Mbụme Oro Mme Andikot Ẹbụpde

M̀mọ̀n̄ ke Ẹdin̄wana Ekọn̄ Armageddon?

Idụhe akpan ebiet oro ẹdin̄wanade ekọn̄ Armageddon. Utu ke oro, edin̄wana enye ke ofụri isọn̄. Ntak-a? Koro otu iba oro ẹdin̄wanade ekọn̄ emi ẹwak etieti, ndien idụhe akpan ebiet ke isọn̄ oro ekpekemde mmọ.

Armageddon m̀mê Har–Magedon edi “ekọn̄ akwa usen Abasi Ata Ọkpọsọn̄.” Jehovah Abasi ayada Jesus Christ Eyen esie etịm udịm mme angel oro ẹdin̄wanade ye kpukpru ndiọi andikara isọn̄.—Ediyarade 16:14; 19:11-16.

Nte ededi, Satan ada odudu esie atap mme idụt esịn ke ekọn̄ emi. Bible ọdọhọ ke “spirit mme demon . . . ẹwọn̄ọ ẹbịne ndidem ofụri isọn̄, nditan̄ mmọ mbok ọtọkiet . . . ke ebiet emi ẹkotde ke usem Hebrew, Har-Magedon.”—Ediyarade 16:14-16.

Idụhe itie N̄wed Abasi oro anamde mme owo ẹnen̄ede ẹkere se Armageddon ọwọrọde nte n̄wed Ediyarade. Ediwak mbon oro ẹsikerede ke se n̄wed Ediyarade etịn̄de editịbe ke ata ata usụn̄ ẹsiak ebiet oro mmọ ẹkerede ke ekọn̄ emi ẹdin̄wana, ndien mmọ ẹtịn̄ enyịn ẹse mme n̄kpọ oro ẹtịbede ke n̄kann̄kụk oro. Akani n̄wed Usem Greek oro Oecumenius ekewetde ke ọyọhọ isua ikie itiokiet E.N., emi etịn̄de n̄kpọ aban̄a Ediyarade ọdọhọ ke enyene ebiet emi ẹkotde Armageddon.

Se John F. Walvoord, akani etieibuot ke ufọkn̄wed ukpep utom oku ke Dallas, etịn̄de owụt ke enye enyịme ye se ediwak mme adaiso ido ukpono ẹtịn̄de ẹban̄a se Armageddon edide. Enye ọdọhọ ke Armageddon edi “akpatre enyene-ndịk ekọn̄ oro ẹdin̄wanade ke Ufọt Ufọt Edem Usiahautịn.” Walvoord ọdọhọ n̄ko ke ẹdin̄wana enyene-ndịk ekọn̄ emi ke “‘Obot Megiddo,’ kpa ekpri obot emi odude ke edem edere Palestine ke utịt utịt akwa itịghede.”

Edi n̄wed Ediyarade itịn̄ke iban̄a akpan ebiet emi ẹkotde Armageddon. Ediyarade 1:1 ọdọhọ ke se idọn̄ọde ke n̄wed emi ẹdi “mme idiọn̄ọ.” Mme Ntiense Jehovah ẹma ẹwewet anyan ini ko ke n̄wed mmọ oro Studies in the Scriptures, Eboho IV, ẹte: “Nnyịn ikpodorike enyịn ndikụt ẹtan̄de mme owo ẹbok ọtọkiet ke ata ata Obot Megiddo.”

Se ikesitịbede ke Megiddo owụt ke mme asua Abasi idibọhọke. Ke ntre, Abasi edida Armageddon osio idiọkido efep ke ofụri isọn̄.—Ediyarade 21:8.

Mbon oro ẹmade Jehovah Abasi ye Eyen esie, Jesus Christ, ikpenyeneke ndikop ndịk mban̄a Armageddon. Abasi edin̄wana ye mme idiọkowo oro enye okụtde ke idikabakede esịt tutu amama. Enye idisoboke kpukpru owo. Bible ọdọhọ ke “Jehovah ọfiọk nte anyan̄ade mbon uten̄e Abasi.” (2 Peter 2:9) Psalm 37:34 etịn̄ inem inem un̄wọn̄ọ emi ete: “Bet Jehovah, nyụn̄ nịm ido esie, ndien enye eyemenede fi enịm ke enyọn̄, man ada isọn̄ enyene. [“Ke ini ẹdikpokde mme idiọkowo ẹfep, afo oyokụt,” NW].”