Juece 14:1-20
14 Ewari aɓa Sansoʉ̃ra pilisteorã puru Timnataɗaa wãsia. Mama pilisteo wẽrãda unupeɗa awuasia.
2 Jẽda diguiɗaa wãpeɗa idji djibarirãa nãwã jarasia:
–Mʉ̃a Timnata puruɗe pilisteo wẽrãda unusia. Mʉ̃ djuburia, idji djibarirãa idjira iwiɗiɗadua mʉ̃a edai carea.–
3 Maʉ̃ne Sansoʉ̃ djibarirãba jarasiɗaa:
–¿Cãrẽ cãrẽã pilisteo wẽrãda eda quĩrĩã ɓʉ? Pilisteorãra cacua wẽãgoẽ́ taɓeaa. ¿Dadji Daʉ̃neba yõpeɗaɗarã idjaɓa waabema israelerã tãẽna wẽrã biada neẽ́ca?–
Sansoʉ̃ba panusia:
–Mʉ̃a jãʉ̃ wẽrãda awua ɓʉa. Idjira mʉ̃ itea iwiɗiɗadua.–
4 Idji djibarirãba adua panasiɗaa Ãcõrẽbʉrʉ Sansoʉ̃a mãwã crĩchabisida. Mãwã osia Sansoʉ̃ra pilisteorã ume djõne wãmãrẽã. Maʉ̃ ewariɗe israelerãra pilisteorã jʉwaeɗa panasiɗaa.
5 Maʉ̃be Sansoʉ̃ djibarirãra Timnata puruɗaa wãsiɗaa. Idji siɗa ãdji caiɗu wãsia. Sansoʉ̃ Timnataɗebema uva ẽjũãne jũẽbʉrʉɗe imamaba idjira orrasia.
6 Ara maʉ̃da Ãcõrẽ Jaureɗeba Sansoʉ̃ra bio juerza barapeɗa ara idji jʉwaba imamara beasia chiwatu zaque beabʉrʉ quĩrãca. Mãwã beaɗamĩna idji djibarirãa jaraẽ́ basía.
7 Maʉ̃be Timnataɗe jũẽpeɗa dji wẽrã ume beɗeasia. Maʉ̃ wẽrãra bio awuasia.
8 Dãrãbʉrʉɗe Sansoʉ̃ra wayacusa Timnataɗaa wãsia maʉ̃ wẽrã edai carea. Puru caita jũẽbʉrʉɗe imama beaɗada acʉɗe wãsia. Maʉ̃ne imama ɓʉwʉrʉɗe urrajõ dʉrrʉda powua nũmasia idjaɓa urrajõda eɗa ɓasia.
9 Maʉ̃ urrajõra idji jʉwaba tue edapeɗa jõ wãsia. Idji djibarirã unusiɗe urrajõra diasia. Maʉ̃ne ãdjia jõsiɗaa. Baribʉrʉ Sansoʉ̃ba jaraẽ́ basía imama beuɗa ɓʉwʉrʉɗe urrajõra edasida.
10 Sansoʉ̃ zezara dji wẽrã ɓʉmaa wãsia. Mama Sansoʉ̃ba ɓʉsriɗa ne cobada waiɓʉada osia cũdrarãba quima edabʉdaɗe obada quĩrãca.
11 Pilisteorãba Sansoʉ̃ unusiɗaɗe ãdji dji biarãda treinta edasiɗaa idji ume pananamãrẽã.*
12 Sansoʉ̃ba maʉ̃ treinta panʉ́a nãwã jarasia:
–Mʉ̃a bãrãa mĩãdjiruda jaraya. Siete ewari naʉ̃ ɓʉsriɗa cobada ewari o panʉne bãrãba maʉ̃ mĩãdjiruda cawa jaraɗibʉrʉ, mʉ̃a bãrãza lino oɗa djioda aɓa idjaɓa ɓʉsriɗa oɗi careabema djio siɗa aɓa diaya.
13 Baribʉrʉ cawa jaraɗaẽ́bʉrʉ, bãrãza mʉ̃́a lino oɗa djioda aɓa idjaɓa ɓʉsriɗa oɗi careabema djio siɗa aɓa diaɗida panʉa.–
Ãdjia jarasiɗaa:
–Bia ɓʉa. Jaradua.–
14 Maʉ̃ne Sansoʉ̃ba nãwã jarasia:
–Mĩãdjiru, mĩãdjiru, mĩãdjiru. Dadji cobariɗeba coɗida edasia. Dji mẽsrãara ɓʉɗeba cũãda edasia. Maʉ̃gʉra ¿cãrẽ?–
Ewari ũbeaɗe pilisteorã treinta panʉba mĩãdjirura cawa jaraɗaẽ́ basía.
15 Maʉ̃ carea quĩmãrẽbema ewariɗe Sansoʉ̃ba edai wẽrãa nãwã jarasiɗaa:*
–¿Bãrãba dairãra trʉ̃siɗaca dairãneda jãrĩni carea? Jãʉ̃ mĩãdjiruba jara ɓʉra bʉdji quimaa iwiɗidua. Mãwã oẽ́bʉrʉ daiba bʉra, bʉ ẽberãrã siɗa babueɗia.–
16 Ara maʉ̃da dji wẽrãra Sansoʉ̃maa wãpeɗa jĩã ɓʉba nãwã jarasia:
–¡Bʉa mʉ̃ra quĩrĩãẽ́ ɓʉa! Jãʉ̃ mĩãdjiru mʉ̃ ẽberãrãa jaraɗara bʉa mʉ̃́a jaraẽ́ ɓʉa cãrẽda jara ɓʉda. ¡Bʉa mʉ̃ra quĩrãma ɓʉa!–
Sansoʉ̃ba panusia:
–Mʉ̃a bʉ́a ¿cãrẽã jarai? Mʉ̃ djibarirãa biɗa jaraẽ́ ɓʉa.–
17 Baribʉrʉ dji wẽrãra maʉ̃ ɓʉsriɗa cobada ewari siete panʉne jĩãbadjia. Baridua mĩã sẽ ɓʉ bẽrã sietebema ewariɗe Sansoʉ̃ba idjía jarasia. Ara maʉ̃da wẽrãba pilisteorã treinta panʉ́a jarasia mĩãdjiruba jara ɓʉda.
18 Sietebema ewariɗe queui naẽna pilisteorãra Sansoʉ̃maa wãnapeɗa mĩãdjirura ariɗe nãwã jarasiɗaa:
–Urrajõ cãyãbara ¿cãrẽda cũãara ɓʉ? Imama cãyãbara ¿cãrẽda mẽsrãara ɓʉ?–
Maʉ̃ne Sansoʉ̃ba jarasia:
–Bãrãra mʉ̃ wẽrã ume beɗeapeɗaɗaẽ́bara poya panunaẽ́ bacasia.–*
19 Maʉ̃ne Ãcõrẽ Jaureɗeba Sansoʉ̃ra bio juerza barapeɗa pilisteorã puru Ascaloʉ̃naa wãsia. Mamabemarãda treinta beapeɗa ãdjia cacuaɗe jʉ̃badara edapeɗa mĩãdjiru ariɗe jarapeɗaɗarãa diasia. Mãwãnacarea bio quĩrũ ɓʉda idji zeza deɗaa jẽda wãsia.
20 Maʉ̃ bẽrã idji quima bai ɓaɗa zezaba dji caura Sansoʉ̃ ume ɓaɗa ẽberãa diasia.*
Beɗea eɗaare
^ 14:11 Pilisteorãba Sansoʉ̃ unusiɗaɗe. Hebreo beɗeaɗe mãwã ɓʉ́ ɓʉa. Griegoɗe nãwã ɓʉa: “Pilisteorãba Sansoʉ̃ra waya panʉ bẽrã.”
^ 14:15 Quĩmãrẽbema ewariɗe. Griego beɗeaɗe mãwã ɓʉ́ ɓʉa. Hebreo beɗeaɗe nãwã ɓʉa: “Sietebema ewariɗe.”
^ 14:18 Hebreo beɗeaɗe nãwã ɓʉ́ ɓʉa: “Mʉ̃ paca ume ẽjũãda oɗaẽ́bara mĩãdjirura cawaɗaẽ́ bacasiɗaa.”
^ 14:20 Sansoʉ̃ ume ɓaɗa ẽberãa. Hebreo beɗeaɗe maʉ̃ra ebuɗa ɓʉẽ́a.
