MBAʼÉPA nde reimoʼã oikotaha pe Huísio Árape? Heta oĩ oimoʼãva umi álma, miles de millones, ojeguerahataha peteĩteĩ Ñandejára tróno renondépe ojekuaa hag̃ua mbaʼépa oikóta chuguikuéra. Oimoʼã avei hikuái oĩtaha umi ohóva oiko yvágape, ha umi ohótava ohasa asy hag̃uáme opa árare. Péro la Biblia ndeʼiriete upeichataha. Ndahaʼemoʼãi peteĩ tiémpo jakyhyje hag̃ua, síno omeʼẽva esperánsa ha oñemyatyrõ hag̃ua opa mbaʼe.

Revelación 20:11, 12-pe, pe apóstol Juan heʼi mbaʼéichatapa pe Huísio Ára: ‘Ahecha peteĩ tróno morotĩ tuicháva ha pe oguapýva hiʼári. Ha henondégui okañy pe yvy ha yvága, ha ndojetopái chupekuéra hendag̃ua. Ha ahecha umi omanovaʼekuépe, tuicháva ha michĩvape, oñemboʼýva pe tróno renondépe, ha ojepeʼa umi kuatiañeʼẽ. Péro ojepeʼa avei ambue kuatiañeʼẽ; pe kuatiañeʼẽ jeikove rehegua. Ha umi omanovaʼekue ojehusga umi kuatiañeʼẽme ojehaívare ha hembiapokuére’. Mávapa pe Hués oguapýva pe trónope?

Ñandejára Jehová hína pe Hués tuichavéva yvyporakuérape g̃uarã. Upéicharõ jepe, haʼe oheja ótrope ojapo pe huísio. Hechos 17:31-pe, pe apóstol Pablo heʼivaʼekue Ñandejára ‘omoĩmahague peteĩ ára ohusga hag̃ua ko yvy hustísia reheve peteĩ kuimbaʼe haʼe omoĩvaʼekue rupive’. Ha ko Hués hína Jesucristo oñemoingove jey vaʼekue (Juan 5:22). Péro, arakaʼépa oñepyrũta pe Huísio Ára, ha mbaʼeichaitépa ipukúta?

 Pe lívro hérava Revelación ohechauka pe Huísio Ára oñepyrũtaha pe Armagedón ñorairõ opa rire, ohundítava ko múndo oĩva Satanás poguýpe * (Revelación 16:14, 16; 19:19-20:3). Pe Armagedón rire, Satanás ha idemoniokuérape oñembotýta mil áño aja peteĩ ‘yvykua pypukúpe’. Upe tiémpo aja, umi 144.000 oĩva yvágape ohusgáta hentekuérape ha oisãmbyhýta ‘rréicha Cristo ndive mil áño rehe’ (Revelación 14:1-3; 20:1-4; Romanos 8:17). Upéicharõ, pe Huísio Ára ndaipukumoʼãi 24 óra síno mil áño.

Umi mil áño aja, Jesucristo ‘ohusgáta umi oikovéva ha omanovaʼekuépe’ (2 Timoteo 4:1). ‘Umi oikovéva’ haʼe yvyporakuéra oĩva pe ‘aty guasúpe’, ohasátava pe Armagedón omanoʼỹre (Revelación 7:9-17). Pe apóstol Juan ohechavaʼekue avei ‘umi omanovaʼekuépe [...] oñemboʼýva pe tróno renondépe’ ojehusga hag̃ua. Ha Jesús oprometehaguéicha, umi ‘oĩva yvyguýpe ohendúta iñeʼẽ ha osẽta’, oñemoingove jeývo chupekuéra (Juan 5:28, 29; Hechos 24:15). Péro, mbaʼépa ojehecháta ojehusga hag̃ua chupekuéra?

Pe apóstol Juan ohechavaʼekue mbaʼéichapa ‘ojepeʼa umi kuatiañeʼẽ’, ha ‘umi omanovaʼekue ojehusga umi kuatiañeʼẽme ojehaívare ha hembiapokuére’. Oĩpa koʼã kuatiañeʼẽme opa mbaʼe umi hénte ojapovaʼekue yma? Ndaipóri. Pe huísio ndojejapomoʼãi umi mbaʼe ojapovaʼekuére hikuái omano mboyve. Mbaʼéichapa jaikuaa upéva? La Biblia heʼi: ‘Pe omanovaʼekue isãsóma ipekádogui’ (Romanos 6:7). Upéicharõ, ikatu jaʼe umi oñemoingove jeýva opuʼãtaha pekadoʼỹre. Upévare umi kuatiañeʼẽ heʼise oĩtaha umi mbaʼe Ñandejára ojerure pyahúva ñandehegui. Oiko hag̃ua opa ára g̃uarã, umi oñemoingove jeýva ha umi ohasáva omanoʼỹre Armagedón ojapovaʼerã umi mbaʼe Ñandejára ojeruréva. Koʼãva apytépe oĩta umi mbaʼe Jehová oikuaaukátava pe mil áño aja. Upéicharõ, ojehusgáta yvyporakuérape umi mbaʼe ojapóvare pe Huísio Ára aja.

 Pe Huísio Ára aja, hetaiterei yvypóra, miles de millones, oikuaa ñepyrũta mbaʼépa Ñandejára ojerure ha ikatúta ojapo hikuái. Kóva heʼise oĩtaha peteĩ tembiapo kakuaa oñemboʼe hag̃ua opavavépe. Upeichaite, ‘oikuaá[ta] mbaʼépa pe hustísia umi oikóva ko yvy porãme’ (Isaías 26:9). Péro, naentéroi ojaposéta Ñandejára heʼíva. Isaías 26:10-pe heʼi: ‘Ojeporiahuverekóramo jepe pe iñañávape, ndoikuaasemoʼãi pe hustísiagui. Pe yvy ojejapohápe iporãva haʼe hembiapo vaíta, ha ndohechakuaamoʼãi Jehová tuichaha’. Koʼã iñañávape oñehundietéta pe Huísio Ára aja (Isaías 65:20).

Opávo pe Huísio Ára, umi yvyporakuéra opytáva ‘oikovéta’ térã ohupytýta pe perfeksión (Revelación 20:5). Upéicharõ, pe Huísio Ára aja, yvyporakuéra ohupyty jeýta pe perfeksión oguerekovaʼekue iñepyrũme (1 Corintios 15:24-28). Ha upe rire oĩta peteĩ pruéva paha. Ojepoíta Satanáspe oĩhagui, ha oñehundi mboyve, ojehejáta chupe oñehaʼã ogueraha vai yvyporakuérape (Revelación 20:3, 7-10). Umi oñemoĩva hese ohecháta mbaʼeichaitépa oñekumpli la Biblia heʼíva koʼápe: “Umi hekojojáva oguerekóta ko yvy, ha oikóta ipype opa ára g̃uarã” (Salmo 37:29). Añetehápe, pe Huísio Ára iporãitereíta opa yvyporakuéra ijeroviapývape g̃uarã!