Wɔakekã Jehovah Adasefo Edwumayɛbea Nkorbata Ahorow Bi Abobɔ Mu
Obodur September 2012 no, nna wɔdze Jehovah Adasefo edwumayɛbea nkorbata ahorow bɔbor 20 hɔn do hwɛ ahyehyɛ nkorbata akɛse ase.
Nkyii so, woebuebue nkorbata afofor wɔ Serbia nye Macedonia. Siantsir etsitsir ebien bi na ama wɔayɛ dɛm nsakyer ahorow yi.
1. Mfirdwuma ama edwuma ne yɛ ayɛ mberɛw
Ndaansa yi, mpontu a aba wɔ nkitahodzi nye nwomatsintsim ho mfirdwuma mu no ama nyimpa dodow a yehia hɔn wɔ nkorbata ahorow bi no do atsew. Aber a nyimpa a wɔyɛ edwuma wɔ nkorbata akɛse no do atsew no, ɔma yenya adan ahorow a yebotum dze ama nyimpa a nna nkyɛ wɔwɔ nkorbata nkakraba a ɔwɔ aman afofor do no.
Sesei, yɛwɔ Adasefo pii a hɔnho awea a wɔwɔ nkorbata a wɔakekã abɔ mu no, a wobotum ahwɛ Bible nkyerɛkyerɛ edwuma no do. Dɛ nhwɛdo no, asɛnka edwuma a wɔyɛ no wɔ Costa Rica, El Salvador, Guatemala, Honduras, Nicaragua, nye Panama no abɛhyɛ Mexico nkorbata no ase. Iyi ntsi, wɔatoto edwumayɛbea nkorbata ahorow a nna ɔwɔ dɛm aman esia yi do no mu.
Wɔmaa Adasefo eduanan a nna wɔwɔ dɛm nkorbata esia yi kɛyɛɛ edwuma wɔ Mexico nkorbata hɔ. Hɔn mu bɛyɛ 95 so tsenaa hɔn man mu, na hɔ na wɔyɛɛ ber nyina asɛmpakã edwuma no.
Afofor so a wɔkae wɔ dɛm Central America aman ahorow yi do no, hyɛɛ ase yɛɛ edwuma wɔ kasa asekyerɛ edwumayɛbea ahorow wɔ Mexico nkorbata no hwɛ ase. Dɛ nhwɛdo no, wɔ Panama no, Adasefo bɛyɛ 20 kyerɛ Ɔweɔn-Aban nwoma ahorow ase kɔ hɔn kurow kasa mu. Adasefo 16 bi so kyerɛ nwoma ahorow ase kɔ hɔn kurow mu kasa ahorow anan mu, wɔ bea a nkyɛ nna ɔyɛ edwumayɛbea nkorbata wɔ Guatemala no. Ntsi wɔ Central America no, nhyehyɛɛ yi aboa ma wɔatsew nyimpa a nna wɔyɛ edwuma wɔ edwumayɛbea nkorbata hɔ no do efi 300 aba bɛyɛ 75.
2. Yebenya edwumayɛfo ma wɔdze mber pii ayɛ asɛnka edwuma no
Osian nkorbata ahorow a wɔkekãa bɔɔ mu no ntsi, afei asomfo a wɔfata a nna wɔyɛ edwuma wɔ nkorbata nketseaba ahorow no botum dze hɔn adwen esi asɛmpakã edwuma no do.
Ɔdasefo bi a ɔwɔ Africa, a ofii edwumayɛbea kɛyɛɛ ber nyina asɛnka edwuma no kyerɛɛw dɛ: “Wɔ abosoom kakra a odzi kan no mu no, nna ɔyɛ dzen ma me dɛ mebɛsesã m’asetsena ma ɔnye me tsebea fofor no ehyia. Naaso, asɛnka edwuma no a meyɛ no dabiara da no aboa me ma menya enyigye nye nhyira a ɔkyɛn do. Merekasa yi, menye nkorɔfo 20 yɛ Bible adzesũa, na binom mpo ahyɛ ase reba asafo nhyiamu ahorow.”