Ndi Emesiyak Jehovah Obụp Fi Mbụme?

EDIWAK mbụme oro ẹdụkde owo ọkpọ ẹyọyọhọ Bible. Jehovah Abasi esida mbụme ekpep mme owo akpan n̄kpọ. Ke uwụtn̄kpọ, enye ama obụp Cain ediwak mbụme ndida nnọ enye item nnyụn̄ ndụri enye utọn̄ mban̄a idiọk afan̄ oro enye okoyomde ndidụk. (Gen. 4:6, 7) Ndusụk ini, mbụme kiet kpọt oro Jehovah obụpde esinam owo anam se ifọnde. Ke ini prọfet Isaiah okokopde Jehovah obụpde ete: “Anie ke ndidọn̄ utom? Anie edinyụn̄ aka n̄kpọ ọnọ nnyịn?” Enye ama ọbọrọ ete: “Se mi, dọn̄ mi utom.”—Isa. 6:8.

Jesus, kpa Akwa Andikpep, ama esinyụn̄ obụp mbụme n̄ko. Se ibede mbụme 280 emi Jesus okobụpde ẹdu ke mme Gospel. Kpa ye oro enye ekesibụpde mbụme ndusụk ini man okụbi mme asua inua, se ikesinamde enye ama ndibụp mbụme ekedi man anam mbon oro ẹkpan̄de utọn̄ ẹnọ enye ẹfiọk akpanikọ, ẹnyụn̄ ẹkere ẹban̄a idaha mmọ ke iso Abasi. (Matt. 22:41-46; John 14:9, 10) Apostle Paul emi ekewetde n̄wed 14 ke N̄wed Abasi Christian Usem Greek ama esima ndibụp mbụme n̄ko. (Rome 10:13-15) Ata ediwak mbụme ẹdu ke leta oro enye ekewetde mbon Rome. Mbụme esie ama anam mbon oro ẹkekotde leta esie ẹfiọk ẹnyụn̄ ẹwụt esịtekọm ẹbana “inyene ye ọniọn̄ ye ifiọk Abasi.”—Rome 11:33.

Ẹsibụp ndusụk mbụme man ẹnọ ibọrọ, edi odu ndusụk emi ẹsibụpde man ẹnam mme owo ẹnen̄ede ẹtie ẹkere n̄kpọ. Se idude ke mme Gospel ẹwụt ke Jesus ekesima ndibụp mbụme man anam mme owo ẹtie ẹkere n̄kpọ. Usen kiet enye ama ọdọhọ mme mbet esie “ẹkpeme mbak leaven mme Pharisee ye leaven Herod,” oro edi, ẹkûtiene mmọ udu uwem esịt iba m̀mê ndikpan̄ utọn̄ nnọ nsunsu ukpepn̄kpọ mmọ. (Mark 8:15; Matt. 16:12) Mme mbet Jesus ẹkekere ke Jesus eketịn̄ aban̄a uyo emi mmimọ mîketịghi imen, ntre mmọ ẹma ẹtọn̄ọ ndineni mban̄a oro. Kop se Jesus okobụpde mmọ nte mmọ ẹsụk ẹnenide ẹban̄a n̄kpọ emi. “Enye [ama] ọdọhọ mmọ ete: ‘Ntak emi mbufo ẹnenide ẹban̄a nte mbufo mînyeneke uyo? Nte mbufo ikwe kan̄a inyụn̄ ifiọkke se emi ọwọrọde? Nte esịt mbufo isọpke ndifiọk n̄kpọ? “Nte mbufo ẹnyenyene enyịn, edi ikwe usụn̄; ẹnyụn̄ ẹnyenyene utọn̄, edi ikopke ikọ?” . . . Nte mbufo isụk ifiọkke se emi ọwọrọde?’” Jesus okobụp mbụme emi man anam mmọ ẹkere n̄kpọ, ẹnyụn̄ ẹfiọk se ikọ imọ ọwọrọde.—Mark 8:16-21.

‘Yak Mbụp Fi Ise’

Jehovah Abasi ama obụp asan̄autom esie emi ekekerede Job mbụme man enen̄ede ekikere esie. Mme mbụme emi ẹma ẹnam Job ọfiọk ke imọ idịghe-di se ẹdade ẹdomo ye Andibot imọ. (Job, ib. 38-41) Ndi ekere ke Jehovah okoyom Job ọbọbọrọ mme mbụme oro? Etie nte idịghe se Jehovah okoyomde edi oro. Enye ndibụp Job, “Afo okodu m̀mọ̀n̄ ke ini [n̄kọtọn̄ọde] ndinam ererimbot?” owụt ke enye okoyom Job etie ekere n̄kpọ onyụn̄ owụt esịtekọm. Ke ama okobụp Job mme mbụme emi, uyo ama odụk Job idịbi. N̄kukụre se enye ọkọdọhọde ekedi: “Ndibọrọ fi didie? [Mmada] ubọk mi n̄kụbi inua mi?” (Job 38:4; 40:4) Emi ama ekpep Job n̄kpọ onyụn̄ anam enye osụhọde idem. Edi idịghe nsụhọdeidem kpọt ke Jehovah ekekpep Job. Enye ama enen̄ede ekikere Job. Didie?

 Kpa ye oro edide Job ama “ọfọn ama, onyụn̄ enen” se enye eketịn̄de ndusụk ini okowụt ke se enye ekerede inenke. Emi akanam Elihu asua ọnọ enye ke ini “enye [ekenịmde] idem esie ke edinen akan Abasi.” (Job 1:8; 32:2; 33:8-12) Mmọdo, se Jehovah okobụpde Job n̄ko ama anam enye ọfiọk ke ekikere imọ inenke. Abasi ama etie ke oyobio obụp Job ete: “Anie owo edi emi anamde uduak mi okịm ke ikọ eke ifiọk mîdụhe? Bọbọ ndien mbọhọ ke isịn fo nte eren-owo, ndien nyobụp fi: ndien sian mi.” (Job 38:1-3) Ekem Jehovah ama obụp mme mbụme emi ẹnamde owo okụt akaka ọniọn̄ ye odudu esie emi mme utịbe utịbe edibotn̄kpọ esie ẹwụtde. Emi ama anam Job enen̄ede enịm ke Jehovah isinamke ukwan̄n̄kpọ. Ekenen̄ede edi akwa ifet ọnọ Job Ata Ọkpọsọn̄ Abasi ndibụp enye mbụme.

Nte Ikemede Ndiyak Jehovah Obụp Nnyịn Mbụme

Nnyịn-e? Ndi mme mbụme oro ẹdude ke Bible ẹnyene ufọn ẹnọ nnyịn? Ih, ẹnyene! Iyenen̄ede ibọ ufọn edieke itiede ikere mmọ. Mme mbụme oro ẹdude ke Bible ẹnam Ikọ Abasi enen̄ede enyene odudu. Ke akpanikọ, “ikọ Abasi . . . enyene odudu . . . onyụn̄ ekeme ndifiọk mme uduak ye ekikere esịt owo.” (Heb. 4:12) Edi man inen̄ede ibọ ufọn, oyom isibụp idem nnyịn mme mbụme emi ikụtde ke Bible nte n̄kpọ eke ẹdọhọde ke Jehovah obụp nnyịn idahaoro. (Rome 15:4) Ẹyak ineme ndusụk mmọ.

“Nte Ebiereikpe ofụri ererimbot idinamke se inende?” (Gen. 18:25) Abraham okobụp Jehovah mbụme emi ke ini Jehovah okoyomde ndisobo Sodom ye Gomorrah, edi enye ikobụpke man Jehovah ọbọrọ. Abraham ama enen̄ede enịm ke Jehovah ikemeke-keme ndinam idiọk, oro edi, ndisobo nti owo ye mme idiọk owo. Mbụme emi owụt ke Abraham ama enen̄ede enịm ke Jehovah isinamke idiọk.

Mme owo mfịn ẹkeme nditie n̄kere nte usen ubiereikpe Jehovah editiede, ẹkerede m̀mê anie edibọhọ Armageddon, mîdịghe m̀mê anie ke ẹdinam eset. Utu ke ndiyak mme utọ n̄kpọ ntre ẹfịna nnyịn, akpana iti se Abraham okobụpde Abasi. Edieke idade Jehovah nte eti Ete nnyịn eke heaven nte Abraham akadade, inịmde ke enye isinamke ukwan̄n̄kpọ, ke enye esinyụn̄ atua mme owo mbọm, emi idiyakke ibiat ini itie ikere se mîbeheke nnyịn, m̀mê nditie mfan̄a se mîdoroke nnyịn udori, emi ekemede ndinam mbuọtidem nnyịn emem.

“Anie ke otu mbufo ekeme ndidian n̄kpọ ke  isua uwem esie ke ntak emi okopde editịmede esịt?” (Matt. 6:27) Jesus okobụp otuowo emi ẹkesịnede mme mbet esie mbụme emi ndiwụt ke akpana mmọ ẹyak uwem mmọ ẹsịn Jehovah ke ubọk. Se itịbede ke mme akpatre usen editịm n̄kpọ emi ẹsinen̄ede anam esịt ọduọ owo, edi ndi iduọesịt ekeme ndinam idu uwem ibịghi m̀mê ndinam n̄kpọ ọfọn akan emi?

Nditi mbụme Jesus emi ayan̄wam nnyịn ke ini n̄kpọ anamde esịt ọduọ nnyịn m̀mê ke ini n̄kpọ etịbede ọnọ owo emi imade. Oyonyụn̄ anam itre iduọesịt, inyụn̄ iyakke ikpa ekikere sia ọkpọsọn̄ ekikere isiyakke idem ọsọn̄ owo. Jesus ọkọdọhọ ke Ete nnyịn eke heaven emi ọbọkde mme inuen enyọn̄, onyụn̄ anamde mbiet ikọt eye, ọfiọk se iyomde.—Matt. 6:26-34.

“Nte owo adada ikan̄ esịn ke ikpan-esịt esie, ndien edisịne-nkpọ esie etre ndifọbọ?” (N̄ke 6:27) Mme N̄ke ibuot 1-9 ọdọn̄ọ nti item emi ete ọnọde eyen man enye enyene ata ọniọn̄. Mbụme enyọn̄ emi aban̄a idiọk utịp oro efịbe esidade edi. (N̄ke 6:29) Edieke isinamde n̄kpọ ye owo nte iyom ndidọdọ enye m̀mê edieke isitiede ikere nte ikpodude ye erenowo m̀mê n̄wan, akpana mbụme emi anam ifiọk ke ikan̄ ke ikama ibre mbre oro. Mbụme emi ekeme n̄ko ndinyene ufọn nnọ owo oro ekerede ndinam n̄kpọ ekededi oro mîfọnke. Mbụme emi enen̄ede ekem ye ikọ Bible emi: “Se ededi eke owo ọtọde, oro ke enye edinyụn̄ ọdọk.”—Gal. 6:7.

“Afo edi anie eke ekpede ikpe eyenufọk owo?” (Rome 14:4) Paul ama ewet mme mfịna oro ẹkesidude ke esop akpa isua ikie, ke ini ekewetde mbon Rome leta. Sia mme Christian ẹketode nsio nsio ebiet, ndusụk mmọ ẹma ẹtọn̄ọ ndikpe ikpe nnọ ekemmọ nditọete ke se mmọ ẹnamde, ẹnyụn̄ ẹbierede ndinam. Mbụme Paul ama anam mmọ ẹtre ndikpe ikpe nnọ kiet eken, edi ẹkabade ẹyak kpukpru n̄kpọ ẹsịn Jehovah ke ubọk.

Mme asan̄autom Jehovah mfịn ẹto nsio nsio ebiet n̄ko. Edi Jehovah anam nnyịn inen̄ede idiana kiet. Ndi imesinam n̄kpọ man ika iso idiana kiet? Edieke isisọpde ibiere ke se eyenete anamde ifọnke, ọfọn ibụp idem nnyịn mbụme Paul oro.

Mbụme Esinam Isan̄a Ikpere Jehovah

Uwụtn̄kpọ ifan̄ oro inọde mi ẹwụt ke mme mbụme emi ẹdude ke Bible ẹkeme ndinam owo etie ekere orụk owo emi imọ idide. Edieke itiede ikere se mbụme emi ọwọrọde, emi ayanam inam se mmọ ẹkpepde nnyịn. Nte ikotde Bible, iyokụt mme mbụme efen oro ẹdin̄wamde nnyịn.—Se ekebe oro odude ke page 14.

Edieke inen̄erede itie ikere mbụme oro ẹdude ke Bible, emi ayanam ikere mme n̄kpọ oro ẹnende ke enyịn̄ Jehovah. Job ọkọdọhọ ke Jehovah ama okobụp enye mbụme ama, ete: “N̄kokop mban̄a fi nte utọn̄ okopde: edi ke emi enyịn mi okụt fi.” (Job 42:5) Eketie Job nte n̄kpọ eke ẹdọhọde ke enye okụt Jehovah iso ye iso. James mbet Jesus ekesịn esiemmọ ntem: “Ẹsan̄a ẹkpere Abasi, ndien enye ayasan̄a ekpere mbufo.” (James 4:8) Mme mbụme ye kpukpru se idude ke Bible ẹkpekam ẹnam ikọri ke n̄kan̄ eke spirit inyụn̄ inen̄ede isan̄a ikpere Jehovah!

[Ekebe ke page 14]

Didie ke ndibụp idemfo mme mbụme oro ẹdude ke idak emi ekeme ndinam ese n̄kpọ nte Jehovah esede?

▪ “Nte edifọp uwa ye uwa emem ẹnem Jehovah esịt nte edikop uyo Jehovah?”—1 Sam. 15:22.

▪ “Nte andibot enyịn idikwe n̄kpọ?”—Ps. 94:9.

▪ “O ifem, adan̄a didie ke afo edisụk ana? Ke ini ewe ke afo edidemede ke idap fo?”—N̄ke 6:9.

▪ “Nte ọfọn fi ndiyat esịt?”—Jonah 4:4.

▪ “Nso udori ke owo edidia edieke enye enyenede ofụri ererimbot edi ataba ukpọn̄ esie?”—Matt. 16:26.

▪ “Anie edidianade nnyịn ke ima Christ?”—Rome 8:35.

▪ “Nso ke afo enyene emi mûkọbọhọ-bọ?”—1 Cor. 4:7.

▪ “Nso ebuana ke un̄wana enyene ye ekịm?”—2 Cor. 6:14.

[Ndise ke page 15]

Nso ke mbụme oro Jehovah okobụpde Job ekekpep Job?