Kpep N̄kpọ to Ikọ Abasi

Ntak Emi Mme Christian Ẹsinade Baptism-e?

Ibuotikọ emi ọbọrọ mme mbụme emi ẹkemede ndidi emesibụp onyụn̄ owụt n̄ko ebiet emi okpokụtde ibọrọ ke Bible fo. Mme Ntiense Jehovah ẹyema ndinam ibọrọ mbụme emi enen̄ede an̄wan̄a fi.

1. Baptism emi mme Christian ẹsinade ada aban̄a nso?

Baptism edi eben̄e eke owo eben̄ede Abasi ete idi ufan esie. Ntre ana Christian ana baptism ke ama okokpon owo ekeme ndikpep n̄kpọ mban̄a Abasi nnyụn̄ n̄keme ndidi mbet Jesus, idịghe ke ini enye edide nsek. (Utom 8:12; 1 Peter 3:21) Nnyịn idi mbet Jesus ke ini ikpepde inyụn̄ inamde mme n̄kpọ oro enye okowụkde.—Kot Matthew 28:19, 20.

Ke eyo mme apostle Jesus, ediwak owo ẹma ẹnam n̄kpọ ye unana ubiatini man ẹkpep n̄kpọ ẹban̄a Abasi ye Jesus. Ke uwụtn̄kpọ, ke ini ete kiet ekekpepde nte ke n̄kpa Jesus anam ẹnyene edinyan̄a, enye ama ọsọsọp akabade edi mbet Jesus. Mfịn, ediwak owo ẹbiere ndidi mbet Jesus.—Kot Utom 8:26-31, 35-38.

2. Ntak emi Jesus akanade baptism-e?

Jesus ekedi n̄kpọ nte isua 30 ke ini John Andinịm Owo Baptism okobụkde enye ke mmọn̄ ke Akpa Jordan. Baptism Jesus okowụt ke enye ebiere ndinam uduak Abasi. (Mme Hebrew 10:7) Emi eyesịne enye ndiyak uwem esie nnọ nte uwa man emen idiọkn̄kpọ ubonowo efep. Idem mbemiso enye otode heaven edi isọn̄, Jesus ama esima Jehovah onyụn̄ okop uyo esie kpukpru ini.—Kot Mark 1:9-11; John 8:29; 17:5.

  3. Ntak emi anade Christian ana baptism-e?

Nnyịn ikadada idiọkn̄kpọ imana, itiehe nte Jesus emi ekedide mfọnmma owo. Edi Jesus ndikakpa man afak nnyịn anam nnyịn ikeme ndidi ufan Abasi. (Rome 5:10, 12; 12:1, 2) Imekeme ndidi ikọt esie. (2 Corinth 6:18) Nso ke ikpanam man idi ikọt esie? Edi ndibọn̄ akam nnọ Jehovah, nyak idem nnọ enye nnyụn̄ n̄n̄wọn̄ọ ndinam n̄kpọ esie ke ofụri eyouwem nnyịn. Ke ima ikayak idem ntre inọ enye, iyana baptism man iwụt emi an̄wan̄wa.—Kot Matthew 16:24; 1 Peter 4:2.

4. Didie ke ekpeben̄e idem ndina baptism?

Mme Ntiense Jehovah ẹsikpep Bible ye owo ekededi oro oyomde ndisan̄a n̄kpere Abasi. Ndikpep Bible nnyụn̄ ndụk mme mbono esop Christian ayan̄wam fi etetịm ama Abasi onyụn̄ ọsọn̄ọ mbuọtidem fo ke Abasi. Ndikpep Bible oyonyụn̄ an̄wam fi enyene nti edu. Ndinyene ima, mbuọtidem, ye nti edu eken ayan̄wam fi anam n̄kpọ Jehovah ke nsinsi nte ọkọn̄wọn̄ọde.—Kot John 17:3; Mme Hebrew 10:24, 25.

Edieke oyomde ndifiọk n̄kpọ en̄wen, mbọk kot ibuot 18 ke n̄wed Mme Ntiense Jehovah emi Nso Ke Bible Enen̄ede Ekpep?