Rau beitaki e rua na tacida itabagone o Brother Yegor Baranov kei Sister Darya Dulova ni rau cala, qai rawa ni rau vesu me dua na gauna balavu. Ia rau yaloqaqa tiko ga. O Brother Baranov e yabaki 19, qai vesu tiko me wawa veilewai. O Sister Dulova e yabaki 18 ena gauna era curuma kina vakaukaua na ovisa nodratou vale. Era le 380 vakacaca na tacida e Rusia era beitaki tiko nira basulawa, ia rau gone duadua na tacida qo.

Ena ika27 ni Me 2020, sa vesu o Brother Baranov me wawa veilewai tu e loma. E waraka tiko o Sister Dulova me tauca na mataveilewai na macala ni rua na kisi e beitaki tiko kina. Dina ni rau sotava na ituvaki dredre, ia rau yalodina tiko ga vei Jiova.

Ena ika27 ni Me 2020, era curuma vakaukaua na ovisa na vale nei Brother Baranov kei tinana. Ekaya na turaganilewa o Aleksey Shatilov me bala e valeniveivesu o Brother Baranov, ni “dua na nodra iliuliu” na iVakadinadina i Jiova ena vanua ya.

E vakadomobula sara ga na ka era cakava na ovisa, ia e kaya o Brother Baranov ni vukei koya vakalevu nona masu vei Jiova. Qo na ka e tukuna, “E kaya e dua vei ratou na vaqaqara, ni raica ena noqu ivukivuki ni vaka ga au sa namaki ratou tiko na ovisa.”

E kaya o Brother Baranov ni dau vakasamataka vakalevu “ni na vakatara ga o Jiova na ituvaki e kila nida na rawa ni vosota.” E kuria: “Dua na ka e vakavuna meu nuidei, oya noqu masu vagumatua vei Jiova, au kerea tale ga nona yalo tabu. Au dei tale ga niu kila niu sega ni basulawa. E savasava noqu lewaeloma niu vakacacani tiko ena vuku ni noqu vakabauta.”

E kaya o Brother Baranov ni sega ni rere ni tiko e valeniveivesu. Era dau lomani koya na vo ni kaivesu, era dokai koya, era raici koya tale ga me vaka ga e tacidra. E tomana, “Era kila ni sega ni dodonu meu vesu.”

Ena imatai ni Okosita 2018, era curuma vakaukaua na ovisa na vale e tiko kina o Sister Dulova kei tinana. E kaya o Sister Dulova ni vakararawataki koya sara ga ka e caka qori, ia e dei tu ga nona vakabauta. E kaya, “Au vakadeitaka meu yalodina tiko ga vei Jiova. Se mani vakacava na ituvaki, au na qaravi koya tu ga me tawamudu.”

Ena Seviteba 2019, e tekivu veilewaitaki o Sister Dulova ena Mataveilewai ni Siti o Karpinsky, ena yasana o Sverdlovsk. E kaya ena dua na gauna ena mataveilewai ni noda itovo ga na tamata meda dau tukuna na ka vinaka vei ira eso tale. E kuria: “Kena ivakaraitaki, au kila ni sa vakarau veisautaka na vuravura qo na Kalou me parataisi, sa na oti na rarawa, eda sa na marau. Qori e uqeti au meu wasea na itukutuku marautaki vei ira eso tale.”

Dua na ka nona yaloqaqa kei na nona dei ena gauna e veilewaitaki tiko kina. Ia ena ika27 ni Janueri 2020, e kaya na mataveilewai ni cala o Sister Dulova. Ena sega ni vesu, ia ena vakatatabutaki tu me dua na yabaki. Ena kerea nona loya me rogoci tale na nona kisi.

Ena ika6 ni Okosita 2020, e sega ni tokona na mataveilewai ni yasana o Sverdlovsk na lewa e tau taumada vei Sister Dulova. Ena rogoci tale nona kisi ena mataveilewai ni siti o Karpinsky, ia me qarava e dua tale na turaganilewa. Se bera ni tuvanaki tiko na siga ni veilewai. Ni waraka tiko na macala ni imatai ni nona kisi, e tiko e dua na tale na kisi e beitaki tiko kina, okati kina o tinana kei na tolu tale na tacida.

E levu dina na ka rau vulica o Brother Baranov kei Sister Dulova ena ituvaki rau sotava qo.

Qo na ka e tukuna o Sister Dulova ni vukei koya vakalevu: “Vaqaqacotaka tiko ga nomu veika vakayalo ni o wilika nomu iVolatabu, vakavakarau ena soqoni, kei na nomu vulica na sere ni soqosoqo. Ni o vakasamataka vakatitobu na ka o wilika ena iVolatabu, ena vukei iko mo kua ni lomaocaoca se rerevaka na veika tawanamaki.”

E kaya o Brother Baranov: “Mo vosota na ituvaki qo, ena vinakati me dei nomu veiwekani kei Jiova. Kua ni vakalusia na nomu gauna. Vaqaqacotaka na nomu veiwekani kei Jiova.”

Era tu ena iVolatabu na kedra italanoa na itabagone e tokoni ira o Jiova mera yaloqaqa qai dei. Eda kila gona ni o Jiova ena tokoni ira tiko ga na itabagone era tusaqati tiko e Rusia kei na veiyasa i vuravura.​—1 Samuela 1:​20; 16:18; 2 Tui 5:​1-3; Taniela 1:​14-​17; 3:​17-​27.