Yak idọhọ ke ete eneme nneme ye eyen esie emi edide isua itiaba. Enye ọdọhọ eyen esie ete, “Anyan ini ko, Abasi okobot isọn̄ ye kpukpru se idude ke isọn̄; enye okobot utịn ye ọfiọn̄ ye ntantaọfiọn̄.” Eyen emi atuak ada ekere n̄kpọ emi onyụn̄ obụp ete esie ete, “Papa, anie okobot Abasi?”

Ete esie ọbọrọ ete, “Idụhe owo emi okobotde Abasi. Enye inyeneke ntọn̄ọ.” Ekpri ibọrọ oro ekem eyen oro. Edi nte enye osụk okponde, enye afiak ekere mbụme oro. Ọsọsọn̄ enye ndinịm ke owo ekeme ndidu inyeneke ntọn̄ọ. Ekondo nnyịn akam enyene ntọn̄ọ. Enye osụk ekere m̀mê Abasi akasasan̄a didie edidu.

Didie ke Bible ọbọrọ mbụme emi? Bible etịn̄ ukem se ete emi eketịn̄de ọnọ eyen esie. Moses ekewet ete: “O Jehovah, . . . mbemiso mme obot ẹkemanade, m̀mê mbemiso afo akanamde isọn̄ ye ererimbot amana nte ke ubiak uman, ke nsinsi nsinsi afo edi Abasi.” (Psalm 90:1, 2) Kpasụk ntre, prọfet Isaiah ọkọdọhọ ete: “Nte afo ufiọkke, nte afo unyụn̄ ukopke? Jehovah, kpa Andibot utịt isọn̄, edi Abasi ke nsinsi nsinsi”! (Isaiah 40:28) N̄ko, leta Jude ọdọhọ ke Abasi odu “ke ofụri eyo emi ekebede.”—Jude 25.

Mme itie N̄wed Abasi emi ẹwụt ke Abasi edi “nsinsi Edidem,” nte apostle Paul eketịn̄de. (1 Timothy 1:17) Emi ọwọrọ ke Abasi inyeneke ntọn̄ọ. Enye inyụn̄ inyeneke utịt. (Ediyarade 1:8) Akpan n̄kpọ kiet emi anamde enye edi Ata Ọkpọsọn̄ Abasi edi emi.

Ntak emi n̄kpọ emi mîsọpke in̄wan̄a nnyịn? Sia nnyịn mîdụhe uwem ibịghi, nte nnyịn isede ini enen̄ede okpụhọde ye nte Jehovah esede. Sia Abasi odude uwem ke nsinsi, tọsịn isua kiet etie enye nte usen kiet. (2 Peter 3:8) Da ataktak ke uwụtn̄kpọ: Ndi isua 70 m̀mê 80 emi nnyịn isidude uwem ekeme ndin̄wan̄a ataktak emi esidude uwem n̄kpọ nte usen 50 kpọt? Ikemeke! Bible ọdọhọ ke edieke ẹmende nnyịn ẹdomo ye Akwa Andibot nnyịn, ke nnyịn itie nte ataktak. Ekikere nnyịn imenke-men udomo ye esie. (Isaiah 40:22; 55:8, 9) Ntem, ikpanaha idem akpa nnyịn ndikop ke odu ndusụk n̄kpọ oro aban̄ade Jehovah emi mîdinen̄ekede in̄wan̄a nnyịn.

Okposụkedi ndidọhọ ke Abasi inyeneke ntọn̄ọ inyụn̄ inyeneke utịt mîdisọpke in̄wan̄a nnyịn, emi esịne ifiọk. Edieke owo en̄wen okpobotde Abasi, ọwọrọ owo oro ekpedi Andibot. Edi Bible ọdọhọ ke Jehovah ‘okobot kpukpru n̄kpọ.’ (Ediyarade 4:11) N̄ko, imọfiọk ke enyene ini emi ekondo mîkodụhe. (Genesis 1:1, 2) Ekondo akasan̄a didie edidu? Akana Andibot ekondo ebem iso odu. Enye ama odu mbemiso owo en̄wen ekededi; odu mbemiso ikpọn̄-ikpọn̄ edibon Eyen esie ye mme angel. (Job 38:4, 7; Colossae 1:15) Emi ọwọrọ ke Abasi ikpọn̄ ekebem iso odu. Idụhe nte ẹkpebotde enye sia owo m̀mê n̄kpọ ndomokiet ikebemke enye iso idu emi okpobotde enye.

Uwem emi idude mi ye ekondo nnyịn ẹwụt ke nsinsi Abasi odu. Abasi emi okobotde ekondo nnyịn onyụn̄ anamde mme ibet emi ẹkarade ekondo, inyeneke ntọn̄ọ. Enye ikpọn̄ okobot kpukpru n̄kpọ eken.—Job 33:4.