Taniela 1:1-21

  • Viribaiti Jerusalemi o ira na kai Papiloni (1, 2)

  • Duatani nodra tuberi na kawa vakatui era vesu (3-5)

  • Vakatovolei nodratou vakabauta na va na Iperiu (6-21)

1  Ena ikatolu ni yabaki ni veiliutaki nei Tui Jioiakimi+ e Juta, e lako i Jerusalemi o Tui Nepukanesa e Papiloni me viribaita.+  E soli Tui Jioiakimi e Juta o Jiova e ligana+ kei na so na iyaya ni vale* ni Kalou dina qai kauta ina vanua o Saina*+ ina vale* ni nona kalou. E biuta na iyaya ena valeniyau ni nona kalou.+  E mani vakarota na tui vei Asipinasi, na nodra iliuliu na vakailesilesi me kauta mai eso na Isireli,* wili kina o ira na kawa ni tui kei na turaga.+  Mera itabagone* bulicaki vinaka, mera rairai vinaka, mera vuku, mera kilaka, mera yalomatua,+ me rawa tale ga nira veiqaravi ena valenitui. Me vakavulici ira ena ivola kei na nodra vosa na Kalitia.  E lewa tale ga na tui me dua na kedra ivotavota ena kena na tui kei na mena waini e veisiga. Mera vakavulici* me tolu na yabaki, ni cava na gauna qori mera qai qarava na tui.  Eso vei ira qori era lewe ni yavusa na Juta: o Taniela,*+ o Enanaia,* o Misaeli,* kei Asaraia.*+  E vakayacani* ratou sara na nodra iliuliu na vakailesilesi, e vakayacani Taniela me o Pelitisasari,+ e vakayacani Enanaia me o Setareki, e vakayacani Misaeli me o Mesake, e vakayacani Asaraia me o Apeteniko.+  Ia e nakita e lomana o Taniela me kua ni vakadukadukalitaki koya ena kena kakana na tui, se na waini e gunuva. E mani kerea na nodra iliuliu na vakailesilesi me kua ni vakadukadukalitaki koya ena ka qo.  E uqeta na Kalou dina me lomani Taniela na nodra iliuliu na vakailesilesi, me yalovinaka+ tale ga vua. 10  Ia e kaya vei Taniela na nodra iliuliu na vakailesilesi: “Au rerevaka na noqu turaga na tui, o koya e vota na kemudou kei na memudou. Vakacava ke raica o koya na matamudou ni sega ni bulabula ni vakatauvatani kei na matadra na itabagone* dou tabavata? Dou na vakacalai au* e matana na tui.” 11  E kaya o Taniela vua na ivakatawa e lesia na nodra iliuliu na vakailesilesi me raici Taniela tiko, Enanaia, Misaeli, kei Asaraia: 12  “Yalovinaka, moni vakatovolei keitou na nomuni dauveiqaravi me tini na siga, ni solia vei keitou eso na kakana draudrau me keitou kania kei na wai me keitou gunuva, 13  oti moni vakatauvatana na keitou irairai kei na kedra irairai na itabagone* era kania na kena na tui, moni qai vakatulewa vei keitou na nomuni dauveiqaravi ena ka oni raica.” 14  E mani rogoca o koya na nodratou vakatutu qai vakatovolei ratou me tini na siga. 15  Ni cava e tini na siga, e bulabula sara na kedratou irairai, eratou levulevu tale ga vei ira kece na itabagone* era kania tiko na kena kakana na tui. 16  Ia e dau kauta laivi na ivakatawa na kedratou kakana kei na medratou waini, e solia ga vei ratou na kakana draudrau. 17  E solia na Kalou dina vei ratou na itabagone* vava qo na kilaka kei na lomavuku ena ivola kei na vuku kece, e mani rawata o Taniela me tukuna na ibalebale ni veimataqali raivotu kece kei na tadra.+ 18  Ni cava na gauna e vakarota na tui mera kau yani kina,+ e kauti ira sara yani na nodra iliuliu na vakailesilesi e mata i Nepukanesa. 19  Ni vosa vei ira na tui, e sega sara ni dua e kune vei ira kece me tautauvata kei Taniela, Enanaia, Misaeli, kei Asaraia,+ eratou veiqaravi tiko ga e matana na tui. 20  Ia na ka kece e tarogi ratou kina na tui me kila na levu ni nodratou vuku kei na yalomatua, e raica ni ratou vuku vakatini ni vakatauvatani kei ira kece na bete daucakaiba kei ira na daurairai+ ena nona matanitu taucoko. 21  E tiko ga e kea o Taniela me yacova na imatai ni yabaki nei Tui Sairusi.+

iVakamacala e ra

Se “valenisoro.”
Oya o Papiloni.
Se “burekalou.”
Ipe., “luvei Isireli.”
Ipe., “gone.”
Se rawa ni, “qaravi vakavinaka.”
Kena ibalebale “Noqu Turaganilewa na Kalou.”
Kena ibalebale “Lomana o Jiova.”
Rairai kena ibalebale “O Cei e Vaka na Kalou?”
Kena ibalebale “Vukea o Jiova.”
Oya na yaca vakaPapiloni.
Ipe., “gone.”
Ipe., “na uluqu.”
Ipe., “gone.”
Ipe., “gone.”
Ipe., “gone.”