Tuvakuéra omboʼe hag̃ua ifamíliape

Rebeca oipota Jehová oguerohory chupe

NDE piko reikuaa peteĩ kuña héravape Rebeca? *... La Biblia, pe lívro iñimportantevéva oĩva ko múndope omombeʼu oĩ hague peteĩ kuña hérava upéicha. Mbaʼépa nde reikuaa chugui?... Jahechamína mbykymi mbaʼépa ohasavaʼekue ko kuña ha mbaʼépa ñanemboʼe iñehémplo.

La Biblia omombeʼu oĩ hague heta kuña iñeʼẽrendúva Ñandejárape, ha umíva apytépe oĩ Rebeca. Ndépa reikuaa mávapa oĩvaʼekue haʼe mboyve?... Sara, Abrahán rembireko; haʼe ijeda riréma imembyvaʼekue, ha ombohéra chupe Isaac. Tiémpo rire Isaac omenda Rebécare. Péro, mbaʼéichapa ojokuaavaʼekue hikuái? Mbaʼéichapa Rebeca ohechauka oipota hague Jehová oguerohory chupe?

Sesenta áño onase mboyve Isaac, Jehová heʼivaʼekue Abrahán ha Sárape ova hag̃ua Harángui Canaánpe. Heta tiémpo oĩ rire hikuái upépe, Jehová opromete chupekuéra ifamiliataha ijedáramo jepe. Katuete ningo oiméne Isaac, itúva ha isy resaʼỹi. Ajépa ohayhueténeraʼe hikuái Isaácpe! Upévare haʼe ombyasy anga isy omanórõ guare oguerekópe 127 áño. Upérõ Isaac ikariaʼypamavaʼekue ha itúva ndoipotái omenda peteĩ kuña Canaanguáre, nomombaʼeguasúiva Jehovápe. Upévare omondo hembiguái Eliezérpe táva Haránpe, opytáva 800 kilómetro haʼekuéra oĩhágui. Maʼerãpa oho upepete peve? Oiporavo hag̃ua Abrahán hentekuéra apytégui Isaac rembirekorã (Génesis 12:4, 5; 15:2; 17:17, 19; 23:1).

Eliezer ha ambue Abrahán rembiguaikuéra osẽ oho ha ogueraha diez kaméllo heta provísta ha jopói reheve pe kuñataĩme g̃uarã. Hasýpe  ningo og̃uahẽ hikuái táva Haránpe, upémarõ opyta opytuʼu peteĩ póso ykére. Upépe umi hénte kaʼaruete oho jepi y rekávo hogayguakuéra ha hymbakuérape g̃uarã. Upe rire Eliezer ojerure Ñandejárape otopauka hag̃ua chupe Isaac rembirekorã. Péro mbaʼéichapa oikuaáta mávapepa Jehová oiporavo? Haʼe heʼi Ñandejárape: ‘Pe kuñataĩ che haʼeha: “Emboguejy ne kambuchi tayʼumi”, ha heʼíva chéve: “Heyʼu katu, ha amboyʼúta avei ne kamellokuéra”, upéva hína upe nde reiporavóva ne rembiguái Isaácpe g̃uarã’.

Upe riremínte peteĩ kuñataĩ neporãva hérava Rebeca oñemboja pe póso rembeʼýpe. Ha reikuaa piko mbaʼéichapa ombohovái, Eliezer ojerurérõ guare chupe y? Heʼi omboyʼutaha chupe ha avei ikamellokuérape. Eliezer omombaʼeterei mbaʼéichapa pe kuñataĩ ou ha oho omboyʼu hag̃ua umi kaméllo. Ha ndépa reikuaa mboy lítro ikatu hoyʼu diez kaméllo? Amo 1.000 lítro rupi.

Eliezer omeʼẽ aja umi jopói porãite Rebécape oikuaa itúva haʼeha Betuel, Abrahán hénte. Rebeca oinvita chupe opyta hag̃ua hógape upe pyhare. Upéi Rebeca opuntea oavisa hag̃ua ihentekuérape ou hague Canaángui Abrahán rembiguaikuéra.

Labán, Rebeca ermáno, ohecha umi jopói ha oikuaa mávapa haʼekuéra, upémarõ oinvita chupekuéra osena hag̃ua upe pyharépe hógape. Péro Eliezer heʼi: “Ndaʼumoʼãi mbaʼeve haʼepa mboyve peẽme ko haʼevaʼerã”. Upéi heʼi Betuel, hembireko ha Labánpe mbaʼérepa ou hendapekuéra. Enterovénte oguerohory upéva ha heʼi naiprovlemaiha.

Eliezer ha iñirũnguéra upe pyharépe osena ha opyta oke, ohóma hag̃uáicha pyhareve Rebécandi, Abrahán rógape. Péro Rebeca sy ha iñermáno oipota ohaʼarõ diez día jepe oho hag̃ua omenda. Mbaʼépa heʼi Rebeca? Haʼe heʼi ohosemaha. Upémarõ osẽ oho hikuái ha og̃uahẽ rire Canaánpe omenda Isaac rehe (Génesis 24:1-58, 67).

Epensamína Rebeca ojapovaʼekuére, haʼe oho mombyry ihentekuéra ha iñamigokuéragui ha ndoikuaái ohecha jeýnepa chupekuéra. Ndépa mbaʼe repensa, ijetuʼúnepa chupe ojapo upéva?... Katueténgo ijetuʼu chupe, upéicharamo jepe Rebeca nopensái ijehénte, oipota guei Jehová oguerohory chupe. Ha upeichaite oiko, Ñandejára ohovasa chupe ohejávo Jesucristo, pe kuimbaʼe omosãsovaʼekue yvyporakuérape, onase iñemoñarégui. Ko ehémplo ningo iporãiterei ñandéve g̃uarã. Rebeca oipotavaʼekue Jehová oguerohory chupe, ñande avei jajapóramo upéicha Jehová katuete ñanderovasáta (Romanos 9:7-10).

[Nóta]

PORANDUKUÉRA:

▪ Mávapa rakaʼe Rebeca? Mbaʼéichapa oikuaáraʼe Eliezérpe?

▪ Mbaʼérepa Abrahán ndoipotaivaʼekue Isaac omenda peteĩ kuña Canaanguáre?

▪ Mbaʼéichapa ohechauka Rebeca oikotaha chugui peteĩ tembireko iguápava?

▪ Ndépa mbaʼe ikatu rejapo rembovyʼa hag̃ua Ñandejárape?