Nia aikalaaka David sünain aluwatawaa saaʼu Israel outapa Saúl. 30 nuuyase soʼu tia. Soʼu wanee kaʼi, wanaa sümaa yalajachin nia nipialuʼu, niʼrüin iipünaajee wanee jierü anasüchon maʼin. Asakitshi David süchiirua, nütüjaaka saaʼu Bat-Sebain sünülia otta Urías nünülia chi suʼwayuusekai sümaa surulaalüin nia. Nüsaajitka David Bat-Seba, nüinkaaka sümaa, kachonka shia nümüin. Nuunjulajüin David tü naainjalakat. Nuluwataain chi sülaülakai surulaat süpüla niʼitaain Urías napüleerua na surulaatkana jee nüpütünüinjachin nümüiwaʼa. Oʼutuna aaʼinchi Urías sünain tia atkawaakat. Kasaatka mapa David sümaa Bat-Seba.

Niʼrüin Jeʼwaa süpüshuaʼa tü kasa mojusü naaʼinrakat David. ¿Kaseetche naaʼinraka Jeʼwaa? Nuluwataain wanee nünüikimaajachi kanüliakai Natán süpüla naashajaainjachin nümaa David. Müshi Natán nümüin David: «Eeshi wanee wayuu washirü watta maʼin saalii nümüʼlüin. Nuʼluwajüin naʼanneetse wanee wayuu, waneesüchon neʼe naʼanneetse». Jashichijaashi David saaliijee tü naainjakat chia wayuu washitchikai. «¡Anashi nuʼutünüle aaʼin wayuukai chia!», nümakalaka nümüin Natán. Nusoutaka Natán nümüin. «Wayuukai chia pia piakai». Mojuka maʼin naaʼin David. «Kaainjalashi taya nuʼupala Jeʼwaa», nümaka nümüin Natán. Eʼrüshi müliaa David sümaa nüpüshi saaliijee naainjala otta süsalashi nia nutuma Jeʼwaa, ayatapajaʼa katüin noʼu David nutuma Jeʼwaa süka nnojoluin pülayaain naaʼin wanaa sümaa nüchiaanüin.

Nukumajeein David wanee piichi aʼwaajülee Jeʼwaa. Niapajaʼa Salomón, chi nüchonkai David nüneeküin Jeʼwaa süpüla niainjachin akumajüin tia aʼwaajüleekat. Oʼttüshi David sünain akumajaa sukuwaʼipa tü kasa choʼujaakat süpüla nukumajüin Salomón mapa tü piichi aʼwaajüleekat. «Anainjatü maʼin  tü piichi aʼwaajüleekat Jeʼwaa. Jintüiyüiya Salomón, yapajüinjatü tatuma palajana tü kasa choʼujaakat süpüla sukumajünüin tü piichi aʼwaajüleekat», nümaka David. Naapüin David watta saalii nuwashirüin süpüla tü piichi aʼwaajüleekat. Nüchajaain nachiki na aʼyataalii atüjakana maʼin, akotchojüshi nia ooro, pülaata, otta wunuʼu anajüsü kanüliaka cedro chejee Tiro otta Sidón. Sülüʼütpa nükalia David süpüla outaa, naapüin nümüin Salomón wanee karaloʼuta sümaajatü shiyaakua tü piichi akumajünajatkat. Nümaka nümüin Salomón: «Nia Jeʼwaa aküjaka tamüin sukuwaʼipa sukumajia tü piichi aʼwaajüleekat, taapüinjatü shia pümüin. Piainjachi akumajaka shia. Nnojo mmoluin pia, nükaaliinjeechi pia Jeʼwaa, yalayalaa paaʼin otta piʼyataa maʼin sünain».