Kena iKatolu: Era Lai Bula Kece i Lomalagi na Tamata Vinaka

Kena itekitekivu: Ni ratou mate na yapositolo i Jisu ena itekivu ni ikarua ni senitiuri S.K., era qai rogo na Qasenilotu ena gauna ya. E tukuna na New Catholic Encyclopedia (2003), Volume 6, tabana e 687 me baleta na nodra ivakavuvuli: “E vakavulici ni gauna e mate kina e dua, e vakasavasavataki na yalona, lai marautaka sara na bula e lomalagi.”

Ka e kaya na iVolatabu: “Era marau na yalomalua, nira na taukena na vuravura.”​—Maciu 5:5.

A yalataka o Jisu vei ratou na nona tisaipeli ni na “vakarautaka e dua na tikina” e lomalagi me nodratou, ia a sega ni tukuna nira na lako kece i lomalagi na yalododonu. (Joni 3:​13; 14:​2, 3) Sega li ni masuta o Jisu me vakayacori na loma ni Kalou “e vuravura me vaka e caka tiko mai lomalagi”? (Maciu 6:​9, 10) E rua na nodra inuinui na yalododonu. Dua na iwiliwili lailai era na veiliutaki kei Karisito e lomalagi, ia e dua na iwiliwili levu era na bula tawamudu e vuravura.​—Vakatakila 5:​10.

Ni toso na gauna, e veisautaka na lotu taumada na nona raica na itavi e qarava e vuravura. Na cava e yaco kina? E kaya na New Encyclopædia Britannica: “E uqeta na lotu me kua ni namaki na Matanitu ni Kalou, me kauaitaki ga na ka e vinakata.” E vakaitavi o lotu ena veika vakapolitiki ena nona via lewa tiko ga, e sega ni muria na ivakasala matata i Jisu mera ‘kua ni vakavuravura’ na nona imuri. (Joni 15:19; 17:​14-​16; 18:36) Ena lewa nei Constantine na Empara ni Roma, e veisautaka o lotu eso na ka e vakabauta, okati kina na ivakavuvuli me baleta na Kalou.

Vakatauvatana na tikinivolatabu qo: Same 37:​10, 11, 29; Joni 17:3; 2 Timoci 2:​11, 12

KA DINA:

E levu na tamata vinaka era na bula tawamudu e vuravura​—sega ni lomalagi

[iYaloyalo ena tabana e 24]

Art Resource, NY