Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ULUTAGA LEVU | O KILAI IRA NA IVAKADINADINA I JIOVA?

Cava Keimami Vakabauta?

Cava Keimami Vakabauta?

Keimami vakabauta na iVakadinadina i Jiova ni “vakavuna na Kalou na iVolatabu kece, e yaga” tale ga. (2 Timoci 3:16) Keimami vakayagataka na iVolatabu me idusidusi ena neimami vulica na veika me baleta na Dauveibuli, me vakainaki tale ga neimami bula.

E kaya na iVolatabu: “Mera kila na tamata ni o kemuni, na yacamuni ga o Jiova, o kemuni ga oni Cecere Duadua e vuravura taucoko.” (Same 83:18) Keimami na sokaloutaka duadua ga kina na Kalou o Jiova, qai gugumatua ni vakatakila na yacana ni keimami nona iVakadinadina.Aisea 43:10-12.

Ni keimami lotu vaKarisito, keimami vakabauta ni “Luve ni Kalou” o Jisu, * a mai bula e vuravura me Mesaia. (Joni 1:34, 41; 4:25, 26) Ni mate, e vakaturi i lomalagi. (1 Korinica 15:3, 4) E qai Tui ni Matanitu ni Kalou. (Vakatakila 11:15) Na Matanitu ni Kalou qo e matanitu dina, ena veisautaka na vuravura me Parataisi tale. (Taniela 2:44) E kaya na iVolatabu: “Era na taukena na vuravura na yalomalumalumu, era na kunea na marau vakasakiti ena levu ni vakacegu.”Same 37:11, 29.

“Nira wilika na iVolatabu, era vakabauta ni vosa tiko vei ira na Kalou. Ni basika na leqa, era rai ga ena Vosa ni Kalou me qarai kina na kena iwali. . . . E se bula tiko ga vei ira na Vosa ni Kalou.”—iTalatala ni lotu Katolika o Benjamin Cherayath, niusiveva ni Jamani na Münsterländische Volkszeitung

Keimami vakabauta tale ga na iVakadinadina i Jiova ni rawa ni yaga na ivakavuvuli vakaivolatabu vei ira na tamata ena gauna sara mada ga qo. (Aisea 48:17, 18) Keimami dau muria gona na ivakavuvuli qori. Kena ivakaraitaki, e veivakaroti na iVolatabu meda kua ni vakadukadukalitaka na noda vakasama kei na yagoda, keimami na sega gona ni vakatavako se vakayagataka vakasivia na wainimate gaga. (2 Korinica 7:1) Keimami na cata tale ga na itovo e sega ni vakadonui ena iVolatabu, me vaka na mateni, veiyacovi tawadodonu, kei na butako.1 Korinica 6:9-11.

^ para. 5 E tukuni tale ga ena iVolatabu ni o Jisu e “Luve ni Kalou, e duabau ga e bulia,” e imatai ni nona ibulibuli, e buli koya sara ga o Jiova.—Joni 3:18; Kolosa 1:13-15.