Wanaa sümaa nuʼttüin Salomón sünain aluwatawaa saaʼu Israel, müshi Jeʼwaa nümüin: «¿Kasa keeʼireeka paaʼin taapüin pümüin?». «Jintüi maʼin taya, isasü tachiki toʼunirüin takuwaʼipa. Paapa tamüin kekiiwaa süpüla taaʼinmajüin pupueulose», nümaka Salomón. Nusoutaka Jeʼwaa: «Süka puchuntuin tamüin kekiiwaa, kekiijeechi maʼin pia tatuma suulialeʼeya wayuu süpüshuaʼa. Jee taapeerü pümüin washirüü. Müleka poonoole sümaa tanüiki, kateerü poʼu soʼu wainma juya».

Nukumajitka Salomón tü aʼwaajüleekat Maleiwa. Nukumajirüin shia süka ooro, pülaata, wunuʼu otta süka ipairua anajüsü maʼin. Wainma na wayuu akaaliinjakana sünain akumajaa shia. Kettaasü soʼu akaratshi juya jee aainjünüsü miʼiraa shikiira. Soʼu tia, eʼitaanüsü mürüt saaʼu tü aʼajüleekat mürüt. Nüsapainkalaka Salomón shiʼipoʼujee tü aʼajüleekat mürüt sünain maa nümüin Jeʼwaa: «Jeʼwaakalee, nnojotsü miyoʼuin maʼin jee anachoin maʼin tü aʼwaajüleekat. Anasü pücheküle waʼwaajüin pia suluʼu jee paapaja wanüiki». Kettaapa nünüiki Salomón, achuwajaasü siki iipünaajee jee jotoleesia tü mürüt saaʼujatkat tü aʼajüleekat. Naaʼinrüin Jeʼwaa tia süka anain nümüin nuʼwaajünüin suluʼu tü aʼwaajüleekat. Neʼrapa tia na israeliitakana, talatüshii maʼin naya.

Aapüna achikit suluʼupünaa Israel otta wattapünaa kekiin maʼin Salomón. Antüsü wayuu nünainmüin Salomón süpüla nükaaliinjain naya. Akaʼaya wanee aluwataalü chejeʼewat Seba antüsü shia eemüin Salomón süpüla süsakirüin nia sünain pütchi kapüleeka maʼin. Müsü nümüin Salomón nusoutapa shiʼipajee tü sümakat: «Nnojotsü tanoujain anain paala tü aküjünakat püchiki sünain kekiin maʼin pia. Aluʼusaʼa jooluʼu, tatüjaaitpa aaʼu sünain piain wanee wayuu kekiikai maʼin. Anakuwaʼipaishi pia nutuma Jeʼwaa, chi Pümaleiwasekai». Anasü nakuwaʼipa na israeliitakana jee talatüsü naaʼin. Nnojotpejeʼe natüjaain saaʼu tü alatajatkat mapeena.