Peteĩ lugár héravape Uz oiko vaʼekue peteĩ kuimbaʼe oadoráva Jehovápe. Ko kuimbaʼe héra vaʼekue Job. Job irríko ha heta ifamília vaʼekue. Haʼe imbaʼeporãiterei ha oipytyvõ umi imboriahúvape, umi viúdape ha umi mitã ndaisýi térã ndaitúaivape. ¿Ndépa ere siémpre oho porã hague Jóbpe ivuenoiterei haguére?

Job ndoikuaái kuri, péro Satanás omaña hína kuri hese. Upévare Jehová heʼi Satanáspe: “¿Rehecha piko che siérvo Jóbpe? Ndaipóri haʼeichagua pe yvy ape ári. Haʼe ningo iñeʼẽrendu ha siémpre ojapo iporãva”. Satanás heʼi Jehovápe: “Mbaʼéicha voi piko Job naiñeʼẽrendumoʼãi ndéve. Nde ningo rekuida hese, revendesi opa mbaʼe ojapóva, remeʼẽ chupe heta yvy ha umi animál orekóva heta hetave ohóvo. Péro eipeʼamíntena chugui opaite mbaʼe orekóva ha rehecháta naiñeʼẽrenduveimaha ndéve”. Jehová heʼi chupe: “Ikatu retantea rehecha hag̃ua siértopa upéva, péro anínte rejuka chupe”. ¿Mbaʼérepa Jehová oheja Satanáspe otantea Jóbpe? Pórke oikuaa porã Job osegitaha iñeʼẽrendu chupe.

Satanás ojapo heta mbaʼe ivaíva Job rehe otantea hag̃ua chupe. Primero umi sabeokuéra ou omondapaite chugui hymba vaka ha umi vúrro orekóva. Upéi Satanás ombou tata yvágagui ha ojukapaite Job ovechakuérape. Umi caldeo katu omondapa chugui ikamellokuéra ha omanombaite avei umi isirviénte okuida vaʼekue iñanimalkuérare. Péro upéi oiko peteĩ mbaʼe ivaivéva. Peteĩ isirviénte ou omombeʼu Jóbpe entéro itaʼýra ha itajýra okaru jave hoʼa hague hiʼarikuéra pe técho ha omanombaite hikuái. Job ombyasyetereíramo jepe umi mbaʼe oikóva hese, osegi oadora Jehovápe.

Satanás ombosufriseve kuri Jóbpe, upévare ombohasy chupe ha osẽmbaite Job rehe umi kuru  vai hasyetereíva. Job ndoikuaái kuri mbaʼérepa oiko hese hetaite mbaʼe vai, upéicharõ jepe osegi oadora Jehovápe. Jehová ohecha upéva ha ovyʼaiterei Job iñeʼẽrendu haguére chupe.

Upéi Satanás otantea jey Jóbpe. Upearã omondo Job rendápe mbohapy kuimbaʼe. Haʼekuéra heʼi chupe: “Oime vaʼerã repeka raʼe ha remokañyse la rejapo vaʼekue. Upévare Ñandejára ndekastiga hína”. Job heʼi chupekuéra: “Che ndajapói mbaʼeve ivaíva”. Péro upéi Job oñepyrũma opensa Jehová káusare oikoha hese heta mbaʼe vai ha heʼi Ñandejára iñinhustoha hendive.

Peteĩ mitãrusu hérava Elihú okirirĩnte ha ohendu umi mbaʼe heʼíva hikuái. Péro oñeʼẽmba rire hikuái, osẽ heʼi chupekuéra: “Tuichaiterei ningo pejavy enterovéva. Jehová ningo tuichaiterei ha ñande ndaikatúi ñantende mbaʼeichaitépa haʼe ipoderóso. Haʼe núnka ndojapomoʼãi ivaíva. Haʼe ohechapaite hína umi mbaʼe ohasáva la hénte ha oipytyvõ chupekuéra”.

Upéi Jehová oñeʼẽ avei Jóbpe ha heʼi chupe: “¿Moõ piko nde reĩ vaʼekue che ajapórõ guare ko yvy? ¿Mbaʼéreiko nde repensa che cheinhustoha? Reñeʼẽntema reikuaa porãʼỹre mbaʼérepa oiko heta mbaʼe”. Job orrekonose ofalla hague ha heʼi: “Tuichaiterei ajavy. Cheperdonamíntena umi mbaʼe haʼe vaʼekuére. Chéngo yma ahendúnte vaʼekue ndehegui. Péro koʼág̃a roikuaa porãma ha ahechakuaa ndéve g̃uarã ndaiporiha ikatuʼỹva”.

Ohasapa rire umi mbaʼe vai, Jehová omonguera Jóbpe ha omeʼẽ chupe hetave mbaʼe pe oreko vaʼekuégui yma. Job oikove vaʼekue vyʼápe heta áñore. Jehová ovendesi Jóbpe siémpre iñeʼẽrendu haguére chupe ohasáramo jepe heta mbaʼe ijetuʼúva. ¿Ha nde? ¿Resegítapa Job ehémplo ha toiko la oikóva siémpre neñeʼẽrendúta Jehovápe?