Se Ibuanade ke Ndifiọk Enyịn̄ Abasi

NDI enyịn̄ fo enen̄ede enyene se ọwọrọde? Edi ọsọ n̄kpọ ke ndusụk ebiet ndisio eyen enyịn̄ emi enen̄erede enyene se ọwọrọde. Enyịn̄ emi ẹsiode eyen ekeme ndiwụt se ete ye eka esie ẹnịmde ke akpanikọ ye edumbet emi mmọ ẹdade ẹdu uwem m̀mê se mmọ ẹdoride enyịn ẹban̄a ẹnyụn̄ ẹyomde eyen oro anam ke ini iso.

Edisio mme owo enyịn̄ oro enen̄erede enyene se ọwọrọde itọn̄ọke mfịn. Ke eyo Bible, ẹkesisio mme owo enyịn̄ ke ntak se enyịn̄ oro ọwọrọde. Enyịn̄ ekeme ndiwụt se ẹdoride enyịn owo oro ndinam. Ke uwụtn̄kpọ, ke ini Jehovah akasiande David aban̄a se Solomon eyen esie edinamde, Jehovah ọkọdọhọ ete: “Enyịn̄ esie eyekere Solomon [emi otode ikọ oro ọwọrọde “Emem”], ndien nyọnọ Israel ifụre ke eyo esie.”—1 Chronicles 22:9.

Ndusụk ini Jehovah ama esinọ owo obufa enyịn̄ emi ekekemde ye se owo oro edinamde. Ẹma ẹnọ n̄wan Abraham emi ekedide ada obufa enyịn̄ oro Sarah, emi ọwọrọde “Ọbọn̄ An̄wan.” Ntak-a? Jehovah ama anam an̄wan̄a ete: “Nyonyụn̄ ndiọn̄ enye, nnyụn̄ nnọ fi eyen eke otode enye ke idem n̄ko; nnyụn̄ ndiọn̄ enye, ndien enye ayakabade edi eka idụt; ndidem idụt ẹyeto enye ke idem.” (Genesis 17:16) An̄wan̄a ke ndifiọk ntak emi ẹkenọde Sarah obufa enyịn̄ ama anam ẹfiọk obufa utom esie.

Nso kaban̄a enyịn̄ emi ọwọrọde n̄kpọ akan kpukpru enyịn̄—oro edi, Jehovah? Nso ke enye ọwọrọ? Ke ini Moses okobụpde Abasi m̀mê nso idi enyịn̄ Esie, Jehovah ọkọbọrọ ete: “Ami nyakabade ndi se ndikabarede ndi.” (Exodus 3:14, NW) Edikabade eke Rotherham akabade enye ntem: “Ami Nyakabade Ndi se ededi eke mmade.” Enyịn̄ Jehovah owụt ke enye edi Abasi emi ekemede ndinam anana-ibat utom. Yak inọ ata mmemmem uwụtn̄kpọ: Ekeme ndiyom eka anam ediwak utom ke usen man ese aban̄a nditọ esie—nte andise mban̄a owo udọn̄ọ, etemudia, andikpep—etiene se ẹyomde. Kpa ntre ke edi ye Jehovah, okposụkedi emi esiemmọ edide ke ata akamba udomo. Enye ekeme ndikabade ndi se ededi oro enye amade, anam utom ekededi, man anam nti n̄kpọ oro enye aduakde aban̄a ubonowo. Ke ntem, ndifiọk Jehovah ke enyịn̄ abuana ndifiọk, ndikpono, nnyụn̄ n̄wụt esịtekọm mban̄a ediwak utom esie.

Edi n̄kpọ mbọm nte ke mbon oro mîfiọkke Abasi ke enyịn̄ ifiọkke ndiye edu esie. Edi edieke afo ekpepde Bible, afo emekeme ndifiọk mme utom Jehovah nte ọniọn̄ ọniọn̄ Ọnọ-Item, okopodudu Andinyan̄a, ye atat-ubọk Andinọ, ke ndisiak ibat ibat. Ke akpanikọ, se enyịn̄ Jehovah enen̄erede ọwọrọ enyene uten̄e.

Kpa ye oro, isidịghe mmemmem ndifiọk Abasi ke enyịn̄. Ibuotikọ oro etienede eyetịn̄ ntak.