Didie ke Jesus Ekese Mbre Ukara?

MME andiwet Gospel ẹtịn̄ nsio nsio idaha oro ẹkeyomde Jesus etiene ebre mbre ukara. Ke uwụtn̄kpọ, ke ndondo oro enye anade baptism ama ke ini enye edide n̄kpọ nte isua 30, Devil ama ọn̄wọn̄ọ ndinọ enye ukara ofụri ererimbot. Nte ini akakade, mme owo ẹma ẹdomo ndinam enye edidem. Mbon en̄wen ẹnyụn̄ ẹdomo ndinam enye etịn̄ ikọ emi owụtde m̀mê enye ada ọnọ ewe ukara. Jesus akanam n̄kpọ didie? Ẹyak ise.

Andikara ofụri ererimbot. Bible ọdọhọ ke Devil ama ọnọ Jesus “kpukpru mme obio ubọn̄ ererimbot” emi. Kere utọ nti n̄kpọ emi Jesus akpanamde ọnọ ubonowo edieke enye ekpedide andikara ererimbot emi! Ndi odu ama-mbre ukara ekededi emi enen̄erede oyom nte ọkpọkọkde mfịna ubonowo, emi ekpesịnde utọ enọ emi? Edi Jesus ama esịn.—Matthew 4:8-11.

Edidem. Ediwak mbon eyo Jesus ẹma ẹnen̄ede ẹyom andikara emi edikọkde kpukpru mfịna mmimọ. Ke ini mmọ ẹkekụtde mme utịben̄kpọ emi Jesus akanamde, mmọ ẹma ẹnem esịt ẹnyụn̄ ẹyom ndinam Jesus edidem. Edi nso ke Jesus akanam? Bible ọdọhọ ete: “Ke Jesus ọfiọkde ete mmọ ẹyom ndimụm imọ nnịm ke edidem, enye afiak ọnyọn̄ obot sụk enye ikpọn̄.” (John 6:10-15) Omokụt do ke Jesus ikesịnke idem ke mbre ukara.

Owo emi adade ọnọ ukara emi m̀mê oko. Ndi emeti se iketịbede usen ifan̄ mbemiso ẹwot Jesus? Ndusụk mme Pharisee emi mîkamaha ukara Rome ẹma ẹsan̄a ye n̄ka mme anditiene Herod emi ẹkemade ukara Rome ẹbịne Jesus. Mmọ ẹkeyom Jesus etịn̄ m̀mê enye ada ọnọ ewe ukara. Ntre mmọ ẹma ẹbụp enye m̀mê akpana mme Jew ẹsikpe tax ẹnọ ukara Rome m̀mê ẹkûkpe.

Mark ewet se Jesus ọkọbọrọde ete: “‘Ntak emi mbufo ẹdomode mi? Ẹmen denarius ẹsọk mi nse.’ Mmọ ẹda kiet ẹdi. Ndien enye obụp mmọ ete: ‘Mbiet ye enyịn̄ emi ẹdi  eke anie?’ Mmọ ẹte enye: ‘Eke Caesar.’ Jesus ndien ọdọhọ ete: ‘Ẹnọ Caesar se inyenede Caesar, ẹnyụn̄ ẹnọ Abasi se inyenede Abasi.’” (Mark 12:13-17) N̄wed oro, Church and State—The Story of Two Kingdoms etịn̄ ntak emi Jesus ọkọbọrọde ntre ete: “Enye ikesịnke idem ke mbre ukara, edi ama owụt ke owo ikpadaha n̄kpọ Abasi ibuak ye eke Caesar.”

Jesus ndiketre ndisịn idem ke mbre ukara iwọrọke ite ke unana, ubiatibet, ye ukwan̄ikpe emi mme owo ẹkesobode ikafịnake enye. Ke nditịm ntịn̄, Bible ọdọhọ ke mbọm mme owo ama enen̄ede anam enye. (Mark 6:33, 34) Kpa ye oro, Jesus ikọtọn̄ọke ndisịn idem ke mbre ukara man etre kpukpru utụk ye ufịk ererimbot emi, okposụkedi emi ndusụk owo ẹkedomode ndinam enye etiene esịn idem.

Se inemede emi owụt ke Jesus iketieneke isịn idem ke mbre ukara. Edi nso kaban̄a mme Christian mfịn? Ndi akpana mmọ ẹtiene ẹbre mbre ukara?