Jahechamína mbaʼérepa Jesús oñeʼẽ upérõ. Umi fariséo oporandúrõ guare chupe pe divórsiore, haʼe omyesakã porã mbaʼépa heʼi Ñandejára Ñeʼẽ umi omendávare. Pe Léi heʼivaʼekue peteĩ ména ikatuha omeʼẽ hembirekópe peteĩ kuatia ohechaukáva ojedivorsiaha chugui “ojuhúgui hese mbaʼe vai”. Péro upéva ndahaʼeivaʼekue upéicha iñepyrũmby guive (Deut. 24:1, 2, ÑÑB). Upe rire Jesús heʼi: “Oimeraẽ ojedivorsiáva hembirekógui, ndahaʼéiramo hekovai haguére ha upéi omenda jey ambuére, upéva oporomoakãratĩhína” (Mat. 19:3-9, NM).

Ohendúvo upéva, umi hemimboʼe heʼi: “Upéichataramo pe kuimbaʼe hembirekóndi, iporãvéta nomendaiete voi”. Ha Jesús ombohovái: “Naentéroi ikatu ojapo upe pejéva; umi Ñandejára oipytyvõvape añoite ojapokuaa upéva. Heta mbaʼére ningo kuimbaʼekuéra nomendái; oĩ hasýva onase guive ha upévare ndaikatúi omenda, oĩ umi kuimbaʼekuéra okapavaʼekue ha upévagui ndaikatúi omenda, péro oĩ avei nomendáiva pe Rréino yvagapegua rehehápe. Ha pe odesidíva ojapo upéicha, oĩ porã ojapóramo upéicha” (Mateo 19:10-12, NM).

Peteĩ kuimbaʼe ikatúma voi onase eunúko, térã oiko hese upéva oñeaksidentágui ỹrõ ojekapa rupi chupe. Péro oĩ avei umi oikóva eunúkoicha ha odesidíva nomendái ojejokokuaágui ha oservi “pe Rréino yvagapegua rehehápe”. Jesús ojapo haguéicha, haʼekuéra opyta soltéro oñemeʼẽmbaite hag̃ua Ñandejára servísiope. Jahechaháicha, ndahaʼéi onase guivéma, ni upe rire Jehová oiporavóva chupekuéra, síno ijehegui voi haʼekuéra odesidi opyta soltéro oservi hag̃ua chupe.

Jesús ohechauka haguéicha, Pablo heʼi entéro kristiáno, tahaʼe soltéro térã omendáva, ikatuha oservi porã Jehovápe, péro pe soltéro ‘odesidíva ipyʼaite guive’ nomendamoʼãiha “ojapo porãvéntema”. ¿Mbaʼérepa heʼi upéva? Umi omendáva tekotevẽ rupi oiporu itiémpo ha imbaretekue oñangareko hag̃ua iména térã hembirekóre. Umi soltéro katu ndorekói upe rresponsavilida, ha ikatu oñemeʼẽve Ñandejára servísiope. Haʼekuéra ohecha upe oportunida peteĩ jopóiramo Jehová omeʼẽva chupekuéra (1 Cor. 7:7, 32-38, NM).

Péicha jahecha la Biblia ndeʼiriha Ñandejára oiporavoha hetápe opyta hag̃ua soltéro. Haʼekuéra voi ikatu odesidi nomendái oñemeʼẽmbaite hag̃ua Ñandejára servísiope ha ovyʼa haʼeñóramo jepe. Oĩ heta kristiáno odesidíva opyta upéicha, ha entéro jaguerohoryvaʼerã chupekuéra.