéva nde Bíbliape.

[Nóta]