બાઇબલ જણાવે છે કે એક સ્વર્ગદૂત ઈશ્વરની સામે થયો અને તે શેતાન કહેવાયો. તેણે કહ્યું કે, ઈશ્વરને મનુષ્યો પર રાજ કરવાનો કોઈ હક નથી, ઈશ્વર વગર માણસ વધારે સુખી રહેશે. દુઃખની વાત છે કે આપણાં પ્રથમ માબાપ આદમ અને હવાએ પણ શેતાન જેવું જ કર્યું. તેઓએ ઈશ્વરનો સાથ છોડી દીધો અને તેમના રાજ નીચે રહેવાનું પસંદ કર્યું નહિ.—ઉત્પત્તિ ૩:૧-૬; પ્રકટીકરણ ૧૨:૯.

આદમ અને હવાએ ઈશ્વરના રાજમાં રહેવાનું પસંદ ન કર્યું. એટલે, તેઓએ પોતાનું સુંદર બાગ જેવું ઘર ગુમાવવું પડ્યું. તેઓને હંમેશ માટે જીવવાની તક હતી. અરે, તેઓએ એ પણ ગુમાવવી પડી. (ઉત્પત્તિ ૩:૧૭-૧૯) તેઓના નિર્ણયનું ખરાબ પરિણામ આવ્યું. એ તેઓનાં બાળકોએ પણ ભોગવવું પડ્યું. બાઇબલ જણાવે છે આદમને લીધે ‘દુનિયામાં પાપ આવ્યું અને પાપથી મરણ ફેલાયું.’ (રોમનો ૫:૧૨) આદમના પાપને લીધે બીજું પણ એક ખરાબ પરિણામ આવ્યું: ‘માણસ બીજા માણસ ઉપર સત્તા’ ચલાવીને નુકસાન પહોંચાડવા લાગ્યો. (સભાશિક્ષક ૮:૯) એક માણસ બીજા માણસ પર રાજ કરે તો પરિણામ હંમેશા ખરાબ જ આવે.

બાઇબલ જણાવે છે કે નિમ્રોદ નામનો એક માણસ હતો. દુનિયામાં સૌથી પહેલા તેણે રાજ કરવાની શરૂઆત કરી. તેણે યહોવા વિરુદ્ધ બળવો કર્યો. એ સમયથી આજ સુધી, દરેક શક્તિશાળી માણસે પોતાની સત્તાનો ખોટો ઉપયોગ કર્યો છે. આશરે ૩,૦૦૦ વર્ષ પહેલાં, સુલેમાન રાજાએ લખ્યું હતું: ‘જેઓ જુલમ સહેતા હતા તેઓ આંસુ પડતાં હતાં, અને તેઓને દિલાસો દેનાર કોઈ નહોતું; તેઓના પર જુલમ કરનારાઓના હાથમાં સત્તા હતી.’—સભાશિક્ષક ૪:૧.

આજે પણ દુનિયાની હાલત કંઈક એવી જ છે. ૨૦૦૯માં સંયુક્ત રાષ્ટ્રસંઘના એક સાહિત્યમાં આવું જણાવ્યું હતું: “દિવસે ને દિવસે એ સાફ જોવા મળી રહ્યું છે કે દુનિયાની મોટા ભાગની મુશ્કેલીઓનું કારણ ખરાબ સરકારો જ છે.”

દુનિયાને એક સારા શાસકની, એક સારી સરકારની જરૂર છે. આપણા સર્જનહાર યહોવાએ એ લાવવાનું વચન આપ્યું છે!

ઈશ્વરે એક રાજ્યની ગોઠવણ કરી છે. એ રાજ્ય માણસોની બધી સરકારોને હંમેશ માટે કાઢી નાખશે. પછી ઈશ્વરનું રાજ્ય “સર્વકાળ ટકશે.” (દાનિયેલ ૨:૪૪) એ જ રાજ્ય માટે લાખો-કરોડો લોકો પ્રાર્થના કરતા આવ્યા છે. (માથ્થી ૬:૯, ૧૦) પણ એ રાજ્યમાં ઈશ્વર પોતે રાજ નહિ કરે. તેમણે એક એવા રાજા પસંદ કર્યા છે, જે પૃથ્વી પર માણસ તરીકે જીવ્યા હતા. ઈશ્વરે પસંદ કરેલા રાજા કોણ છે?