•   O sega ni dau tuvanaka na ka o cakava, ia o watimu e dau tuvatuvanaki matau.

•   O dau galugalu qai mamadua, ia e vosalevu o watimu qai taleitaka na veimaliwai.

 E dau vakacudrui iko e dua na itovo votivoti nei watimu? Ena rawa ni leqa nomu vakawati ke o kauaitaka vakasivia qori. E kaya na iVolatabu “o koya e weroka tiko ga na ka, e tawasei ira na itokani dredre.”—Vosa Vakaibalebale 17:9.

 Mo kua ni vakalaiva qori mo drau veiba kina vakaveiwatini. Ia mo veisautaka ga nomu rai, qai kauaitaka na yasana e vinaka kina na nona itovo votivoti.

Ena ulutaga qo

•  Kauaitaka ga na veika e vinaka kina na itovo votivoti nei watimu

•  Ka era kaya na isa ni vakawati

•  iDusidusi ni veivosaki

 Na itovo o sevaka vei watimu e rairai veisemati tiko kei na dua na itovo o taleitaka vua. Raica mada qo e tolu na ivakaraitaki:

 “Ke keitou varau lako ina dua na vanua, ena vakaberabera o watiqu qai dau yalo balavu. Ia na itovo qori e vukei koya me dau vosovoso, vakabibi vei au. Dina ni vakasevaki ena so na gauna, ia qori e dua tale ga na ka au a taleitaka vua.”—Chelsea.

 “O watiqu e dau tuvanaka vakavinaka na ka me caka. Dau votivoti vei au ni dau vinakata me kila ke sa caka tiko na itavi. Ia na nona itovo qori e caka rawa kina e levu na itavi e vale.”—Christopher.

 “Dau vakacudrui au sara ga nona sega ni dau kauai tu o watiqu ena so na ka. Ia kila na cava? Na imatai ni gauna keirau sota kina, au a taleitaka na noda dau wele tu ga. Gauna qo ni keirau sotava na ituvaki dredre, au qoroya vakalevu ni dau tauri koya tu ga vakamalua.”—Danielle.

 Me vaka ga ratou kaya o Chelsea, Christopher, kei Danielle, nona itovo votivoti na isa ni vakawati e rawa ni tiko na ka e vinaka kina. Kena ibalebale, ena sega ni rawa ni biu laivi nona itovo votivoti ni na rawa ni yali kina na nona itovo vinaka. Me vaka ga na yasa ruarua ni ilavo siliva lailai, ena sega ni rawa ni viritaki laivi e dua na yasana, qai maroroi tu e dua tale na yasana. Ia rau na kabi vata toka ga, ni tiko na kena yaga.

 Eso na itovo era sa sega ga ni vinaka. Kena ivakaraitaki, e kaya na iVolatabu ni so era “dau cudru.” (Vosa Vakaibalebale 29:22) Ke va qori, me saga vakaukaua na isa ni vakawati me kauta laivi “na yaloca, na cudrucudru, na yalokatakata, na karakara, kei na vosa vakacaca.” a—Efeso 4:31.

 Ia ke votivoti tiko ga vei iko na itovo nei watimu, muria na ka e kaya na iVolatabu: “Moni dau yalorawarawa . . . ke dua e didivaka e dua na ka vua e dua tale.”—Kolosa 3:13.

 Dau vakasamataka tale ga na ka o taleitaka ena itovo votivoti nei watimu. De dua qori sara ga na itovo o taleitaka ena imatai ni gauna drau veikilai kina. E kaya e dua na tagane vakawati o Joseph: “Ke o kauaitaka tiko nona itovo votivoti o watimu, e vaka ga ni o vakaraica tiko na yasana momoto ni dua na daimani. Ia o sega ni kauaitaka kece na kena rairai totoka.”

 Drau rawa ni vakasamataka yadua na taro qo. Oti drau qai veivosakitaka na kena isau.

•   E tiko e dua na itovo nei watimu e vakavuna mo drau veiba vakalevu? Ke dina qori, na itovo cava ya?

•   E ca dina na nona itovo, se dua ga na ka lailai o sevaka?

•   E tiko e dua na ka e vinaka kina nona itovo votivoti qori? Ke tiko, na itovo cava ya? Cava o taleitaka kina nona itovo votivoti qori?