Vei Ira mai Roma 15:1-33
15 O keda eda kaukaua meda vosota nodra malumalumu na sega ni kaukaua,+ meda kua ni nanumi keda ga.+
2 Meda nanumi ira na tamata kece ena ka e yaga vei ira, me vakauqeti ira.+
3 O Karisito mada ga a sega ni nanumi koya ga,+ me vaka e volai: “Sa mai tau vei au na nodra vosavakacaca o ira era vosavakacacataki kemuni.”+
4 Na ka kece e volai e liu e volai meda vakavulici kina,+ me noda na inuinui e rawati mai na noda vosota+ kei na noda vakacegui mai na veika e volai ena iVolatabu.+
5 Me solia mada ga vei kemuni na Kalou e vu ni vosota kei na vakacegu na rai vata ga e tiko vei Karisito Jisu,
6 moni duavata+ moni domovata ni oni vakalagilagia na Kalou, na Tama ni noda Turaga o Jisu Karisito.
7 O koya gona, moni dau veiciqomi+ me vaka ga nona ciqomi keda o Karisito,+ me vakalagilagi kina na Kalou.
8 Au kaya ni sa italatala o Karisito vei ira na cili+ me vakaraitaka na dina ni Kalou kei na nuitaki ni veika e yalataka vei ira na tukadra,+
9 mera vakalagilagia na Kalou na veimatanitu ena vuku ni nona yalololoma.+ Me vaka e volai: “Oya na vuna au na vakalagilagi kemuni kina vei ira na veimatanitu, au na vakacaucautaka na yacamuni ena sere.”+
10 E kaya tale: “Ni marau na veimatanitu kei ira na nona tamata.”+
11 E tomana: “Ni vakacaucautaki Jiova* na veimatanitu kece, mera vakacaucautaki koya tale ga na lewe ni veivanua kece.”+
12 E tukuna tale o Aisea: “Ena basika ena kawa i Jese+ e dua me lewai ira na veimatanitu,+ era na vakanuinui vua na veimatanitu.”+
13 Me vakasinaiti kemuni mada ga na Kalou o koya na vu ni noda inuinui, ena marau kece kei na vakacegu ena vuku ni nomuni vakabauti koya, me levu* tiko ga kina na nomuni inuinui ena kaukaua ni yalo tabu.+
14 E macala vakasigalevu vei au, kemuni na taciqu, ni oni dau tu vakarau moni cakava na ka vinaka, ni sa levu sara na ka oni kila, oni maqosa tale ga ena veivakasalataki.*
15 Ia au doudou meu vola tale yani vei kemuni eso na ka moni nanuma kina, ena vuku ni loloma soli wale ni Kalou vei au,
16 meu dauveiqaravi nei Karisito Jisu vei ira na veimatanitu,+ meu vakaitavi ena cakacaka bibi ni kena tukuni na itukutuku vinaka ni Kalou,+ me rawa ni isoro ciqomi na veimatanitu, e vakasavasavataki ena yalo tabu.
17 Au marau gona niu tisaipeli i Karisito Jisu, vakabibi ena ka e baleta na noqu qarava na Kalou.
18 Au sega ni doudou meu tukuna e dua na ka e veisaqasaqa kei na cakacaka e vakayagataki au kina o Karisito mera talairawarawa kina na veimatanitu, ena ka au tukuna kei na ka au cakava,
19 ena kaukaua ni cakamana kei na ka veivakurabuitaki,+ ena kaukaua ni yalo ni Kalou, au vunautaka kina vakavinaka sara na itukutuku vinaka me baleti Karisito me tekivu mai Jerusalemi me yaco i Iliriko.+
20 Ena sala qo, au nakita kina meu kua ni tukuna na itukutuku vinaka ena vanua sa rogoci oti kina na yaca i Karisito, meu kua kina ni bucibucini ena nona yavu e duatani tale.
21 Ia me vaka e volai: “Era na raica o ira e se bera ni vakatakilai vei ira e dua na ka me baleti koya, o ira tale ga era se bera ni rogoca era na kila.”+
22 E levu na gauna au saga meu yacovi kemuni yani, ia e dreve noqu sasaga.
23 Ia qo, sa sega ni vo e dua na vanua meu tara ena yasayasa qo, e vica vata tale ga na yabaki noqu diva tu meu raici kemuni.
24 Keu mani gole i Sipeni, au na saga sara meu lai raici kemuni moni tomani au vakalekaleka e kea, ni oti mada na nomuni vakacegui au vakalailai.
25 Ia qo au sa vakarau lako i Jerusalemi meu lai qaravi ira na yalosavasava,+
26 me vaka nira sa lomavinaka mai Masitonia kei Akaia mera vota na nodra iyau mera vukei kina na yalosavasava era dravudravua e Jerusalemi.+
27 Era marau dina mera cakava qo, nira dinau tu vei ira na yalosavasava mai Jerusalemi me vaka nira sa mai vakaivotavota ena nodra veika vakayalo. Era ciqoma ni nodra itavi tale ga mera qaravi ira qo ena veika vakayago era gadreva.+
28 Niu qarava oti na itavi qo, au vakadewataka tale ga vei ira na cau, au sa na qai sikovi kemuni ena noqu ilakolako i Sipeni.
29 Ia niu sa na lako yani vei kemuni, au na salavata yani kei na veivakalougatataki levu i Karisito.
30 Au vakamasuti kemuni na taciqu, ena yaca i Jisu Karisito na noda Turaga kei na loloma e vu mai na yalo tabu, moni duavata kei au ena nomuni masulaki au vagumatua vua na Kalou,+
31 meu bula kina+ mai na ligadra na tawavakabauta mai Jutia, mera ciqoma tale ga na yalosavasava e Jerusalemi na ka ni veivuke au vakauta yani vei ira,+
32 baleta niu yaco yani vei kemuni ena reki me vaka na loma ni Kalou, au sa na vakauqeti o yau, o kemuni tale ga.
33 Me tiko vata mada ga kei kemuni kece na Kalou ni veivakacegui.+ Emeni.
