Inemesịt Emi Odude ke Ndinọ Enọ

“Inemesịt odu ke ndinọnọ akan ke ndibọbọ.”—UTOM 20:35.

Ntak emi ndusụk owo ẹsidiade Christmas.

Jesus ọkọdọhọ ke owo emi ọnọde owo n̄kpọ ye owo emi ọbọde ẹsikop inemesịt. Man ẹkop inemesịt emi, ediwak owo ẹda Christmas nte ata akpan ini ndinọ enọ. Kpa ye oro n̄kpọ ekenen̄erede ọsọn̄ ke idụt Ireland isua oko, ndụn̄ọde oro ẹkenamde owụt nte ke edieke ẹbaharede ukem ukem, ke ubon kiet kiet ẹma ẹbiat se iwakde ibe tọsịn naira ikie ẹdep mme enọ Christmas.

Ntak emi ọsọn̄de ndikop inemesịt?

Ediwak owo ẹkere ke ndinọ owo enọ ke ini Christmas esisan̄a ye editịmede esịt utu ke inemesịt. Ntak? Ediwak owo ẹsiyom ndidep enọ oro ubọk mmọ mîsịmke. Ndien sia ediwak owo ẹsidepde n̄kpọ ke ukem ini, mme owo ẹsiwak, udịm ẹsinyụn̄ ọniọn̄ akaha, anamde ediwak owo ẹkpa mba.

Mme edumbet Bible ewe ẹkeme ndin̄wam?

Jesus ọkọdọhọ ete: “Ẹnọ owo n̄kpọ.” * (Luke 6:38) Enye ikọdọhọke ẹbet tutu esịm akpan ini ke isua ndien ẹnọ owo enọ, utu ke oro enye ọkọdọhọ yak mme mbet esie ẹnam edi ido mmọ ndisinọ owo enọ.

“Yak owo kiet kiet anam kpa nte enye ebierede ke esịt esie, okûnam mmen̄e mmen̄e m̀mê ke edinyenyịk, koro Abasi amama owo eke ọnọde ke idatesịt.” (2 Corinth 9:7) N̄wed kiet ọdọhọ ke item apostle Paul emi ọwọrọ ke “owo ikpọnọhọ owo n̄kpọ ke ntak emi ‘ẹnyịkde-nyịk’ enye anam ntre.” ‘Owo oro esinọde owo n̄kpọ ke idatesịt’ isikereke ke obiomo imọ ndidep akpan enọ nnọ san̄asan̄a owo ke akpan ini ke isua, nte ẹsinamde ke ini Christmas.

“Edieke edinyịme akam odude, enen̄ede enem Abasi esịt ndibọ nte ekemde ye se owo enyenede, idịghe se owo mînyeneke.” (2 Corinth 8:12) Abasi iyomke ikọt esie ẹkama isọn man ẹkeme ndidep enọ oro ọsọn̄de urua. Utu ke oro, “enen̄ede enem Abasi” esịt ndibọ enọ oro “ekemde ye se owo enyenede.” Emi enen̄ede okpụhọde ye nte mme anyamurua ẹsinamde n̄kpọ. Mmọ ẹsisesịn udọn̄ ẹnọ mme owo ẹdep n̄kpọ ke isọn ke ini Christmas!

[Ikọ Idakisọn̄]