Ena Maji kei na Epereli 2026, e ratou vesu e lima na tacida e Ukraine ni ratou sega ni via vakaitavi ena ivalu. Ena gauna qo, era vesu tiko e 24 na tacida e Ukraine ena vuku ni nodra vakabauta.

Ena ika27 ni Maji 2026, e totogitaki me tolu na yabaki e valeniveivesu o Brother Zenovii Zhabiak, e yabaki 27. E volai ena lawa e Ukraine ni rawa nira vakaitavi ena tabana ni veiqaravi raraba ke ra sega ni curu ina mataivalu. E kerea o Zenovii me cakava na cakacaka qori, ia era sega ni vakadonuya na vakailesilesi. E mani kaya na mataveilewai na Zhydachiy District Court of the Lviv Region ni cala nona sega ni via curu ena mataivalu. Ni bera ni vesu o Zenovii, e kaya: “E vukei au o Jiova meu yaloqaqa qai vakaukauataki au. Niu yalolailai, au vakila ni tu e yasaqu. Ena gauna dredre qo, e vukei au na Aisea 41:10 meu kua ni rere se lomaleqa.”

Ena ika27 ni Epereli 2026,e vakatulewataka na mataveilewai na Lychakiyskiy District Court of the City of Lviv me vesu tu vakawawa o Brother Kostiantyn Perevozenko, e yabaki 42. E sega ni vakatarai me sere ke sauma mada ga vakailavo. E vakamacalataka o Kostiantyn na ka e vukei koya me yaloqaqa, e kaya: “E vukei au na yalo tabu i Jiova meu vosota na ituvaki dredre qai doudou ni vunau vei ira na vakailesilesi ni matanitu.”

Ena ika8 ni Epereli 2026, e vakatulewataka na mataveilewai na Lychakiyskiy District Court of the City of Lviv me rau vesu o Brother Oleksii Holoviatynski, e yabaki 49 kei Zoltan Demesh e yabaki 43. A sega ni vakadonuya na turaganilewa me sere o Oleksii ke sauma mada ga vakailavo. E tukuni vei Zoltan ena rawa ni sere ke tiko ga ena keba ni mataivalu, ia e sega ni vakadonuya qori ena vuku ni nona vakabauta, e vakatulewataka me na vesu tiko ga. Ni bera ni vesu o Oleksii, e kaya: “E vukei au meu yalodina tiko ga noqu dau nuitaki Jiova ena masu, na inuinui ena gauna se bera, kei na nodra veitokoni na mataveitacini. E vukei au qori me dei noqu vakabauta.”

Ena ika20 ni Epereli 2026, e vesu o Brother Mykhailo Diavoliuk, e yabaki 47. E kaya na mataveilewai na Zaliznychnyi District Court of the City of Lviv me na vesu tu vakawawa.

Ni ratou vesu tiko vakawawa o Kostiantyn, Mykhailo, Oleksii, kei Zoltan, e ratou kau vakaukaua ena keba ni sotia me ratou curu ena mataivalu, dina ga ni ratou sega ni duavata kina. Ia ke ratou sega ni muria na lawa ni mataivalu, ratou na totogitaki me ratou tini na yabaki e valeniveivesu.

Dina nira vosota tiko na tacida e Ukraine na veivakatovolei, ia eda nuidei ni o Jiova ena vukei ira kei nodra vuvale mera ‘vosota qai vakila na vakacegu.’​—Roma 15:5.