Aisea 41:1-29
41 “Moni vakadirorogo* moni rogoci au, na veiyanuyanu,Mera vakaukauataki tale na veimatanitu.
Mera toro mai, mera vosa.+
Meda lako vata yani ena veilewai.
2 O cei e uqeta e dua mai na icabecabe ni siga,*+E kacivi koya ena yalododonu i yavana,*Me solia vua na veimatanitu,E lesi koya me vakamalumalumutaki ira na tui?+
O cei e vakabalei ira ina kuvuniqele ena nona iseleiwau,Me vaka na vunicovuata e veicaginayaki ena nona dakaititi?
3 E cicimuri ira, e sega ni dua e tarovi koyaEna sala e sega ni butuka na yavana.
4 O cei e yavala me vakayacora qo,E kacivi ira na itabatamata mai na ivakatekivu?
O yau, o Jiova, na kena iMatai.+
Au na duadua tu ga vei ira na muri mai.”+
5 Nira raica na veiyanuyanu era rere.
Era sautaninini na iyalayala kei vuravura.
Era toro voleka ra qai lako mai.
6 Era vukea yadua na nodra itokaniEra kaya vua na wekana: “Mo kaukaua.”
7 Na matai e vakayaloqaqataka na matai ni kaukamea,+O koya e vakarabarabataka na kaukamea ena itukiE vakayaloqaqataki koya e tukia ena idabedabe kaukamea.
E kaya me baleta na dregati ni kaukamea: “E totoka.”
E qai vakadeitaki ena ivako me kua ni bale.
8 “Ia o iko Isireli na noqu dauveiqaravi,+O iko Jekope au digitaka,+Na kawa nei Eparama na noqu itokani,+
9 Au kauti iko mai na iyalayala kei vuravura,+Au kacivi iko mai na kena vanua yawa sara.
Au tukuna vei iko, ‘O iko na noqu dauveiqaravi,+Au digitaki iko, au sega ni biuti iko.+
10 Mo kua ni rere niu tokoni iko.+
Kua ni taqaya niu nomu Kalou.+
Au na vakaukauataki iko, io, au na vukei iko,+Au na tokoni iko ena ligaqu imatau daudina.’
11 Raica! Era na madua ra qai velavela o ira na katakatataki iko,+Era na vakatawayagataki ra qai rusa o ira na valuti iko.+
12 O na qarai ira era cudruvi iko, ia o na sega ni raici ira,O ira na valuti iko era vaka na ka wale, era vaka na ka e sega.+
13 O yau o Jiova na nomu Kalou, au taura tiko na ligamu imatau,O koya e tukuna vei iko, ‘Kua ni rere. Au na vukei iko.’+
14 Kua ni rere, Jekope na baca,*+
Kemuni na Isireli, au na vukei iko,” e kaya o Jiova, o koya e voli iko lesu,+ na Yalosavasava ni Isireli.
15 “Raica! Au lesi iko mo iyaya ni samusamu,+Na iyaya vou ni samusamu batirua.
O na butulaka na veiulunivanua mera matailalai.
O na vukica na veidelana mera vaka na qanicovuata.
16 O na ceburaki ira,Ena kauti ira tani na cagi,Era na veicaginayaki ena cagi kaukaua.
O na marautaki Jiova,+O na sakitaka na Yalosavasava ni Isireli.”+
17 “Era qara na wai na malumalumu kei ira na dravudravua, ia e sega.
Sa mamaca na yamedra nira karamaca.+
O yau o Jiova au na rogoci ira.+
O yau na Kalou ni Isireli, au na sega ni biuti ira.+
18 Au na vakadrodroya na uciwai ena veidelana dravuisiga+Kei na waivure ena vanua bucabuca.+
Au na vukica na vanua talasiga me tobu ni kutaKei na vanua dravuisiga me ivurevure ni wai.+
19 Au na tea ena vanua talasiga na vunisitari,Na akasia, na mateli, kei na paini.+
Au na tea ena buca dravuisiga na vunijunipa,Kei na vunidamanu, kei na vunipaini,+
20 Mera raica na tamata kece, mera kila,Mera kauaitaka, mera yalomatua,Ni vakayacora qo na liga i Jiova,E bulia na Yalosavasava ni Isireli.”+
21 “Moni vakamacalataka na nomuni kisi,” e kaya o Jiova.
“Moni tukuna na nomuni ile,” e kaya na Tui Jekope.
22 “Moni vakaraitaka, moni tukuna vei keimami na ka ena yaco.
Moni tukuna vei keimami na ka sa otiMe keimami vakananuma, me keimami kila na kena itinitini.
Se moni tukuna vei keimami na ka sa vakarau yaco.+
23 Moni tukuna vei keimami na ka ena yaco mai muriMe keimami kila ni oni kalou.+
Io, moni cakava e dua na ka, e vinaka se caMe keimami qoroya ni keimami raica.+
24 Raica! Oni ka waleE sega ni dua na ka oni rawata.+
E vakasevaki o koya e digitaki kemuni.+
25 Au uqeta e dua mai na vualiku, ena lako mai,+E dua mai na icabecabe ni siga*+ ena masuta na yacaqu o koya.
Ena buturaki ira na turaga* me vaka ga nira qele,+Me vaka na dautulituli e buturaka na qele dregadregata.
26 O cei e tukuna qo mai na ivakatekivu me keimami kila,Se na gauna sa sivi me keimami kaya kina, ‘E dina o koya’?+
E sega ni dua e tukuna!
E sega ni dua e vakatakila!
E sega ni dua e rogoca na ka oni tukuna!”+
27 O yau ga au kaya e liu vei Saioni: “Raica! Era sa tu qo!”+
Kei Jerusalemi au na tala kina e dua e dau kauta na itukutuku vinaka.+
28 Ia au rai tiko ga au sega ni raica e dua,E sega ni dua vei ira me veivakasalataki.
Au tarogi ira tiko ga mera sauma mai.
29 Raica! Era ka wale kece.
E tawayaga na ka era cakava.
Sa cagi wale ga qai sega na betedra na nodra matakau kaukamea.+
iVakamacala e ra
^ Se “Moni vakadirorogo e mataqu.”
^ Se “mai na tokalau.”
^ Oya me qaravi koya.
^ Oya e malumalumu qai vakaloloma.
^ Se “mai na tokalau.”
^ Se “ivukevuke ni turaga.”
