N̄KEDI mbụn̄ọ nnyụn̄ ndụn̄ ye eka mi ke Freetown ke esịt ebiet emi ediwak ubon emi ẹdide ubuene n̄ko ẹkedụn̄de. Sia bụt ye ndịk ẹkesinamde mi ke ntak emi mmen̄kọfiọkke nte isenowo ẹdisede mi, n̄kọwọrọ an̄wa ini kiet ntem kpọt ke ofụri isua 18.

Ke ini n̄kedide isua 18, Pauline Landis emi edide isụn̄utom Mme Ntiense, ama edi esịt ebiet nnyịn edidọhọ ke iyekpep mi Bible. Mma ndọhọ enye ke mfiọkke nte ẹkotde n̄wed ẹnyụn̄ ẹwetde n̄kpọ, enye ama onyụn̄ ọdọhọ ke iyekpep mi. Ntre mma nnyịme enye ekpep mi.

Se n̄kekpepde ke Bible ama anam esịt enen̄ede adat mi. Usen kiet, mma ndọhọ Pauline ke n̄kpama nditiene ndụk mbono esop ke ufọk emi mîkoyomke usụn̄ ikpọn̄ ufọk nnyịn. Mma ndọhọ nte, “Nyada mbio eto oro nsidade nsan̄a isan̄ nsan̄a n̄ka.”

Ke ini Pauline ekedide ndimen mi, eka mi ye mme mbọhọidụn̄ ẹma ẹda ẹse, idem onyụn̄ enyek mmọ. Mma mmụm mbio eto oro nsidade nsan̄a, nnyan nnọ iso iso mbon ke isọn̄. Ekem, nda odudu ndụri idem nnọ iso mbe mbio eto oro. Nte  n̄kamian̄ade mbe esịt okụre, mbọhọidụn̄ nnyịn ẹma ẹfiori Pauline ẹte: “Afo enyenyịk enye. Ini emi enye okodomode ndisan̄a, ikekemeke.”

Pauline ama obụp mi sụn̄sụn̄ ete: “Jay, ndi nyenyịk fi?”

Mma mbọrọ nte: “Ihih. Ami mbiere ke idemmi.”

Mme mbọhọidụn̄ ẹma ẹda ẹse mi ke ndopuyo nte n̄kekperede ndisịm inuaotop. Ke ini n̄kọwọrọde ke esịt ebiet, mmọ ẹma ẹkpọk ukịbe.

Mbono esop oro ama enem mi tutu! Nte ini akakade, mma nnen̄ede mbiere ndisika Ufọkmbono Obio Ubọn̄. Oro ọkọwọrọ ndisimian̄a n̄kesịm utịt efak nnyịn, ndụk taksi, ndien ekem nditọete ẹmen mi ẹdọk edikon̄ obot. Ekesiwak ndidi ntisịm do, ọfọn̄ mi ebịt mbat onyụn̄ ọyọhọ mi idem, ntre mma nsikpụhọ ọfọn̄ ke ufọkmbono. Nte ini akakade, eyenete an̄wan kiet ke Switzerland ama ọnọ n̄kpọitie mbon n̄kpọnnam ẹsọk mi, ndien emi ama esinam nsan̄a eyen eyen.

Ndisikot ifiọkutom nditọete en̄wen emi ẹdide mbon n̄kpọnnam ama esịn udọn̄ ọnọ mi nnam n̄kpọ Jehovah ke ofụri esịt. Ke 1988, mma ntọn̄ọ utom usiakusụn̄ ofụri ini. Mma mbọn̄ akam mben̄e Jehovah nte an̄wam mi nnam se ikọdọn̄de mi, oro edi, ndin̄wam owo ke ubon nnyịn ye ke efakutom nnyịn ẹdi mme asan̄autom Jehovah. Jehovah ama eyere akam mi ke ini n̄kan̄wamde nditọ adiahaeka mi iba ye mma kiet emi n̄kosobode ke ini n̄kọnọde ikọ ntiense efak, ẹbọ akpanikọ.

Idahaemi ubọk emem mi, ntre mbon en̄wen ẹsikpat mi ke n̄kpọitie mbon n̄kpọnnam. Mmesikop mbiakidem kpukpru ini n̄ko. Edi n̄kpọ kiet emi esisụhọrede ubiak mi edi ndikpep mme owo n̄kpọ mban̄a Jehovah. Idatesịt oro nsikopde ke ini n̄kpepde mme owo n̄kpọ isiyakke nnen̄ede n̄kop ubiak, ndien emi esidọn̄ mi esịt sia Jehovah ama an̄wam mi. Ndien idahaemi mmokop inem uwem.