Kena iKarua: Era na Vakararawataki i Eli na Tamata Ca

Kena itekitekivu: “Vei ira kece na vuku ni Kirisi, e vakilai vakalevu duadua na veivakamuai i Plato ena rai me baleti Eli.”​—Histoire des enfers (The History of Hell), a vola o Georges Minois, tabana e 50.

“Mai na veimama ni ika2 ni senitiuri S.K., sa ra vinakata na lotu vaKarisito era vulica na vuku vaKirisi mera vakamacalataka na nodra vakabauta me lako vata kei na vakasama vaKirisi . . . E ganiti ira vinaka kina na ivakavuvuli e vakatura na vuku o Plato.”​—The New Encyclopædia Britannica (1988), Volume 25, tabana e 890.

“Na ivakavuvuli ni Lotu e vakadeitaka ni o eli e dua dina na vanua, e tawamudu tale ga. Nira mate ga o ira era cala bibi, ena lako i eli na yalodra, ena tau vei ira na itotogi kei eli, na ‘kama tawamudu.’ Na itotogi levu duadua mai eli na nona tawasei tawamudu e dua mai vua na Kalou.”​—Catechism of the Catholic Church, itabataba ni 1994, tabana e 270.

Ka e kaya na iVolatabu: “Nira kila o ira na bula nira na mate: ia o ira na mate era sega ni kila e dua na ka, . . . ni sega na cakacaka, se vakasama, kila ka, se na vuku e Seoli, na vanua o lako tiko kina.”​—Dauvunau 9:​5, 10, Revised Standard Version.

Na vosa vakaIperiu Seoli e dusia na “vanua era tu kina na mate,” ena so na vakadewa ni iVolatabu e vakadewataki me “eli.” Na cava e tukuna vei keda qori me baleti ira na mate? Era lai vakararawataki beka i eli me saumi kina nodra cala? Sega, nira “sega ni kila e dua na ka.” Qori na vuna a masuti Jiova kina na peteriaki o Jope ni vakararawataki koya nona tauvimate bibi: “Taqomaki au e eli [vosa vakaIperiu, Seoli].” (Jope 14:13; Douay-Rheims Version) Ena kerea beka o Jope me cakava ya o Jiova ke a vanua ni veivakararawataki tawamudu o Seoli? Ni dau cavuti na eli ena iVolatabu, e dusia ga na ibulubulu ni kawatamata, e sega kina na cakacaka.

E sega li ni vakaibalebale cake na ivakamacala ya me baleti eli qai salavata kei na ka e tukuna na iVolatabu? Na cala cava e cakava e dua e sa rui ca sara ga me vakararawataka tawamudu kina na Kalou dauloloma? (1 Joni 4:8) Ke ivakavuvuli lasu o eli, vakacava o lomalagi?

Vakatauvatana na tikinivolatabu qo: Same 146:​3, 4; Cakacaka 2:​25-​27; Roma 6:7, 23

KA DINA:

E sega ni veitotogitaki i eli na Kalou

[iYaloyalo ena tabana e 23]

Barrators—Giampolo/The Doré Illustrations For Dante’s Divine Comedy/Dover Publications Inc.