Aapüna achikit suluʼupünaa tü mmakat Canaán tü alatakat sümüin tü pueulokot Jericó. Yapajaka na aluwataaliikana saaʼu tia mmakat süpüla nashutuin saaʼu Israel. Akanasaʼa na gabaoniitakana, naata tü kasa naaʼinrakat. Kasheʼinyaashii naya kuluulu ajaʼttaʼatasü jee noʼunaka eemüin Josué. «Suluʼujeejana waya wanee mma wattasü maʼin. Waapa achikit nünülia Jeʼwaa otta tü naaʼinrakat jüpüleerua chaa Egipto otta Moab. Müleka jüpansaajüle jünüiki wamüin nnojoleenain jushutuin waaʼu, jüchepchieena waya», namakalaka nümüin.

Nunoujain Josué nanüiki jee nüküjain namüin nnojoleenain nashutuin naaʼu. Apünüin kaʼi süchikijee tia, nütüjaa aaʼu Josué nnojoluin suluʼujeejanain naya wanee mma wattasü, suluʼujeejana naya tü mmakat Canaán. «¿Jamüshii jüküjaka jaʼalain wamüin?», nümaka Josué namüin. Nasoutaka nümüin: «Mmotshii waya. Watüjaa aaʼuchi Jeʼwaa, chi Jümaleiwasekai nütkaain jüpüleerua. Nnojo juʼutuin waaʼin, jalia waya paaʼin». Nikeraajüin Josué nünüiki otta nuuʼulaain katüin noʼu na gabaoniitakana.

Sütüjaanapa saaʼu tü naaʼinrakat na gabaoniitakana, oʼunushii jaʼraishii aluwataalii saaʼu Canaán namaa na nasurulaatsekana sünain ashutaa  naaʼu na gabaoniitakana. Nuʼunaka Josué otta na nusurulaatsekana sünain akaaliinjaa na gabaoniitakana; siraasü aika naaʼu süpüla nantüin chamüin. Oʼttushii naya sünain atkawaa waneemüin kaʼi, wattaʼajee maalü. Nayasaʼa na cananeokana, apantajaashii naya napüleerua. Sujunuwaaka naaʼu miyoʼuyuu shiʼichiise juya nutuma Jeʼwaa. Nuchuntaka Josué nümüin Jeʼwaa nüshaʼwalaainjachin chi Kaʼikai. ¿Jamüsü nuchuntaka Josué nümüin Jeʼwaa tia? Shia süka niʼitaain maʼin naaʼin nünain Jeʼwaa. Nüshaʼwalaaka chi Kaʼikai nutuma Jeʼwaa. Nnojoishi emerotuin chi Kaʼikai waneʼereʼeya nakanajapa na israeliitakana.