MME Phi·lisʹtine ẹfiak ẹdi ndin̄wana ye Israel. Ikpọ nditọ eka David ita ẹdu idahaemi ke udim ekọn̄ Saul. Ntre, usen kiet Jesʹse asian David: ‘Da ndusụk ibokpot ye mme eboho uyo sọk nditọ ete fo. Se nte etiede ye mmọ.’

Ke David osịmde nna ekọn̄, enye efehe aka udịm ekọn̄ ndiyom nditọ ete esie. Anyan owo Go·liʹath Phi·lisʹtine ọwọrọ edi ndisak nditọ Israel. Enye ke akanam emi kpukpru usenubọk ye mbubreyo ke usen 40. Enye ofiori: ‘Ẹmek owo mbufo kiet an̄wana ye ami. Edieke enye akande owot mi, nnyịn iyedi ifụn mbufo. Edi ke ami n̄kande n̄wot enye, mbufo ẹyedi ifụn nnyịn. Ndori ata nte mbufo ẹmek owo an̄wana ye ami.’

David obụp ndusụk mbon ekọn̄: ‘Nso ke ẹdinọ owo oro owotde Phi·lisʹtine emi onyụn̄ osiode Israel ke bụt emi?’

Owo ekọn̄ ọdọhọ, ‘Saul eyenọ owo oro ediwak inyene. Ndien eyenọ enye adiaha esie ọdọ.’

Edi kpukpru nditọ Israel ẹkop ndịk ẹban̄a Go·li·ath koro enye okponde etieti. Enye ọniọn̄ akan ikpat 9 (n̄kpọ nte meter 3), ndien enyene owo ekọn̄ efen akamade otu ekọn̄ ọnọ enye.

Ndusụk mbon ekọn̄ ẹkesian Saul ete David oyom ndin̄wana ye Go·liʹath. Edi Saul asian David: ‘Afo ukemeke ndin̄wana ye Phi·lisʹtine emi. Afo edi eyenọwọn̄, ndien enye edi owo ekọn̄ ke ofụri uwem esie.’ David ọbọrọ: ‘N̄kowot bear ye lion oro okomụmde erọn̄ ete mi. Ndien Phi·lisʹtine emi eyebiet mmọ. Jehovah eyen̄wam mi.’ Ntre Saul ọdọhọ: ‘Ka, n̄ko Jehovah osụk odu ye afo.’

David ọsụhọde ke idịm akada ndọnọ itiat ition esịn ke ekpat esie. Ekem enye ada utop itiat esie ọwọrọ ndisobo anyan owo oro. Ke Go·liʹath okụtde enye, enye ikemeke ndinịm ke akpanikọ. Enye ekere ke eyemem akaha ndiwot David.

Go·liʹath ete, ‘San̄a di, nyeda okpo fo nnọ mme inuen ye mme unam ẹta.’ Edi David ete: ‘Afo ada ofụt ye eduat ye onyịm etiene mi, edi ami nda enyịn̄ Jehovah ntiene fi. Mfịn emi Jehovah eyeda fi esịn mi ke ubọk ndien nyewot fi.’

Ke oro, David efehe etiene Go·liʹath. Enye osio itiat ke ekpat esie, esịn ke utop itiat, onyụn̄ otop ke ofụri odudu esie. Itiat oro efe nnennen ọtọ ibuot Go·liʹath, enye ọduọ akpa! Ke mme Phi·lisʹtine ẹkụtde ẹte ke owo uko mmọ ọduọ, mmọ kpukpru ẹwọn̄ọde ẹfen̄e. Nditọ Israel ẹbịne mmọ ndien ẹkan ke ekọn̄.