Juece 16:1-31
16 Ewari aɓa Sansoʉ̃ra pilisteorã puru Gazaɗaa wãsia. Mama wẽrã auɗuada unupeɗa idji ume cãĩne wãsia.
2 Maʉ̃ne Gazaɗebemarãba cawasiɗaa Sansoʉ̃ra mama ɓʉda. Maʉ̃ carea diamasi purura jũrã edaɗapeɗa dji puruɗe eɗa wãbada caita mĩrũnapeɗa chupea jʉ̃ã panesiɗaa. Ãdjia nãwã crĩchasiɗaa:
–Nu diapeɗa idji wãbʉrʉɗe jidaɗapeɗa beaɗia.–
3 Baribʉrʉ Sansoʉ̃ra ariquẽtrabe cãĩsia. Piradrʉpeɗa dji puruɗe eɗa wãbadada, dji jĩrũ egoroɗe jou nũmʉ siɗa ẽũta edasia. Maʉ̃gʉra dji bacuru caru nũmʉ siɗa jũma idji equiaɗe jira edapeɗa tʉmʉ Hebroʉ̃ puru quĩrãpe ɓʉ eyaɗaa edesia.
Sansoʉ̃ Dalila ume ɓaɗa
4 Mãwãnacarea Sansoʉ̃ba dewara wẽrãda awuasia. Maʉ̃ wẽrã Dalila abadara Sorec jeweɗaɗe ɓabadjia.
5 Ewari aɓa pilisteorã bororãra Dalilamaa wãnapeɗa nãwã jarasiɗaa:
–Daiba quĩrĩã panʉa bʉa Sansoʉ̃ra cũrũgaida jaramãrẽã idji juerzara cãrẽneba ze ɓʉda idjaɓa sãwã idjira poyaɗida. Mãwã idjira jʉ̃napeɗa dai jʉwaeɗa eropanania. Bʉa mãwã osira daiza bʉ́a parata torroda mil cien diaɗia.–
6 Maʉ̃ carea Dalilaba Sansoʉ̃a nãwã iwiɗisia:
–Mʉ̃ djuburia, jaradua bʉ juerzara ¿cãrẽneba ze ɓʉ? ¿Bʉra sãwã jʉ̃nida panʉ poya ẽdrʉrãmãrẽã?–
7 Sansoʉ̃ba sewaɗeba panusia:
–Siete enedrʉma jʉ̃cara djiwiɗiba mʉ̃da jʉ̃nibʉrʉ, mʉ̃ra juerza neẽ́ ɓeya. Baridua ẽberãca ɓeya.–
8 Maʉ̃ bẽrã pilisteorãba Dalilamaa enedrʉma jʉ̃cara djiwiɗida siete edesiɗaa. Maʉ̃ba Dalilaba Sansoʉ̃ra jʉ̃sia.
9 Ʉ̃cʉrʉ pilisteorãda idji deɗe mĩrũ panʉ bẽrã Dalilaba jĩgua jarasia:
–¡Sansoʉ̃, pilisteorãba bʉra jidaɗe zebʉdaa!–
Ara maʉ̃da Sansoʉ̃ba jʉ̃carara tʉcuasia oveja cara nayãna bá wãna quĩrãca. Maʉ̃ bẽrã pilisteorãba waɗibiɗa cawaɗaẽ́ basía idji juerzara cãrẽneba ze ɓʉda.
10 Mãwãnacarea Dalilaba Sansoʉ̃a jarasia:
–¡Bʉa mʉ̃ra cũrũgasia! Bʉa sewada osia. Mʉ̃ quĩrã djuburia, wãrãda jaradua sãwã bʉra jʉ̃nida poya ẽdrʉrãmãrẽã.–
11 Sansoʉ̃ba waya sewaɗeba jarasia:
–Mʉ̃ra jʉ̃cara nayãna djiwiɗiba jʉ̃nibʉrʉ juerza neẽ́ ɓeya. Baridua ẽberãca ɓeya.–
12 Ara maʉ̃da Dalilaba jʉ̃cara nayãna djiwiɗi ɓeaba Sansoʉ̃ra jʉ̃sia. Maʉ̃ne pilisteorãda idji deɗe mĩrũ panʉ bẽrã Dalilaba jĩgua jarasia:
–¡Sansoʉ̃, pilisteorãba bʉra jidaɗe zebʉdaa!–
Ara maʉ̃da Sansoʉ̃ba jʉ̃cara omoa nayãnara tʉcuasia jʉ̃cara chõda quiru quĩrãca.
13 Mãwãnacarea Dalilaba jarasia:
–¡Bʉa mʉ̃ra waya cũrũgasia! Bʉra sewaiɗa ɓʉa. Mʉ̃́a wãrãda jaradua sãwã bʉra jʉ̃nida poya ẽdrʉrãmãrẽã.–
Sansoʉ̃ba waya sewaɗeba jarasia:
–Mʉ̃ buɗa caɗa siete panʉda wua cabadaɗe wua ume ãbaa capeɗa dji bacuruɗaa bio jʉ̃ nũmʉsira mʉ̃ra juerza neẽ́ ɓeya. [Mʉ̃ra baridua ẽberãca ɓeya.–
Ara maʉ̃da Dalilaba Sansoʉ̃ra cãĩbisia. Maʉ̃be idji buɗa siete caɗara wua cabadaɗe wua ume ãbaa casía.]*
14 Maʉ̃be bacuruɗaa bio jʉ̃ nũmʉpeɗa jĩgua jarasia:
–¡Sansoʉ̃, pilisteorãba bʉra jidaɗe zebʉdaa!–
Sansoʉ̃ra cãĩ ɓaɗada piradrʉpeɗa wua cabadara dji bacuru siɗa idji buɗaba ẽũta edasia.
15 Mãwãnacarea Dalilaba jarasia:
–Bʉa mʉ̃ra quĩrĩã ɓʉaɗa abaria. Mãwãmĩna mʉ̃́a sewa obaria. Ɓarima ũbea mʉ̃ra cũrũgabʉrʉa. Waɗibiɗa jaraẽ́ ɓʉa bʉ juerzara cãrẽneba ze ɓʉda.–
16 Dalilaba ewariza ara pichia iwiɗibadjia. Mãwã mĩã sẽ ɓʉ bẽrã Sansoʉ̃ra sẽpeɗa beu quĩrĩã nũmesia.
17 Maʉ̃ carea idji juerzara cãrẽneba ze ɓʉda wãrãda jarasia:
–Mʉ̃ra nazareo bẽrã mʉ̃ buɗara tʉɗacaa. Mʉ̃ papa ɓiteɗaʉba mʉ̃ra Ãcõrẽ itea ɓesia. Mʉ̃ buɗada tʉɗibʉrʉ mʉ̃ra juerza neẽ́ ɓeya. Baridua ẽberãca ɓeya.–
18 Dalilaba cawasia Sansoʉ̃ba jaraɗara wãrãda. Maʉ̃ bẽrã pilisteorã bororãa nãwã jarabisia:
–Wayacusa zeɗadua. Sansoʉ̃ba idji juerzaɗebemada mʉ̃́a wãrãda jarasia.–
Ara maʉ̃da pilisteorãra Dalilamaa zesiɗaa parata diaɗi carea.
19 Maʉ̃be Sansoʉ̃ boro idji ɓacaraɗe ɓʉɗe Dalilaba Sansoʉ̃ra cãĩbisia. Maʉ̃ne aɓa trʉ̃sia Sansoʉ̃ buɗa caɗa siete panʉra tʉmãrẽã. Mãwã Dalilaba Sansoʉ̃ra biẽ́ osia. Juerza bara ɓaɗada Sansoʉ̃ra juerza neẽ́ ɓesia.*
20 Maʉ̃be Dalilaba jĩgua jarasia:
–¡Sansoʉ̃, pilisteorãba bʉra jidaɗe zebʉdaa!–
Ara maʉ̃da Sansoʉ̃ra ʉ̃rʉ̃mapeɗa ẽdrʉida crĩchasia naẽna ẽdrʉbari baɗa quĩrãca. Baribʉrʉ adua ɓasia Ãcõrẽra idji ume ɓaɗada ãyã wãsida.
21 Maʉ̃be pilisteorãba idjira jidaɗapeɗa idji daura nuẽtaɗapeɗa Gaza puruɗaa edesiɗaa. Mama bronce oɗa carena omoaba jʉ̃napeɗa preso ɓʉsiɗaa. Maʉ̃ne trigora yuɗe ɓabibadjiɗaa.
22 Baribʉrʉ idji buɗara waya ureabʉrʉ basía.
Sansoʉ̃ beuɗa
23 Sansoʉ̃ra preso jidapeɗaɗa bẽrã pilisteorã bororãda dji jʉresiɗaa ãdji ãcõrẽ Dagoʉ̃a ne babue diacuaɗi carea idjaɓa ɓʉsriɗa oɗi carea. Mãwã o panʉne nãwã trʉ̃ãsiɗaa:
Dadji ãcõrẽ Dagoʉ̃ba dadjía dji quĩrũ Sansoʉ̃ra poyabisia.
24 Puruba Sansoʉ̃ unusiɗaɗe ãdjirã biɗa ãdji ãcõrẽ Dagoʉ̃a nãwã trʉ̃ãsiɗaa:
Dadji ãcõrẽ Dagoʉ̃ba dadjía dji quĩrũ Sansoʉ̃ra poyabisia.
Dadji néu ãrĩbarira, dadji ẽberãrã beabarira poyabisia.
25 Ãdjirãra bio ɓʉsriɗa duanʉ bẽrã Sansoʉ̃ carea ipiɗa quĩrĩã panasiɗaa. Maʉ̃ bẽrã iwiɗisiɗaa Sansoʉ̃ enenamãrẽã. Ara maʉ̃da preso ɓʉbada deɗeba enenapeɗa idji carea bio ipiɗasiɗaa. Maʉ̃ne ãdji ãcõrẽ Dagoʉ̃ de droma de jĩrũ umé panʉ ẽsi nũmʉsiɗaa.
26 Cũdraba Sansoʉ̃ra jʉwaɗe erreɓari edebadjia. Maʉ̃ne Sansoʉ̃ba cũdraa nãwã jarasia:
–Mʉ̃ra de jĩrũ caita ededua. Maʉ̃naa chũ nũme quĩrĩã ɓʉa.–
Ara maʉ̃da cũdraba idjira de jĩrũ caita edesia.
27 Maʉ̃ deɗe pilisteorã bororãda jũma panasiɗaa. Umaquĩrãba, wẽrãrã biɗa dera bira nũmasia. Maʉ̃ awara dejã ʉ̃tʉara ɓʉɗe pilisteorãra tres mil panasiɗaa. Ãdjirã biɗa Sansoʉ̃ acʉ panʉne ipiɗa panasiɗaa.
28 Maʉ̃ne Sansoʉ̃ba Ãcõrẽa nãwã iwiɗisia:
–Mʉ̃ Boro Ãcõrẽ, mʉ̃ djuburia mʉ̃a iwiɗi ɓʉra ũrĩdua. Waya ɓarima aɓa mʉ̃ra juerza bara ɓʉdua mʉ̃a pilisteorã quenai carea mʉ̃ daura nuẽtapeɗaɗa bẽrã.–
29 16:29-30 Maʉ̃be idji jʉwaba tã jʉrʉsia dji ẽsibema de jĩrũ umé panʉda. Maʉ̃ de jĩrũba dji de borora eronũmasia. Maʉ̃ne idji jʉwaba de jĩrũra umena tãpeɗa nãwã ɓiasia:
–¡Mʉ̃ra pilisteorã ume beuya!–
Maʉ̃be jũma idji juerzaba chãɓaribʉrʉɗe pilisteorã ãcõrẽ Dagoʉ̃ de dromara ãdji bororã ʉ̃rʉ̃, dewararã ʉ̃rʉ̃ biɗa toɗogozoasia. Sansoʉ̃ siɗa beusia. Mãwã idji beusi ewariɗe Sansoʉ̃ba pilisteorãra auɗuara quenasia idji zocai ɓasiɗe quenana cãyãbara.
31 Mãwãnacarea idji djabarãba, jũma idji zeza ẽberãrã biɗa idjira edaɗe wãsiɗaa. Maʉ̃be jẽda edeɗapeɗa tʉɓarisiɗaa idji zeza Manoa tʉɓaripeɗaɗa uriaɗe Zora puru idjaɓa Estaol puru ẽsi. Sansoʉ̃ra veinte poa israelerã ẽdrʉ ɓʉbari basía.
