iKarua ni Tui 5:1-27
5 E turaga rogo o Neamani na iliuliu ni mataivalu nei tui Siria, e dau dokai koya na nona turaga ni vakayagataki koya o Jiova me qaqa* kina o Siria. E tamataivalu qaqa ia e vukavuka.*
2 Ena dua na nodra kabakoro na kai Siria, era kauta mai vakabobula e dua na goneyalewa lailai ena vanua o Isireli, e mai veiqaravi sara vei wati Neamani.
3 E tukuna na goneyalewa vua na nona marama: “Ke lako mada ga na noqu turaga vua na parofita+ e tiko mai Samaria! Ena vakabulai koya mai na nona vukavuka.”+
4 Oti e lako yani o koya* me tukuna vua na nona turaga, e kaya vua na ka e tukuna na goneyalewa ni Isireli.
5 E qai kaya na tui Siria: “Mo lako sara ga qo! Au na vola e dua na ivola vua na tui Isireli.” E mani lako o koya, e kauta tiko e tini na taledi* siliva, e 6,000 na tikinikoula kei na tini na isulu.
6 E kauta sara na ivola vua na tui Isireli, e tukuni kina: “E salavata yani na ivola qo na noqu dauveiqaravi o Neamani, au tala yani mo vakabulai koya mai na nona vukavuka.”
7 Ni wilika oti ga na ivola na tui Isireli, e dresulaka na nona isulu, e kaya: “O yau na Kalou meu veivakamatei, meu veivakabulai tale ga?+ E tala tiko mai na turaga qo meu vakabulai koya mai na nona vukavuka! Oni raica sara ga ni via vakavuveiba vei au o koya.”
8 Ia ni rogoca qori o Ilaisa na tamata ni Kalou dina ni dresulaka na tui Isireli na nona isulu, e talatala sara vua na tui: “Na cava oni dresulaka kina na nomuni isulu? Yalovinaka, moni tukuna vua me lako mai vei au me kila kina ni tiko e Isireli e dua na parofita.”+
9 E mani lako yani o Neamani kei na nona ose kei na nona qiqinivalu, e lai duri tu ena katuba ni vale nei Ilaisa.
10 E tala sara vua o Ilaisa e dua na italai: “Mo lai sili vakavitu+ ena Joritani+ me vinaka tale na lewemu, mo savasava.”
11 E cudru sara ga o Neamani, e tekivu biubiu, e kaya: “Au nanuma ga, ‘Ena lako mai vei au o koya me duri eke, me masuta na yaca i Jiova na nona Kalou, qai yalovaka na ligana ena tikina e vukavuka me vakaotia.’
12 E sega ni vinaka o Epana kei Paripari na uciwai e Tamasiko+ mai na wai kece e Isireli? Au na sega ni rawa ni sili kina meu savasava?” E vuki me lako yani ena cudru.
13 Era torovi koya na nona dauveiqaravi ra qai tukuna: “I tamaqu, ke tukuna vei kemuni na parofita e dua na ka levu moni cakava, oni na sega ni cakava? Sa qai wacava ni tukuna ga vei kemuni, ‘Mo sili mo savasava’?”
14 E lako sobu o koya, e nunu vakavitu ina Joritani me vaka na ka e tukuna na tamata ni Kalou dina.+ E qai vinaka tale na lewena me vaka na lewe ni gonetagane lailai,+ sa savasava.+
15 Oti qori e lesu o koya vua na tamata ni Kalou dina,+ o koya kei ira kece nona lewenisala, e lai duri e matana, e kaya: “Au sa qai kila ni sega tale ni dua na vanua e vuravura e tiko kina na Kalou, e Isireli ga.+ Yalovinaka, moni taura na iloloma e solia na nomuni dauveiqaravi.”
16 Ia e kaya o Ilaisa: “Me vaka ni bula dina tiko o Jiova o koya au qarava,* au na sega ni taura.”+ E cikeva o koya me taura ia e sega tiko ga ni vakadonuya.
17 E qai tukuna o Neamani: “Ke sega, au kerea me soli vua na nomuni dauveiqaravi eso na qele me vodo ena rua na meule, ni na sega vakadua ni vakacaboisoro na nomuni dauveiqaravi vua e dua tale na kalou, vei Jiova ga.
18 Ia me vosota mada ga o Jiova na nomuni dauveiqaravi ena vuku ni ka qo: Ni curu na noqu turaga ena vale* i Rimoni me cuva e kea, e dau tautauri e ligaqu, meu cuva ena vale i Rimoni. Ena gauna au cuva kina ena vale i Rimoni, au kerea me vosota mada ga o Jiova na nomuni dauveiqaravi ena vuku ni ka qo.”
19 E kaya vua o Ilaisa: “Mo lako ena vakacegu.” Ni biuti koya me lako yani, ni se sega ni yawa na vanua e lakova,
20 e kaya lo o Kiesai+ na dauveiqaravi nei Ilaisa na tamata ni Kalou dina:+ ‘E lomani Neamani na kai Siria na noqu turaga+ ni sega ni taura na ka e kauta mai. Me vaka ni bula dina tiko o Jiova, au na cicimuri koya meu taura mai vua e dua na ka.’
21 E cicimuri Neamani sara o Kiesai. Ni raica o Neamani ni cicimuri koya tiko yani e dua, e sobu mai na nona qiqi me tavaki koya, e kaya: “E dua na leqa?”
22 E kaya o koya: “E sega ni dua na leqa. E talai au mai na noqu turaga, e kaya, ‘Raica! Rau se qai yaco ga mai e rua na cauravou mai na veiulunivanua e Ifireimi, erau luve ni parofita. Yalovinaka, moni solia vei rau e dua na taledi siliva kei na rua na isulu.’”+
23 E kaya o Neamani: “Qori, mo kauta e rua na taledi.” E cikevi koya tiko ga+ qai vesuka e rua na taledi siliva ena rua na taga kei na rua na isulu, e solia sara vei rau na nona dauveiqaravi me rau kauta ni rau liu vua.
24 Ni yaco i Ofeli* o Kiesai, e taura mai ligadrau me lai biuta i vale qai tukuna me rau lesu. Erau mani lako yani,
25 e curu sara i loma, e lai duri e yasa i nona turaga. E kaya vua o Ilaisa: “O lesu mai vei Kiesai?” Ia e kaya o koya: “E sega ni lako ena dua na vanua na nomuni dauveiqaravi.”+
26 E kaya vua o Ilaisa: “Vakaevei, a tiko vata kei iko na lomaqu ni sobu mai na kareti na turaga oya me tavaki iko? Vakacava, qo na gauna mo taura kina na siliva, se mo taura na isulu, se na veiolive, se loganivaini, se sipi, se bulumakau, se tagane se yalewa dauveiqaravi?+
27 Ia ena kabiti iko kei ira na nomu kawa na vukavuka i Neamani+ me tawamudu.” E biubiu mai matana o koya ni sa vukavuka me vaka na vulavula ni ucacevata.+
iVakamacala e ra
^ Se “vakabulai.”
^ Se “tauvi matenikuli.”
^ Rairai dusi Neamani.
^ Dua na taledi e tautauvata kei na 34.2 na kilokaramu (1,101 na onisi). Raica na iKuri B14.
^ Ipe., “au duri e matana.”
^ Se “burekalou.”
^ Dua na vanua e Samaria, de delana se bainivalu.
