Be ka se isịnede

Be ka se isịnede

 BIBLE OKPỤHỌDE MME OWO

N̄koyomke Ndikpa!

N̄koyomke Ndikpa!
  • ISUA AKAMANADE: 1964

  • EBIET OTODE: ENGLAND

  • SE ENYE EKEDIDE: OTỤTUTỌN̄ EYEN EMI ENYENEDE EYEN

NTE UWEM MI EKETIEDE

N̄kamana ke Paddington, obio emi mme owo ẹwakde etieti ke London ke England. N̄kodụn̄ ye eka mi ye ikpọ nditọeka mi iban ita. Ete mi ama esiwọrọ ọkpọn̄ nnyịn ke ntak emi enye ekesikpade mmịn.

Ke ini n̄kedide eyenọwọn̄, eka mi ama ekpep mi ndisibọn̄ akam kpukpru okoneyo. Mma nnyene ekpri Bible emi ekenyenede n̄wed Psalm kpọt, ndien n̄kesikwọkwọ ndusụk itie ke Psalm. Mmeti usen kiet emi n̄kokotde n̄wed ufọkn̄wed nnyịn n̄kokụt ikọ emi: “Usen kiet usen kiet, owo ayana edi idemekede.” Ikọ emi ama enyek mi idem tutu n̄kemeke ndide idap. Mma nna do n̄kere nte n̄kpọ editiede ye ami ke ini iso. Mma n̄kere ke anaedi enyene ntak emi Abasi okobotde owo, ke enyene ntak emi enye okobotde mi. N̄koyomke ndikpa!

Mma nnen̄ede nyom ndidiọn̄ọ se mme demon ẹsinamde. Mma nsidomo nditịn̄ ikọ ye mme akpan̄kpa, nsisan̄a ye nditọ ufọkn̄wed nnyịn n̄ka udi, nsinyụn̄ ntiene mmọ nse idiọk fim. Kpa ye oro eketiede nte mme n̄kpọ emi ẹnenem nnyịn, mmọ ẹma ẹsisịn nnyịn ndịk ke idem.

Mma ntọn̄ọ ndidu etịme etịme uwem ke ini n̄kedide isua duop kpọt. Mma ntọn̄ọ ndin̄wọn̄ sika, ndien sika ama odụk mi iyịp. Ikebịghike, mma ntọn̄ọ ndin̄wọn̄ ikọn̄ekpo. Ke ini n̄kesịmde isua 11, mma ntọn̄ọ ndin̄wọn̄ mmịn. Kpa ye oro mmen̄kamaha nte mmịn etiede ke inua, ama esinem mi ke ini mmịn anamde mi. Mma nnyụn̄ mma ikwọ ye unek. Mma nsika usọrọ okoneyo ye uwemeyo edieke n̄kemede. Mma nsidịbe n̄wọrọ ke ufọk okoneyo ekem nnyọn̄ ndidụk mbemiso eyo esiere. Sia idem ekesimemde mi eyo ama esiere, mma nsifiak n̄wed. Ndien edieke n̄kade ufọkn̄wed, mma nsin̄wọn̄ mmịn ke ini emi itiede ibet titia en̄wen edikpep nnyịn n̄kpọ.

Ibọrọ udomo mi ama ọdiọk etieti ke akpatre isua mi ke ufọkn̄wed. Eka mi ikenen̄ekede idiọn̄ọ utọ uwem emi n̄kodude, ntre ke ini enye okokụtde nte ibọrọ udomo mi ọkọdiọkde, esịt ama ayat enye. Ima itọhọ, ndien mma mfehe n̄kpọn̄ ufọk. Mma n̄kodụn̄ ye Tony ufan mi emi ekedide owo Rasta. Enye ama esiyịp n̄kpọ onyụn̄ anyam ikọn̄ekpo, ndien  ẹkesida enye nte ata owo afai. Ikebịghike enye ama esịn mi idịbi. N̄kedi isua 16 kpọt ke ini n̄kamande akpan nnyịn.

NTE BIBLE OKOKPỤHỌREDE UWEM MI

Akpa ini emi n̄kosobode ye Mme Ntiense Jehovah ekedi ke ini n̄kodụn̄de ke ufọk emi ukara ẹbọpde ẹnọ mbon emi ẹmande nditọ ke ini mînyeneke ebe. Iban iba emi ẹdide Mme Ntiense Jehovah ẹma ẹsidi do ẹdise ndusụk n̄kaiferi emi ẹmande nditọ. Usen kiet, mma ntiene nsịn uyo ke nneme mmọ. N̄koyom ndiwụt ke se Mme Ntiense Jehovah ẹkpepde inenke. Edi mmọ ẹma ẹda Bible ẹbọrọ kpukpru mbụme oro n̄kenyenede. Mma mma nte mmọ ẹketịn̄de ikọ, ẹfọnde ido, ẹnyụn̄ ẹtiede emem emem. Mma nnyịme mmọ ẹkpep mi Bible.

Ibịghike mma n̄kpep n̄kpọ ke Bible emi okokpụhọrede uwem mi. Toto ke uyen, mma mfehe n̄kpa tutu. Edi mma ndifiọk se Jesus ekekpepde aban̄a ediset ke n̄kpa! (John 5:28, 29) Mma ndifiọk n̄ko ke Abasi ama mi. (1 Peter 5:7) Se Jeremiah 29:11 etịn̄de ama enen̄ede otụk mi. Itie oro ọdọhọ ete: “‘Mmọfiọk ekikere oro ami n̄kerede mban̄a mbufo,’ uyo Jehovah edi emi, ‘ekikere emem, idịghe eke afanikọn̄, man nnọ mbufo ini iso ye idotenyịn.’” Mma ntọn̄ọ ndikere ke mmekeme nditiene ndu uwem ke nsinsi ke Paradise ke isọn̄.—Psalm 37:29.

Mme Ntiense Jehovah ẹma ẹnen̄ede ẹma mi. Nte mmọ ẹkenamde n̄kpọ ye ami akpa usen emi n̄kodụkde mbono esop mmọ ama enen̄ede enem mi, kpukpru owo ẹketie ufan ufan. (John 13:34, 35) Nte mmọ ẹkenamde n̄kpọ ye ami ama enen̄ede okpụhọde ye nte ẹkesinamde n̄kpọ ye ami ke ufọkabasi. Mme Ntiense Jehovah ẹma ẹma mi kpa ye oro n̄kedide idiọk eyen. Mmọ ẹma ẹsidu ye ami, ẹkere ẹban̄a mi, ẹnyụn̄ ẹn̄wam mi. Eketie mi nte ndu ye ubon emi ẹnen̄erede ẹma mi.

Se n̄kekpepde ke Bible ama anam mfiọk ke ana n̄kpụhọde nte nsidude uwem nnyụn̄ ntọn̄ọ ndidu uwem nte Abasi oyomde. Ama ọsọn̄ mi nditre sika. Mma nnyụn̄ mfiọk ke ndusụk ikwọ oro nsikopde ẹsinam ọdọn̄ mi ndin̄wọn̄ ikọn̄ekpo. Ntem mma ntre ndibre utọ ikwọ oro. Mma ntre ndisika usọrọ uwemeyo ye okoneyo sia n̄koyomke ndikpa mmịn aba. Mma nnyụn̄ ntọn̄ọ ndinam ufan ye mbon oro ẹdin̄wamde mi ndu eti uwem.—Mme N̄ke 13:20.

Tony n̄ko ke ekekpep Bible ye Mme Ntiense Jehovah. Nte Mme Ntiense ẹkedade Bible ẹbọrọ mbụme esie ama anam enye enịm ke mmọ ẹkpep akpanikọ. Enye ama enen̄ede okpụhọde nte enye esidude uwem: etre ndidụk ndụk ye mbon emi enye ekesisan̄ade kiet anam afai, etre ndiyịp n̄kpọ, onyụn̄ etre ndin̄wọn̄ ikọn̄ekpo. Ima ikụt ke ana inam ndọ man inem Jehovah esịt inyụn̄ inam eyen nnyịn ekeme ndikop inem ete ye eka esie. Ikanam ndọ ke 1982.

“Nnaha aba okoneyo ntịmede esịt mban̄a ini iso m̀mê n̄kpa”

Mmeti nte n̄kesikotde Enyọn̄-Ukpeme ye Ẹdemede! * mban̄a mbon emi ẹkekemede ndikpụhọde uwem mmọ nte ami n̄konyụn̄ nyomde ndikpụhọde. Uwụtn̄kpọ mmọ ama anam n̄kere ke mmekeme ndikpụhọde. Emi ama anam n̄ka iso nsịn ukeme utu ke ndiyak idem emem mi. Mma nsibọn̄ akam nnọ Jehovah nte aka iso enyene ime ye ami. Ami ye ebe mi ima ina baptism ke July 1982.

UFỌN ORO MBỌDE

Ndidi ufan Jehovah Abasi anam ndu uwem nsịm mfịn. Ami ye Tony ebe mi imokụt nte Jehovah an̄wamde nnyịn ikpụhọde. Imekpep ndiberi edem ke Abasi ke ofụri isua emi, imonyụn̄ ikụt nte Jehovah an̄wamde onyụn̄ ọsọn̄ọde nnyịn idem.—Psalm 55:22.

Enem mi nte n̄kan̄wamde akpan ye adiaha nnyịn ẹdiọn̄ọ Jehovah nte ami ndiọn̄ọde. Enem mi n̄ko ndikụt nditọ mmọ ẹsọn̄ọde ẹda ẹnam n̄kpọ Abasi.

Nnaha aba okoneyo ntịmede esịt mban̄a ini iso m̀mê n̄kpa. Ami ye ebe mi imesisan̄a ise nsio nsio esop Mme Ntiense Jehovah kpukpru urua inyụn̄ isọn̄ọ mmọ idem. Imesitiene nditọete ke mme esop emi ikpep mme owo ke edieke mmọ ẹbuọtde idem ye Jesus, ke mmọ n̄ko ẹyenyene nsinsi uwem.

^ ikp. 17 Mme Ntiense Jehovah ẹsio.