ULUTAGA LEVU
O Kilai Ira na iVakadinadina i Jiova?
“E iVakadinadina i Jiova o Mike, sa vakayabaki neirau veikilai tu. Au sega ga ni kila na mataqali lotu e lewena tiko. O cei o Jiova? Cava era sega ni dau marautaka kina na olodei na iVakadinadina? E lewena tiko o Mike na matalotu muri tamata?”—Becky, mai Kalifonia, e Merika.
“Ni ratou tekivu vuli iVolatabu kei ira na iVakadinadina i Jiova na tiko tikivi au, au mani vakasamataka: ‘Cava mada na ibalebale ni yaca qo, iVakadinadina i Jiova? E lasa ni vakatokayacataki tu kina e dua na matalotu!’”—Zenon, mai Ontario, e Kenada.
“Keirau nanuma vakaveiwatini ni inaki ga ni nodra veisiko mai na iVakadinadina i Jiova mera veivakamadualaki ni keirau dau tabutabu lotu. Keirau mani vakasamataka, ke ra sega mada ga ni sauma rawa neirau taro na veimatalotu kilai levu, sa qai yawa sara na matalotu ni iVakadinadina i Jiova qo.”—Kent, mai Washington, e Merika.
“Au sega sara ga ni kilai ira se nodra vakabauta.”—Cecilie, mai Esbjerg, e Denmark.
De o sa raici ira nira vunau tiko e veivale se matanalevu, ra veisoliyaka na ivola vakaivolatabu, ra veisureti tale ga ena vuli iVolatabu e sega ni saumi. De dua era solia sara ga vei iko na mekesini qo. Ia o se na rairai vaqaqa tiko ga na ka dina me baleti ira na iVakadinadina i Jiova. Ena rawa ni tautauvata sara ga nomu rai kei ira na tukuni toka qori mai cake.
Ena saumi vakacava nomu vakatataro? O na kila vakacava na ka era vakabauta na iVakadinadina i Jiova, e vakailavotaki vakacava nodra cakacaka vakaitalatala kei na vanua ni sokalou, cava tale ga era dau veisiko yani kina e vale, se ra vosa vei iko e matanalevu?
“E levu na ka au wilika ena Internet me baleti ira na iVakadinadina i Jiova,” e kaya o Cecilie, a tukuni toka mai cake. “Au dau rogoca nodra vakaucacataki, nodra vosabeci, au raicalataki ira kina.” Ia a qai vosa sara ga vei ira, e lomavakacegu ni saumi vinaka na veika e dau vaqaqa voli.
Oni via kila na ka dina me baleti ira na iVakadinadina i Jiova? Oni uqeti moni veivosaki ga kei ira, era tabaka na mekesini qo, era rawa tale ga ni sauma vakadodonu na nomuni vakatataro. (Vosa Vakaibalebale 14:15) Keimami nuitaka ni na vukei kemuni e vica na ulutaga tarava moni kilai keimami vinaka kina, neimami vakabauta, kei na neimami cakacaka.
