¿Releépa raʼe umi rrevísta Ñemañaha osẽ ramovéva? Ehechamína ikatúpa nemanduʼa koʼã mbaʼére:

¿Oĩ porãpa kristianokuéra oñemboʼe Jesúspe?

Nahániri. Jesús heʼi porã vaʼekue ñañemboʼe vaʼerãha Itúva, Jehovápe. Ha ndahaʼéi heʼínteva, síno haʼe voi omoĩ ehémplo (Mat. 6:6-9; Juan 11:41; 16:23). Umi kristiáno yma guare noñemboʼéi vaʼekue voi Jesúspe, síno Jehovápe (Hech. 4:24, 30; Col. 1:3) (1/1, páh. 14).

¿Mbaʼéichapa ikatu jajeprepara Konmemorasionrã?

Ikatu jalee umi téxto vívliko ojepreparáva Konmemorasión tiémpope g̃uarã, ñasẽve predikasiónpe, ñañemboʼe ha jajepyʼamongeta pe esperánsa Jehová omeʼẽvare ñandéve (15/1, páh. 14-16).

Mokõi karseléro ehípsio omombeʼu vaʼekue Josépe mbaʼépa osoña hikuái, ¿mbaʼépa oiko chuguikuéra upe rire?

José heʼi pe kopérope tres día haguépe faraón omoĩ jeytaha chupe ipuestokuépe. Ha pe panadérope katu heʼi tres día haguépe faraón oñakãʼotaha chupe ha upe rire omosaingotaha hetekue peteĩ póstere. Ha upeichaite oiko (Gén. 40:1-22) (1/2, páh. 12-14).

¿Mbaʼe rregálopa orresivi raʼe umi ermáno Japongua?

Orresivi hikuái Ñandejára Ñeʼẽ: Marandu Porã ohai vaʼekue Mateo. Heta hénte upepegua ndoikuaaguasúi mbaʼeve la Bíbliagui. Péro ko puvlikasión ojepuru meme hína predikasiónpe, ha ogustaiterei chupekuéra (15/2, páh. 3).

¿Mbaʼe fasilidápa oĩ vaʼekue síglo primérope ojepredika hag̃ua?

Primero, oĩ vaʼekue pas pe goviérno rrománo poguýpe. Segundo, ndahasýi vaʼekue ojeviaha hag̃ua. Tercero, enterove lénto oñeʼẽ pe idióma griégo, upévare ndahasýi vaʼekue ojepredika hag̃ua umi héntepe, umíva apytépe umi hudío oĩvape Roma poguýpe. Cuarto, umi léi rromána oprotehe isiudadanokuérape, ha umi kristiáno ikatu ojevale umívare oñedefende hag̃ua oĩ jave oñemoĩva hesekuéra opredika haguére (15/2, páh. 20-23).

¿Mbaʼérepa umi kristiáno verdadéro ndofestehái pe Páskua de Rresurreksión?

Jesús nomandái vaʼekue idisipulokuérape ogueromanduʼa hag̃ua haʼe oikove jey hague ára, síno pe omano hague ára (Luc. 22:19) (1/3, páh. 8).

Yma ñane puvlikasionkuéra oexplikave mbaʼépa orrepresenta káda detálle oĩva umi rreláto vívlikope, ¿mbaʼérepa ndojejapoguasuvéi upéicha?

Sapyʼánte la Biblia oñeʼẽ peteĩ persónare ha upéi ohechauka orrepresentaha ótra kósa térã ótra persónape. Por ehémplo, Gálatas 4:21-31 omombeʼu peteĩ istória orrepresentáva peteĩ mbaʼe oñekumplítava upe rire. Péro la Biblia voi ndeʼíriramo, natekotevẽi jaheka mbaʼépa orrepresentaha káda detálle. Upéva rangue, ikuentave jahecha mbaʼépa ikatu ñaaprende umi istória oĩvagui la Bíbliape (Rom. 15:4) (15/3, páh. 17, 18).

¿Mbaʼérepa iñimportantete umi papíro pehengue ojetopa vaʼekue Egíptope peteĩ lugár oñemombohápe vasúra?

Síglo 20-pe ojetopa peteĩ papíro pehengue orekóva un ládo Juan kapítulo 18 versíkulo 31-33 ha pe ótro ládo katu versíkulo 37 ha 38. Ojekalkula ojeskrivi hague unos kuánto áño apóstol Juan omano rire. Ko papíro iñimportanteterei kristianokuérape g̃uarã, pórke ohechauka la Biblia noñekambiái hague ha ikatuha jajerovia hese (1/4, páh. 10, 11).

¿Mbaʼérepa oñemosẽmante vaʼerã kongregasióngui umi hembiapo vaívape?

La Biblia ohechauka oñemosẽ vaʼerãha umi hembiapo vaíva noñarrepentírivape (1 Cor. 5:11-13). Péicha ojehupyty heta mbaʼe porã, por ehémplo noñemongyʼái Jehová réra, ojeprotehe pe kongregasión, ha oñepytyvõ pe hembiapo vaívape okambia hag̃ua (15/4, páh. 29, 30).