Ndi Ama Ọfiọk?

Nso ke apostle Paul ekenyene ke ekikere ke ini enye eketịn̄de aban̄a “isan̄ edikan”?

▪ Paul ekewet ete: “Abasi [ada] nnyịn usụn̄ . . . ke isan̄ edikan ke ebuana ye Christ onyụn̄ [ada] nnyịn anam ẹkop ufịk ifiọk esie ke kpukpru ebiet! Koro nnyịn idi edinem ufịk emi Christ osion̄ode ọnọ Abasi ke otu mbon oro ẹnyan̄ade ye ke otu mbon oro ẹtakde; ye mmọ eke ẹtakde, itie nte ufịk eke ọkọrọde n̄kpa ke n̄kpa, ndien ye mmọ eke ẹnyan̄ade, itie nte ufịk eke ọkọrọde uwem ke uwem.”—2 Corinth 2:14-16.

Paul eketịn̄ aban̄a isan̄ idara emi mbon Rome ẹkesisan̄ade ẹnọ etubom ekọn̄ emi akakande mme asua idụt mmọ. Ẹma ẹsiwụt mme n̄kpọ mbụme ye mbuotekọn̄ ẹnyụn̄ ẹda nyara enan̄ ẹka ndiwa, otuowo ẹkpọk ukịbe ẹnọ etubom emi ye udịmekọn̄ esie ke ini edinam emi. Ke ẹma ẹkesan̄a isan̄ emi ẹma, ẹma ẹsiwa nyara enan̄ oro, ndien etie nte ẹma ẹsiwot ediwak ke otu mbuotekọn̄ oro.

The International Standard Bible Encyclopedia ọdọhọ ke etie nte ndamban̄a ikọ oro “edinem ufịk emi Christ osion̄ode,” emi ọwọrọde uwem ọnọ ndusụk owo onyụn̄ ọwọrọde n̄kpa ọnọ ndusụk owo “oto edinam ufọp incense emi mbon Rome ẹkesifọpde nte mmọ ẹsan̄ade isan̄ edikan. Edinem ufịk emi akadade aban̄a edikan ọnọ mme andikan ama eti mbuotekọn̄ aban̄a n̄kpa oro ekebetde mmọ.” *

Nso ikedi Mme “edikon̄ ebiet” oro ẹtịn̄de ẹban̄a ndien ndien ke N̄wed Abasi Usem Hebrew?

▪ Ke ini nditọ Israel ẹkeyomde ndidụk Isọn̄ Un̄wọn̄ọ, Jehovah ama ọdọhọ mmọ ete ẹbiat kpukpru itie oro mbon Canaan oro ẹkedụn̄de do ẹkesidade ẹtuak ibuot. Abasi okowụk mmọ ete: “Ẹbiat kpukpru owo itiat mmọ, ẹnyụn̄ ẹbiat kpukpru editara mbiet mmọ, ẹnyụn̄ ẹwụri kpukpru edikon̄ ebiet mmọ.” (Numbers 33:52) Etie nte mme ebiet utuakibuot oro ẹkedi an̄wan̄wa ibuot obot m̀mê n̄kpoto emi ẹketuakde ke mme ebiet en̄wen, utọ nte ke idak eto m̀mê ke ikpọ obio. (1 Ndidem 14:23; 2 Ndidem 17:29; Ezekiel 6:3) Etie nte mme adaha m̀mê eto n̄kpe, ndisọi mbiet, mme adaha incense, ye mme n̄kpọ utuakibuot eken ẹma ẹdu ke mme ebiet emi.

Mbemiso ẹkebọpde temple ke Jerusalem, nditọ Israel ẹkesituak ibuot ẹnọ Jehovah ke mme ebiet oro enye ekenyịmede, oro N̄wed Abasi okotde edikon̄ ebiet. Samuel, prọfet Abasi ama awa uwa ke “edikon̄ ebiet” ke obio kiet oro owo mîsiakke enyịn̄ ke isọn̄ Zuph. (1 Samuel 9:11-14) Edi ke ẹma ẹkebọp temple, ibat ibat ndidem oro ẹkenamde akpanikọ ẹnọ Jehovah ẹma ẹdomo ndibiat mme “edikon̄ ebiet” mfep ke isọn̄ oro.—2 Ndidem 21:3; 23:5-8, 15-20; 2 Chronicles 17:1, 6.

[Ikọ Idakisọn̄]

[Ndise ke page 23]

Ubak ndise emi owụtde nte mbon Rome ẹsan̄ade isan̄ edikan ke n̄kpọ nte isua 1,900 emi ẹkebede

[Ebiet ẹdade n̄kpọ ẹto]

Ẹbọ Itie Ubon N̄kpọeset Britain unyịme ẹsio ndise emi

[Ndise ke page 23]

Utak-usụhọ eto n̄kpe ke Gezer